১২. কণ্ণমুণ্ডপেতিৱত্থু

৩৪৮. ‘‘সোণ্ণসোপানফলকা, সোণ্ণৱালুকসন্থতা;

তত্থ সোগন্ধিযা ৱগ্গূ, সুচিগন্ধা মনোৰমা.

৩৪৯. ‘‘নানাৰুক্খেহি সঞ্ছন্না, নানাগন্ধসমেৰিতা;

নানাপদুমসঞ্ছন্না, পুণ্ডৰীকসমোততা [সমোহতা (ক.)].

৩৫০. ‘‘সুৰভিং সম্পৱাযন্তি, মনুঞ্ঞা মালুতেৰিতা;

হংসকোঞ্চাভিৰুদা চ, চক্কৱক্কাভিকূজিতা.

৩৫১. ‘‘নানাদিজগণাকিণ্ণা, নানাসৰগণাযুতা;

নানাফলধৰা ৰুক্খা, নানাপুপ্ফধৰা ৱনা.

৩৫২. ‘‘ন মনুস্সেসু ঈদিসং, নগৰং যাদিসং ইদং;

পাসাদা বহুকা তুয্হং, সোৱণ্ণৰূপিযামযা;

দদ্দল্লমানা আভেন্তি [আভন্তি (ক.)], সমন্তা চতুৰো দিসা.

৩৫৩. ‘‘পঞ্চ দাসিসতা তুয্হং, যা তেমা পৰিচাৰিকা;

তা [কা (ক.)] কম্বুকাযূৰধৰা [কম্বুকেযূৰধৰা (সী.)], কঞ্চনাৱেড়ভূসিতা.

৩৫৪. ‘‘পল্লঙ্কা বহুকা তুয্হং, সোৱণ্ণৰূপিযামযা;

কদলিমিগসঞ্ছন্না [কাদলিমিগসঞ্ছন্না (সী.)], সজ্জা গোনকসন্থতা.

৩৫৫. ‘‘যত্থ ত্ৱং ৱাসূপগতা, সব্বকামসমিদ্ধিনী;

সম্পত্তাযড্ঢৰত্তায [… ৰত্তিযা (ক.)], ততো উট্ঠায গচ্ছসি.

৩৫৬. ‘‘উয্যানভূমিং গন্ত্ৱান, পোক্খৰঞ্ঞা সমন্ততো;

তস্সা তীৰে তুৱং ঠাসি, হৰিতে সদ্দলে সুভে.

৩৫৭. ‘‘ততো তে কণ্ণমুণ্ডো সুনখো, অঙ্গমঙ্গানি খাদতি;

যদা চ খাযিতা আসি, অট্ঠিসঙ্খলিকা কতা;

ওগাহসি পোক্খৰণিং, হোতি কাযো যথা পুৰে.

৩৫৮. ‘‘ততো ত্ৱং অঙ্গপচ্চঙ্গী [অঙ্গপচ্চঙ্গা (ক.)], সুচাৰু পিযদস্সনা;

ৱত্থেন পাৰুপিত্ৱান, আযাসি মম সন্তিকং.

৩৫৯. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, কণ্ণমুণ্ডো সুনখো তৱঅঙ্গমঙ্গানি খাদতী’’তি.

৩৬০. ‘‘কিমিলাযং [কিম্বিলাযং (সী. স্যা.)] গহপতি, সদ্ধো আসি উপাসকো;

তস্সাহং ভৰিযা আসিং, দুস্সীলা অতিচাৰিনী.

৩৬১. ‘‘সো মং অতিচৰমানায [এৱমাতিচৰমানায (স্যা. পী.)], সামিকো এতদব্ৰৱি;

‘নেতং ছন্নং [নেতং ছন্নং ন (সী.), নেতং ছন্নং নেতং (ক.)] পতিৰূপং, যং ত্ৱং অতিচৰাসি মং’.

৩৬২. ‘‘সাহং ঘোৰঞ্চ সপথং, মুসাৱাদঞ্চ ভাসিসং;

‘নাহং তং অতিচৰামি, কাযেন উদ চেতসা.

৩৬৩. ‘‘‘সচাহং তং অতিচৰামি, কাযেন উদ চেতসা;

কণ্ণমুণ্ডো যং সুনখো, অঙ্গমঙ্গানি খাদতু’.

৩৬৪. ‘‘তস্স কম্মস্স ৱিপাকং, মুসাৱাদস্স চূভযং;

সত্তেৱ ৱস্সসতানি, অনুভূতং যতো হি মে;

কণ্ণমুণ্ডো চ সুনখো, অঙ্গমঙ্গানি খাদতি.

৩৬৫. ‘‘ত্ৱঞ্চ দেৱ বহুকাৰো, অত্থায মে ইধাগতো;

সুমুত্তাহং কণ্ণমুণ্ডস্স, অসোকা অকুতোভযা.

৩৬৬. ‘‘তাহং দেৱ নমস্সামি, যাচামি পঞ্জলীকতা;

ভুঞ্জ অমানুসে কামে, ৰম দেৱ মযা সহা’’তি.

৩৬৭. ‘‘ভুত্তা অমানুসা কামা, ৰমিতোম্হি তযা সহ;

তাহং সুভগে যাচামি, খিপ্পং পটিনযাহি ম’’ন্তি.

কণ্ণমুণ্ডপেতিৱত্থু দ্ৱাদসমং.