৬. সেৰিণীপেতৱত্থু

৪৬৪. ‘‘নগ্গা দুব্বণ্ণৰূপাসি, কিসা ধমনিসন্থতা;

উপ্ফাসুলিকে কিসিকে, কা নু ত্ৱং ইধ তিট্ঠসী’’তি.

৪৬৫. ‘‘অহং ভদন্তে পেতীম্হি, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা’’তি.

৪৬৬. ‘‘কিং নু কাযেন ৱাচায, মনসা কুক্কটং কতং;

কিস্স কম্মৱিপাকেন, পেতলোকং ইতো গতা’’তি.

৪৬৭. ‘‘অনাৱটেসু তিত্থেসু, ৱিচিনিং অড্ঢমাসকং;

সন্তেসু দেয্যধম্মেসু, দীপং নাকাসিমত্তনো.

৪৬৮. ‘‘নদিং উপেমি তসিতা, ৰিত্তকা পৰিৱত্ততি;

ছাযং উপেমি উণ্হেসু, আতপো পৰিৱত্ততি.

৪৬৯. ‘‘অগ্গিৱণ্ণো চ মে ৱাতো, ডহন্তো উপৱাযতি;

এতঞ্চ ভন্তে অৰহামি, অঞ্ঞঞ্চ পাপকং ততো.

৪৭০. ‘‘গন্ত্ৱান হত্থিনিং পুৰং, ৱজ্জেসি ময্হ মাতৰং;

‘ধীতা চ তে মযা দিট্ঠা, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা’.

৪৭১. ‘‘অত্থি মে এত্থ নিক্খিত্তং, অনক্খাতঞ্চ তং মযা;

চত্তাৰিসতসহস্সানি, পল্লঙ্কস্স চ হেট্ঠতো.

৪৭২. ‘‘ততো মে দানং দদতু, তস্সা চ হোতু জীৱিকা;

দানং দত্ৱা চ মে মাতা, দক্খিণং অনুদিচ্ছতু [অনুদিস্সতু (সী. পী.), অন্ৱাদিস্সতু (স্যা.)];

তদাহং সুখিতা হেস্সং, সব্বকামসমিদ্ধিনী’’তি.

৪৭৩. ‘‘সাধূ’’তি সো পটিস্সুত্ৱা, গন্ত্ৱান হত্থিনিং পুৰং;

অৱোচ তস্সা মাতৰং –

‘ধীতা চ তে মযা দিট্ঠা, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা’.

৪৭৪. ‘‘সা মং তত্থ সমাদপেসি, ( ) [(গন্ত্ৱান হত্থিনিং পুৰং) (স্যা. ক.)] ৱজ্জেসি ময্হ মাতৰং;

‘ধীতা চ তে মযা দিট্ঠা, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা’.

৪৭৫. ‘‘অত্থি চ মে এত্থ নিক্খিত্তং, অনক্খাতঞ্চ তং মযা;

চত্তাৰিসতসহস্সানি, পল্লঙ্কস্স চ হেট্ঠতো.

৪৭৬. ‘‘ততো মে দানং দদতু, তস্সা চ হোতু জীৱিকা;

দানং দত্ৱা চ মে মাতা, দক্খিণং অনুদিচ্ছতু ( ) [(ততো তুৱং দানং দেহি, তস্সা দক্খিণমাদিসী) (ক.)];

‘তদা সা সুখিতা হেস্সং, সব্বকামসমিদ্ধিনী’’’তি.

৪৭৭. ততো হি সা দানমদা, তস্সা দক্খিণমাদিসী;

পেতী চ সুখিতা আসি, তস্সা চাসি সুজীৱিকাতি.

সেৰিণীপেতৱত্থু ছট্ঠং.