৭. মিগলুদ্দকপেতৱত্থু

৪৭৮. ‘‘নৰনাৰিপুৰক্খতো যুৱা, ৰজনীযেহি কামগুণেহি [কামেহি (ক.)] সোভসি;

দিৱসং অনুভোসি কাৰণং, কিমকাসি পুৰিমায জাতিযা’’তি.

৪৭৯. ‘‘অহং ৰাজগহে ৰম্মে, ৰমণীযে গিৰিব্বজে;

মিগলুদ্দো পুৰে আসিং, লোহিতপাণি দাৰুণো.

৪৮০. ‘‘অৱিৰোধকৰেসু পাণিসু, পুথুসত্তেসু পদুট্ঠমানসো;

ৱিচৰিং অতিদাৰুণো সদা [তদা (সী.)], পৰহিংসায ৰতো অসঞ্ঞতো.

৪৮১. ‘‘তস্স মে সহাযো সুহদযো [সুহদো (সী.)], সদ্ধো আসি উপাসকো;

সোপি [সো হি (স্যা.)] মং অনুকম্পন্তো, নিৱাৰেসি পুনপ্পুনং.

৪৮২. ‘‘‘মাকাসি পাপকং কম্মং, মা তাত দুগ্গতিং অগা;

সচে ইচ্ছসি পেচ্চ সুখং, ৱিৰম পাণৱধা অসংযমা’.

৪৮৩. ‘‘তস্সাহং ৱচনং সুত্ৱা, সুখকামস্স হিতানুকম্পিনো;

নাকাসিং সকলানুসাসনিং, চিৰপাপাভিৰতো অবুদ্ধিমা.

৪৮৪. ‘‘সো মং পুন ভূৰিসুমেধসো, অনুকম্পায সংযমে নিৱেসযি;

‘সচে দিৱা হনসি পাণিনো, অথ তে ৰত্তিং ভৱতু সংযমো’.

৪৮৫. ‘‘স্ৱাহং দিৱা হনিত্ৱা পাণিনো, ৱিৰতো ৰত্তিমহোসি সঞ্ঞতো;

ৰত্তাহং পৰিচাৰেমি, দিৱা খজ্জামি দুগ্গতো.

৪৮৬. ‘‘তস্স কম্মস্স কুসলস্স, অনুভোমি ৰত্তিং অমানুসিং;

দিৱা পটিহতাৱ [পটিহতা চ (ক.)] কুক্কুৰা, উপধাৱন্তি সমন্তা খাদিতুং.

৪৮৭. ‘‘যে চ তে সততানুযোগিনো, ধুৱং পযুত্তা সুগতস্স সাসনে;

মঞ্ঞামি তে অমতমেৱ কেৱলং, অধিগচ্ছন্তি পদং অসঙ্খত’’ন্তি.

মিগলুদ্দকপেতৱত্থু সত্তমং.