৮. দুতিযমিগলুদ্দকপেতৱত্থু

৪৮৮. ‘‘কূটাগাৰে চ পাসাদে, পল্লঙ্কে গোনকত্থতে;

পঞ্চঙ্গিকেন তুৰিযেন, ৰমসি সুপ্পৱাদিতে.

৪৮৯. ‘‘ততো ৰত্যা ৱিৱসানে [ৱ্যৱসানে (সী.)], সূৰিযুগ্গমনং পতি;

অপৱিদ্ধো সুসানস্মিং, বহুদুক্খং নিগচ্ছসি.

৪৯০. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, ইদং দুক্খং নিগচ্ছসি’’.

৪৯১. ‘‘অহং ৰাজগহে ৰম্মে, ৰমণীযে গিৰিব্বজে;

মিগলুদ্দো পুৰে আসিং, লুদ্দো চাসিমসঞ্ঞতো.

৪৯২. ‘‘তস্স মে সহাযো সুহদযো, সদ্ধো আসি উপাসকো;

তস্স কুলুপকো ভিক্খু, আসি গোতমসাৱকো;

সোপি মং অনুকম্পন্তো, নিৱাৰেসি পুনপ্পুনং.

৪৯৩. ‘‘‘মাকাসি পাপকং কম্মং, মা তাত দুগ্গতিং অগা;

সচে ইচ্ছসি পেচ্চ সুখং, ৱিৰম পাণৱধা অসংযমা’.

৪৯৪. ‘‘তস্সাহং ৱচনং সুত্ৱা, সুখকামস্স হিতানুকম্পিনো;

নাকাসিং সকলানুসাসনিং, চিৰপাপাভিৰতো অবুদ্ধিমা.

৪৯৫. ‘‘সো মং পুন ভূৰিসুমেধসো, অনুকম্পায সংযমে নিৱেসযি;

‘সচে দিৱা হনসি পাণিনো, অথ তে ৰত্তিং ভৱতু সংযমো’.

৪৯৬. ‘‘স্ৱাহং দিৱা হনিত্ৱা পাণিনো, ৱিৰতো ৰত্তিমহোসি সঞ্ঞতো;

ৰত্তাহং পৰিচাৰেমি, দিৱা খজ্জামি দুগ্গতো.

৪৯৭. ‘‘তস্স কম্মস্স কুসলস্স, অনুভোমি ৰত্তিং অমানুসিং;

দিৱা পটিহতাৱ কুক্কুৰা, উপধাৱন্তি সমন্তা খাদিতুং.

৪৯৮. ‘‘যে চ তে সততানুযোগিনো, ধুৱং পযুত্তা [ধুৱযুত্তা (সী.)] সুগতস্স সাসনে;

মঞ্ঞামি তে অমতমেৱ কেৱলং, অধিগচ্ছন্তি পদং অসঙ্খত’’ন্তি.

দুতিযমিগলুদ্দকপেতৱত্থু অট্ঠমং.