১০. ধাতুৱিৱণ্ণপেতৱত্থু

৫০৭. ‘‘অন্তলিক্খস্মিং তিট্ঠন্তো, দুগ্গন্ধো পূতি ৱাযসি;

মুখঞ্চ তে কিমযো পূতিগন্ধং, খাদন্তি কিং কম্মমকাসি পুব্বে.

৫০৮. ‘‘ততো সত্থং গহেত্ৱান, ওক্কন্তন্তি পুনপ্পুনং;

খাৰেন পৰিপ্ফোসিত্ৱা, ওক্কন্তন্তি পুনপ্পুনং.

৫০৯. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, ইদং দুক্খং নিগচ্ছসী’’তি.

৫১০. ‘‘অহং ৰাজগহে ৰম্মে, ৰমণীযে গিৰিব্বজে;

ইস্সৰো ধনধঞ্ঞস্স, সুপহূতস্স মাৰিস.

৫১১. ‘‘তস্সাযং মে ভৰিযা চ, ধীতা চ সুণিসা চ মে;

তা মালং উপ্পলঞ্চাপি, পচ্চগ্ঘঞ্চ ৱিলেপনং;

থূপং হৰন্তিযো ৱাৰেসিং, তং পাপং পকতং মযা.

৫১২. ‘‘ছড়াসীতিসহস্সানি, মযং পচ্চত্তৱেদনা;

থূপপূজং ৱিৱণ্ণেত্ৱা, পচ্চাম নিৰযে ভুসং.

৫১৩. ‘‘যে চ খো থূপপূজায, ৱত্তন্তে অৰহতো মহে;

আদীনৱং পকাসেন্তি, ৱিৱেচযেথ [ৱিৱেচযথ (সী.)] নে ততো.

৫১৪. ‘‘ইমা চ পস্স আযন্তিযো, মালধাৰী অলঙ্কতা;

মালাৱিপাকংনুভোন্তিযো [অনুভৱন্তি (সী. পী.)], সমিদ্ধা চ তা [সমিদ্ধা তা (সী. স্যা.)] যসস্সিনিযো.

৫১৫. ‘‘তঞ্চ দিস্ৱান অচ্ছেৰং, অব্ভুতং লোমহংসনং;

নমো কৰোন্তি সপ্পঞ্ঞা, ৱন্দন্তি তং মহামুনিং.

৫১৬. ‘‘সোহং নূন ইতো গন্ত্ৱা, যোনিং লদ্ধান মানুসিং;

থূপপূজং কৰিস্সামি, অপ্পমত্তো পুনপ্পুন’’ন্তি.

ধাতুৱিৱণ্ণপেতৱত্থু দসমং.

চূড়ৱগ্গো ততিযো নিট্ঠিতো.