১৩. উব্বৰিপেতৱত্থু

৩৬৮. অহু ৰাজা ব্ৰহ্মদত্তো, পঞ্চালানং ৰথেসভো;

অহোৰত্তানমচ্চযা, ৰাজা কালমক্ৰুব্বথ [ৰাজা কালঙ্কৰী তদা (সী.)].

৩৬৯. তস্স আড়াহনং গন্ত্ৱা, ভৰিযা কন্দতি উব্বৰী [উপ্পৰি (ক.)];

ব্ৰহ্মদত্তং অপস্সন্তী, ব্ৰহ্মদত্তাতি কন্দতি.

৩৭০. ইসি চ তত্থ আগচ্ছি, সম্পন্নচৰণো মুনি;

সো চ তত্থ অপুচ্ছিত্থ, যে তত্থ সুসমাগতা.

৩৭১. ‘‘কস্স ইদং আড়াহনং, নানাগন্ধসমেৰিতং;

কস্সাযং কন্দতি ভৰিযা, ইতো দূৰগতং পতিং;

ব্ৰহ্মদত্তং অপস্সন্তী, ‘ব্ৰহ্মদত্তা’তি কন্দতি’’.

৩৭২. তে চ তত্থ ৱিযাকংসু, যে তত্থ সুসমাগতা;

‘‘ব্ৰহ্মদত্তস্স ভদন্তে [ভদ্দন্তে (ক.)], ব্ৰহ্মদত্তস্স মাৰিস.

৩৭৩. ‘‘তস্স ইদং আড়াহনং, নানাগন্ধসমেৰিতং;

তস্সাযং কন্দতি ভৰিযা, ইতো দূৰগতং পতিং;

ব্ৰহ্মদত্তং অপস্সন্তী, ‘ব্ৰহ্মদত্তা’তি কন্দতি’’.

৩৭৪. ‘‘ছড়াসীতিসহস্সানি, ব্ৰহ্মদত্তস্সনামকা;

ইমস্মিং আড়াহনে দড্ঢা, তেসং কমনুসোচসী’’তি.

৩৭৫. ‘‘যো ৰাজা চূড়নীপুত্তো, পঞ্চালানং ৰথেসভো;

তং ভন্তে অনুসোচামি, ভত্তাৰং সব্বকামদ’’ন্তি.

৩৭৬. ‘‘সব্বে ৱাহেসুং ৰাজানো, ব্ৰহ্মদত্তস্সনামকা;

সব্বেৱচূড়নীপুত্তা, পঞ্চালানং ৰথেসভা.

৩৭৭. ‘‘সব্বেসং অনুপুব্বেন, মহেসিত্তমকাৰযি;

কস্মা পুৰিমকে হিত্ৱা, পচ্ছিমং অনুসোচসী’’তি.

৩৭৮. ‘‘আতুমে ইত্থিভূতায, দীঘৰত্তায মাৰিস;

যস্সা মে ইত্থিভূতায, সংসাৰে বহুভাসসী’’তি.

৩৭৯. ‘‘অহু ইত্থী অহু পুৰিসো, পসুযোনিম্পি আগমা;

এৱমেতং অতীতানং, পৰিযন্তো ন দিস্সতী’’তি.

৩৮০. ‘‘আদিত্তং ৱত মং সন্তং, ঘতসিত্তংৱ পাৱকং;

ৱাৰিনা ৱিয ওসিঞ্চং, সব্বং নিব্বাপযে দৰং.

৩৮১. ‘‘অব্বহী ৱত মে সল্লং, সোকং হদযনিস্সিতং;

যো মে সোকপৰেতায, পতিসোকং অপানুদি.

৩৮২. ‘‘সাহং অব্বূড়্হসল্লাস্মি, সীতিভূতাস্মি নিব্বুতা;

ন সোচামি ন ৰোদামি, তৱ সুত্ৱা মহামুনী’’তি.

৩৮৩. তস্স তং ৱচনং সুত্ৱা, সমণস্স সুভাসিতং;

পত্তচীৱৰমাদায, পব্বজি অনগাৰিযং.

৩৮৪. সা চ পব্বজিতা সন্তা, অগাৰস্মা অনগাৰিযং;

মেত্তাচিত্তং অভাৱেসি, ব্ৰহ্মলোকূপপত্তিযা.

৩৮৫. গামা গামং ৱিচৰন্তী, নিগমে ৰাজধানিযো;

উৰুৱেলা নাম সো গামো, যত্থ কালমক্ৰুব্বথ.

৩৮৬. মেত্তাচিত্তং আভাৱেত্ৱা, ব্ৰহ্মলোকূপপত্তিযা;

ইত্থিচিত্তং ৱিৰাজেত্ৱা, ব্ৰহ্মলোকূপগা অহূতি.

উব্বৰিপেতৱত্থু তেৰসমং.

উব্বৰিৱগ্গো দুতিযো নিট্ঠিতো.