নমো তস্স ভগৱতো অৰহতো সম্মাসম্বুদ্ধস্স

খুদ্দকনিকাযে

পেতৱত্থুপাড়ি

১. উৰগৱগ্গো

১. খেত্তূপমপেতৱত্থু

১. ‘‘খেত্তূপমা অৰহন্তো, দাযকা কস্সকূপমা;

বীজূপমং দেয্যধম্মং, এত্তো নিব্বত্ততে ফলং.

২. ‘‘এতং বীজং কসি খেত্তং, পেতানং দাযকস্স চ;

তং পেতা পৰিভুঞ্জন্তি, দাতা পুঞ্ঞেন ৱড্ঢতি.

৩. ‘‘ইধেৱ কুসলং কত্ৱা, পেতে চ পটিপূজিয;

সগ্গঞ্চ কমতি [গমতি (ক.)] ট্ঠানং, কম্মং কত্ৱান ভদ্দক’’ন্তি.

খেত্তূপমপেতৱত্থু পঠমং.

২. সূকৰমুখপেতৱত্থু

৪. ‘‘কাযো তে সব্বসোৱণ্ণো, সব্বা ওভাসতে দিসা;

মুখং তে সূকৰস্সেৱ, কিং কম্মমকৰী পুৰে’’ [মকৰা পুৰে (ক.)].

৫. ‘‘কাযেন সঞ্ঞতো আসিং, ৱাচাযাসিমসঞ্ঞতো;

তেন মেতাদিসো ৱণ্ণো, যথা পস্সসি নাৰদ.

৬. ‘‘তং ত্যাহং [তাহং (ক.)] নাৰদ ব্ৰূমি, সামং দিট্ঠমিদং তযা;

মাকাসি মুখসা পাপং, মা খো সূকৰমুখো অহূ’’তি.

সূকৰমুখপেতৱত্থু দুতিযং.

৩. পূতিমুখপেতৱত্থু

৭. ‘‘দিব্বং সুভং ধাৰেসি ৱণ্ণধাতুং, ৱেহাযসং তিট্ঠসি অন্তলিক্খে;

মুখঞ্চ তে কিমযো পূতিগন্ধং, খাদন্তি কিং কম্মমকাসি পুব্বে’’.

৮. ‘‘সমণো অহং পাপোতিদুট্ঠৱাচো [পাপো দুট্ঠৱাচো (সী.), পাপো দুক্খৱাচো (স্যা. পী.)], তপস্সিৰূপো মুখসা অসঞ্ঞতো;

লদ্ধা চ মে তপসা ৱণ্ণধাতু, মুখঞ্চ মে পেসুণিযেন পূতি.

৯. ‘‘তযিদং তযা নাৰদ সামং দিট্ঠং,

অনুকম্পকা যে কুসলা ৱদেয্যুং;

‘মা পেসুণং মা চ মুসা অভাণি,

যক্খো তুৱং হোহিসি কামকামী’’’তি.

পূতিমুখপেতৱত্থু ততিযং.

৪. পিট্ঠধীতলিকপেতৱত্থু

১০. ‘‘যং কিঞ্চাৰম্মণং কত্ৱা, দজ্জা দানং অমচ্ছৰী;

পুব্বপেতে চ আৰব্ভ, অথ ৱা ৱত্থুদেৱতা.

১১. ‘‘চত্তাৰো চ মহাৰাজে, লোকপালে যসস্সিনে [যসস্সিনো (সী. স্যা.)];

কুৱেৰং ধতৰট্ঠঞ্চ, ৱিৰূপক্খং ৱিৰূড়্হকং;

তে চেৱ পূজিতা হোন্তি, দাযকা চ অনিপ্ফলা.

১২. ‘‘ন হি ৰুণ্ণং ৱা সোকো ৱা, যা চঞ্ঞা পৰিদেৱনা;

ন তং পেতস্স অত্থায, এৱং তিট্ঠন্তি ঞাতযো.

১৩. ‘‘অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা;

দীঘৰত্তং হিতাযস্স, ঠানসো উপকপ্পতী’’তি.

পিট্ঠধীতলিকপেতৱত্থু চতুত্থং.

৫. তিৰোকুট্টপেতৱত্থু

১৪. [খু. পা. ৭.১ খুদ্দকপাঠে] ‘‘তিৰোকুট্টেসু [তিৰোকুড্ডেসু (সী. স্যা. পী.)] তিট্ঠন্তি, সন্ধিসিঙ্ঘাটকেসু চ;

দ্ৱাৰবাহাসু তিট্ঠন্তি, আগন্ত্ৱান সকং ঘৰং.

১৫. ‘‘পহূতে অন্নপানম্হি, খজ্জভোজ্জে উপট্ঠিতে;

ন তেসং কোচি সৰতি, সত্তানং কম্মপচ্চযা.

১৬. ‘‘এৱং দদন্তি ঞাতীনং, যে হোন্তি অনুকম্পকা;

সুচিং পণীতং কালেন, কপ্পিযং পানভোজনং;

‘ইদং ৱো ঞাতীনং হোতু, সুখিতা হোন্তু ঞাতযো’.

১৭. ‘‘তে চ তত্থ সমাগন্ত্ৱা, ঞাতিপেতা সমাগতা;

পহূতে অন্নপানম্হি, সক্কচ্চং অনুমোদৰে.

১৮. ‘‘‘চিৰং জীৱন্তু নো ঞাতী, যেসং হেতু লভামসে;

অম্হাকঞ্চ কতা পূজা, দাযকা চ অনিপ্ফলা’.

১৯. ‘‘‘ন হি তত্থ কসি অত্থি, গোৰক্খেত্থ ন ৱিজ্জতি;

ৱণিজ্জা তাদিসী নত্থি, হিৰঞ্ঞেন কযাকযং [কযোক্কযং (সী. ক.) কযোকযং (খু. পা. ৭.৬)];

ইতো দিন্নেন যাপেন্তি, পেতা কালগতা [কালকতা (সী. স্যা. পী.)] তহিং’.

২০. ‘‘‘উন্নমে উদকং ৱুট্ঠং, যথা নিন্নং পৱত্ততি;

এৱমেৱ ইতো দিন্নং, পেতানং উপকপ্পতি’.

২১. ‘‘‘যথা ৱাৰিৱহা পূৰা, পৰিপূৰেন্তি সাগৰং;

এৱমেৱ ইতো দিন্নং, পেতানং উপকপ্পতি’.

২২. ‘‘‘অদাসি মে অকাসি মে, ঞাতি মিত্তা [ঞাতি মিত্তো (?)] সখা চ মে;

পেতানং দক্খিণং দজ্জা, পুব্বে কতমনুস্সৰং’.

২৩. ‘‘‘ন হি ৰুণ্ণং ৱা সোকো ৱা, যা চঞ্ঞা পৰিদেৱনা;

ন তং পেতানমত্থায, এৱং তিট্ঠন্তি ঞাতযো’.

২৪. ‘‘‘অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা;

দীঘৰত্তং হিতাযস্স, ঠানসো উপকপ্পতি’.

২৫. ‘‘সো ঞাতিধম্মো চ অযং নিদস্সিতো, পেতান পূজা চ কতা উড়াৰা;

বলঞ্চ ভিক্খূনমনুপ্পদিন্নং, তুম্হেহি পুঞ্ঞং পসুতং অনপ্পক’’ন্তি.

তিৰোকুট্টপেতৱত্থু পঞ্চমং.

৬. পঞ্চপুত্তখাদপেতিৱত্থু

২৬. ‘‘নগ্গা দুব্বণ্ণৰূপাসি, দুগ্গন্ধা পূতি ৱাযসি;

মক্খিকাহি পৰিকিণ্ণা [মক্খিকাপৰিকিণ্ণা চ (সী.)], কা নু ত্ৱং ইধ তিট্ঠসী’’তি.

২৭. ‘‘অহং ভদন্তে [ভদ্দন্তে (ক.)] পেতীম্হি, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা.

২৮. ‘‘কালেন পঞ্চ পুত্তানি, সাযং পঞ্চ পুনাপৰে;

ৱিজাযিত্ৱান খাদামি, তেপি না হোন্তি মে অলং.

২৯. ‘‘পৰিডয্হতি ধূমাযতি, খুদায [খুদ্দায (ক.)] হদযং মম;

পানীযং ন লভে পাতুং, পস্স মং ব্যসনং গত’’ন্তি.

৩০. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, পুত্তমংসানি খাদসী’’তি.

৩১. ‘‘সপতী [সপত্তী (সী.)] মে গব্ভিনী আসি, তস্সা পাপং অচেতযিং;

সাহং পদুট্ঠমনসা, অকৰিং গব্ভপাতনং.

৩২. ‘‘তস্সা দ্ৱেমাসিকো গব্ভো, লোহিতঞ্ঞেৱ পগ্ঘৰি;

তদস্সা মাতা কুপিতা, ময্হং ঞাতী সমানযি;

সপথঞ্চ মং কাৰেসি, পৰিভাসাপযী চ মং.

৩৩. ‘‘সাহং ঘোৰঞ্চ সপথং, মুসাৱাদং অভাসিসং;

পুত্তমংসানি খাদামি, সচে তং পকতং মযা.

৩৪. ‘‘তস্স কম্মস্স ৱিপাকেন [ৱিপাকং (স্যা. ক.)], মুসাৱাদস্স চূভযং;

পুত্তমংসানি খাদামি, পুব্বলোহিতমক্খিতা’’তি.

পঞ্চপুত্তখাদপেতিৱত্থু [পঞ্চপুত্তখাদপেতৱত্থু (সী. স্যা. পী.) এৱমুপৰিপি] ছট্ঠং.

৭. সত্তপুত্তখাদপেতিৱত্থু

৩৫. ‘‘নগ্গা দুব্বণ্ণৰূপাসি, দুগ্গন্ধা পূতি ৱাযসি;

মক্খিকাহি পৰিকিণ্ণা, কা নু ত্ৱং ইধ তিট্ঠসী’’তি.

৩৬. ‘‘অহং ভদন্তে পেতীম্হি, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা.

৩৭. ‘‘কালেন সত্ত পুত্তানি, সাযং সত্ত পুনাপৰে;

ৱিজাযিত্ৱান খাদামি, তেপি না হোন্তি মে অলং.

৩৮. ‘‘পৰিডয্হতি ধূমাযতি, খুদায হদযং মম;

নিব্বুতিং নাধিগচ্ছামি, অগ্গিদড্ঢাৱ আতপে’’তি.

৩৯. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, পুত্তমংসানি খাদসী’’তি.

৪০. ‘‘অহূ ময্হং দুৱে পুত্তা, উভো সম্পত্তযোব্বনা;

সাহং পুত্তবলূপেতা, সামিকং অতিমঞ্ঞিসং.

৪১. ‘‘ততো মে সামিকো কুদ্ধো, সপত্তিং ময্হমানযি;

সা চ গব্ভং অলভিত্থ, তস্সা পাপং অচেতযিং.

৪২. ‘‘সাহং পদুট্ঠমনসা, অকৰিং গব্ভপাতনং;

তস্সা তেমাসিকো গব্ভো, পুব্বলোহিতকো [পুব্বলোহিতকো (ক.)] পতি.

৪৩. ‘‘তদস্সা মাতা কুপিতা, ময্হং ঞাতী সমানযি;

সপথঞ্চ মং কাৰেসি, পৰিভাসাপযী চ মং.

৪৪. ‘‘সাহং ঘোৰঞ্চ সপথং, মুসাৱাদং অভাসিসং;

‘পুত্তমংসানি খাদামি, সচে তং পকতং মযা’.

৪৫. ‘‘তস্স কম্মস্স ৱিপাকেন, মুসাৱাদস্স চূভযং;

পুত্তমংসানি খাদামি, পুব্বলোহিতমক্খিতা’’তি.

সত্তপুত্তখাদপেতিৱত্থু সত্তমং.

৮. গোণপেতৱত্থু

৪৬. ‘‘কিং নু উম্মত্তৰূপোৱ, লাযিত্ৱা হৰিতং তিণং;

খাদ খাদাতি লপসি, গতসত্তং জৰগ্গৱং.

৪৭. ‘‘ন হি অন্নেন পানেন, মতো গোণো সমুট্ঠহে;

ত্ৱংসি বালো চ [বালোৱ (ক.)] দুম্মেধো, যথা তঞ্ঞোৱ দুম্মতী’’তি.

৪৮. ‘‘ইমে পাদা ইদং সীসং, অযং কাযো সৱালধি;

নেত্তা তথেৱ তিট্ঠন্তি, অযং গোণো সমুট্ঠহে.

৪৯. ‘‘নায্যকস্স হত্থপাদা, কাযো সীসঞ্চ দিস্সতি;

ৰুদং মত্তিকথূপস্মিং, ননু ত্ৱঞ্ঞেৱ দুম্মতী’’তি.

৫০. ‘‘আদিত্তং ৱত মং সন্তং, ঘতসিত্তংৱ পাৱকং;

ৱাৰিনা ৱিয ওসিঞ্চং, সব্বং নিব্বাপযে দৰং.

৫১. ‘‘অব্বহী [অব্বূড়্হং (বহূসু)] ৱত মে সল্লং, সোকং হদযনিস্সিতং;

যো মে সোকপৰেতস্স, পিতুসোকং অপানুদি.

৫২. ‘‘স্ৱাহং অব্বূড়্হসল্লোস্মি, সীতিভূতোস্মি নিব্বুতো;

ন সোচামি ন ৰোদামি, তৱ সুত্ৱান মাণৱ’.

৫৩. এৱং কৰোন্তি সপ্পঞ্ঞা, যে হোন্তি অনুকম্পকা;

ৱিনিৱত্তযন্তি সোকম্হা, সুজাতো পিতৰং যথাতি.

গোণপেতৱত্থু অট্ঠমং.

৯. মহাপেসকাৰপেতিৱত্থু

৫৪. ‘‘গূথঞ্চ মুত্তং ৰুহিৰঞ্চ পুব্বং, পৰিভুঞ্জতি কিস্স অযং ৱিপাকো;

অযং নু কিং কম্মমকাসি নাৰী, যা সব্বদা লোহিতপুব্বভক্খা.

৫৫. ‘‘নৱানি ৱত্থানি সুভানি চেৱ, মুদূনি সুদ্ধানি চ লোমসানি;

দিন্নানি মিস্সা কিতকা [কিটকা (ক.)] ভৱন্তি, অযং নু কিং কম্মমকাসি নাৰী’’তি.

৫৬. ‘‘ভৰিযা মমেসা অহূ ভদন্তে, অদাযিকা মচ্ছৰিনী কদৰিযা;

সা মং দদন্তং সমণব্ৰাহ্মণানং, অক্কোসতি চ পৰিভাসতি চ.

৫৭. ‘‘‘গূথঞ্চ মুত্তং ৰুহিৰঞ্চ পুব্বং, পৰিভুঞ্জ ত্ৱং অসুচিং সব্বকালং;

এতং তে পৰলোকস্মিং হোতু, ৱত্থা চ তে কিটকসমা ভৱন্তু’;

এতাদিসং দুচ্চৰিতং চৰিত্ৱা, ইধাগতা চিৰৰত্তায খাদতী’’তি.

মহাপেসকাৰপেতিৱত্থু নৱমং.

১০. খল্লাটিযপেতিৱত্থু

৫৮. ‘‘কা নু অন্তোৱিমানস্মিং, তিট্ঠন্তী নূপনিক্খমি;

উপনিক্খমস্সু ভদ্দে, পস্সাম তং বহিট্ঠিত’’ন্তি.

৫৯. ‘‘অট্টীযামি হৰাযামি, নগ্গা নিক্খমিতুং বহি;

কেসেহম্হি পটিচ্ছন্না, পুঞ্ঞং মে অপ্পকং কত’’ন্তি.

৬০. ‘‘হন্দুত্তৰীযং দদামি তে, ইদং দুস্সং নিৱাসয;

ইদং দুস্সং নিৱাসেত্ৱা, এহি নিক্খম সোভনে;