২. আমগন্ধসুত্তং

২৪২. ‘‘সামাকচিঙ্গূলকচীনকানি চ, পত্তপ্ফলং মূলফলং গৱিপ্ফলং;

ধম্মেন লদ্ধং সতমস্নমানা [সতমসমানা (সী. পী.), সতমস্সমানা (স্যা. কং.)], ন কামকামা অলিকং ভণন্তি.

২৪৩. ‘‘যদস্নমানো সুকতং সুনিট্ঠিতং, পৰেহি দিন্নং পযতং পণীতং;

সালীনমন্নং পৰিভুঞ্জমানো, সো ভুঞ্জসী কস্সপ আমগন্ধং.

২৪৪. ‘‘ন আমগন্ধো মম কপ্পতীতি, ইচ্চেৱ ত্ৱং ভাসসি ব্ৰহ্মবন্ধু;

সালীনমন্নং পৰিভুঞ্জমানো, সকুন্তমংসেহি সুসঙ্খতেহি;

পুচ্ছামি তং কস্সপ এতমত্থং, কথং পকাৰো তৱ আমগন্ধো’’.

২৪৫. ‘‘পাণাতিপাতো ৱধছেদবন্ধনং, থেয্যং মুসাৱাদো নিকতিৱঞ্চনানি চ;

অজ্ঝেনকুত্তং [অজ্ঝেন কুজ্জং (সী. পী.)] পৰদাৰসেৱনা, এসামগন্ধো ন হি মংসভোজনং.

২৪৬. ‘‘যে ইধ কামেসু অসঞ্ঞতা জনা, ৰসেসু গিদ্ধা অসুচিভাৱমস্সিতা [অসুচীকমিস্সিতা (সী. স্যা. কং. পী.)];

নত্থিকদিট্ঠী ৱিসমা দুৰন্নযা, এসামগন্ধো ন হি মংসভোজনং.

২৪৭. ‘‘যে লূখসা দাৰুণা পিট্ঠিমংসিকা [যে লূখৰসা দাৰুণা পৰপিট্ঠিমংসিকা (ক.)], মিত্তদ্দুনো নিক্কৰুণাতিমানিনো;

অদানসীলা ন চ দেন্তি কস্সচি, এসামগন্ধো ন হি মংসভোজনং.

২৪৮. ‘‘কোধো মদো থম্ভো পচ্চুপট্ঠাপনা [পচ্চুট্ঠাপনা চ (সী. স্যা.), পচ্চুট্ঠাপনা (পী.)], মাযা উসূযা ভস্সসমুস্সযো চ;

মানাতিমানো চ অসব্ভি সন্থৱো, এসামগন্ধো ন হি মংসভোজনং.

২৪৯. ‘‘যে পাপসীলা ইণঘাতসূচকা, ৱোহাৰকূটা ইধ পাটিৰূপিকা [পাতিৰূপিকা (?)];

নৰাধমা যেধ কৰোন্তি কিব্বিসং, এসামগন্ধো ন হি মংসভোজনং.

২৫০. ‘‘যে ইধ পাণেসু অসঞ্ঞতা জনা, পৰেসমাদায ৱিহেসমুয্যুতা;

দুস্সীললুদ্দা ফৰুসা অনাদৰা, এসামগন্ধো ন হি মংসভোজনং.

২৫১. ‘‘এতেসু গিদ্ধা ৱিৰুদ্ধাতিপাতিনো, নিচ্চুয্যুতা পেচ্চ তমং ৱজন্তি যে;

পতন্তি সত্তা নিৰযং অৱংসিৰা, এসামগন্ধো ন হি মংসভোজনং.

২৫২. ‘‘ন মচ্ছমংসানমনাসকত্তং [ন মচ্ছমংসং ন অনাসকত্তং (সী. অট্ঠ মূলপাঠো), ন মংচ্ছমংসানানাসকত্তং (স্যা. ক.)], ন নগ্গিযং ন মুণ্ডিযং জটাজল্লং;

খৰাজিনানি নাগ্গিহুত্তস্সুপসেৱনা, যে ৱাপি লোকে অমৰা বহূ তপা;

মন্তাহুতী যঞ্ঞমুতূপসেৱনা, সোধেন্তি মচ্চং অৱিতিণ্ণকঙ্খং.

২৫৩. ‘‘যো তেসু [সোতেসু (সী. পী.)] গুত্তো ৱিদিতিন্দ্ৰিযো চৰে, ধম্মে ঠিতো অজ্জৱমদ্দৱে ৰতো;

সঙ্গাতিগো সব্বদুক্খপ্পহীনো, ন লিপ্পতি [ন লিম্পতি (স্যা. কং ক.)] দিট্ঠসুতেসু ধীৰো’’.

২৫৪. ইচ্চেতমত্থং ভগৱা পুনপ্পুনং, অক্খাসি নং [তং (সী. পী.)] ৱেদযি মন্তপাৰগূ;

চিত্ৰাহি গাথাহি মুনী পকাসযি, নিৰামগন্ধো অসিতো দুৰন্নযো.

২৫৫. সুত্ৱান বুদ্ধস্স সুভাসিতং পদং, নিৰামগন্ধং সব্বদুক্খপ্পনূদনং;

নীচমনো ৱন্দি তথাগতস্স, তত্থেৱ পব্বজ্জমৰোচযিত্থাতি.

আমগন্ধসুত্তং দুতিযং নিট্ঠিতং.