৫. কুমাৰপেতৱত্থু

৪৫৩. অচ্ছেৰৰূপং সুগতস্স ঞাণং, সত্থা যথা পুগ্গলং ব্যাকাসি;

উস্সন্নপুঞ্ঞাপি ভৱন্তি হেকে, পৰিত্তপুঞ্ঞাপি ভৱন্তি হেকে.

৪৫৪. অযং কুমাৰো সীৱথিকায ছড্ডিতো, অঙ্গুট্ঠস্নেহেন যাপেতি ৰত্তিং;

ন যক্খভূতা ন সৰীসপা [সিৰিংসপা (সী. স্যা. পী.)] ৱা, ৱিহেঠযেয্যুং কতপুঞ্ঞং কুমাৰং.

৪৫৫. সুনখাপিমস্স পলিহিংসু পাদে, ধঙ্কা সিঙ্গালা [সিগালা (সী. স্যা. পী.)] পৰিৱত্তযন্তি;

গব্ভাসযং পক্খিগণা হৰন্তি, কাকা পন অক্খিমলং হৰন্তি.

৪৫৬. নযিমস্স [ন ইমস্স (স্যা.), নিমস্স (ক.)] ৰক্খং ৱিদহিংসু কেচি, ন ওসধং সাসপধূপনং ৱা;

নক্খত্তযোগম্পি ন অগ্গহেসুং [ন উগ্গহেসুং (ক.)], ন সব্বধঞ্ঞানিপি আকিৰিংসু.

৪৫৭. এতাদিসং উত্তমকিচ্ছপত্তং, ৰত্তাভতং সীৱথিকায ছড্ডিতং;

নোনীতপিণ্ডংৱ পৱেধমানং, সসংসযং জীৱিতসাৱসেসং.

৪৫৮. তমদ্দসা দেৱমনুস্সপূজিতো, দিস্ৱা চ তং ব্যাকৰি ভূৰিপঞ্ঞো;

‘‘অযং কুমাৰো নগৰস্সিমস্স, অগ্গকুলিকো ভৱিস্সতি ভোগতো চ’’ [ভোগৱা চ (স্যা. ক.)].

৪৫৯. ‘‘কিস্স [কিং’স (?)] ৱতং কিং পন ব্ৰহ্মচৰিযং, কিস্স সুচিণ্ণস্স অযং ৱিপাকো;

এতাদিসং ব্যসনং পাপুণিত্ৱা, তং তাদিসং পচ্চনুভোস্সতিদ্ধি’’ন্তি.

৪৬০. বুদ্ধপমুখস্স ভিক্খুসঙ্ঘস্স, পূজং অকাসি জনতা উড়াৰং;

তত্ৰস্স চিত্তস্সহু অঞ্ঞথত্তং, ৱাচং অভাসি ফৰুসং অসব্ভং.

৪৬১. সো তং ৱিতক্কং পৱিনোদযিত্ৱা, পীতিং পসাদং পটিলদ্ধা পচ্ছা;

তথাগতং জেতৱনে ৱসন্তং, যাগুযা উপট্ঠাসি সত্তৰত্তং.

৪৬২. তস্স [তং’স (?)] ৱতং তং পন ব্ৰহ্মচৰিযং, তস্স সুচিণ্ণস্স অযং ৱিপাকো;

এতাদিসং ব্যসনং পাপুণিত্ৱা, তং তাদিসং পচ্চনুভোস্সতিদ্ধিং.

৪৬৩. ঠত্ৱান সো ৱস্সসতং ইধেৱ, সব্বেহি কামেহি সমঙ্গিভূতো;

কাযস্স ভেদা অভিসম্পৰাযং, সহব্যতং গচ্ছতি ৱাসৱস্সাতি.

কুমাৰপেতৱত্থু পঞ্চমং.