৯. কূটৱিনিচ্ছযিকপেতৱত্থু

৪৯৯. ‘‘মালী কিৰিটী কাযূৰী [কেযূৰী (সী.)], গত্তা তে চন্দনুস্সদা;

পসন্নমুখৱণ্ণোসি, সূৰিযৱণ্ণোৱ সোভসি.

৫০০. ‘‘অমানুসা পাৰিসজ্জা, যে তেমে পৰিচাৰকা;

দস কঞ্ঞাসহস্সানি, যা তেমা পৰিচাৰিকা;

তা [কা (ক.)] কম্বুকাযূৰধৰা, কঞ্চনাৱেড়ভূসিতা.

৫০১. ‘‘মহানুভাৱোসি তুৱং, লোমহংসনৰূপৱা;

পিট্ঠিমংসানি অত্তনো, সামং উক্কচ্চ [উক্কড্ঢ (সী.)] খাদসি.

৫০২. ‘‘কিং নু কাযেন ৱাচায, মনসা দুক্কুটং কতং;

কিস্স কম্মৱিপাকেন, পিট্ঠিমংসানি অত্তনো;

সামং উক্কচ্চ খাদসী’’তি.

৫০৩. ‘‘অত্তনোহং অনত্থায, জীৱলোকে অচাৰিসং;

পেসুঞ্ঞমুসাৱাদেন, নিকতিৱঞ্চনায চ.

৫০৪. ‘‘তত্থাহং পৰিসং গন্ত্ৱা, সচ্চকালে উপট্ঠিতে;

অত্থং ধম্মং নিৰাকত্ৱা [নিৰংকত্ৱা (ক.) নি + আ + কৰ + ত্ৱা = নিৰাকত্ৱা], অধম্মমনুৱত্তিসং.

৫০৫. ‘‘এৱং সো খাদতত্তানং, যো হোতি পিট্ঠিমংসিকো;

যথাহং অজ্জ খাদামি, পিট্ঠিমংসানি অত্তনো.

৫০৬. ‘‘তযিদং তযা নাৰদ সামং দিট্ঠং, অনুকম্পকা যে কুসলা ৱদেয্যুং;

মা পেসুণং মা চ মুসা অভাণি, মা খোসি পিট্ঠিমংসিকো তুৱ’’ন্তি.

কূটৱিনিচ্ছযিকপেতৱত্থু নৱমং.