১১. সুত্তপেতৱত্থু

৩৪১. ‘‘অহং পুৰে পব্বজিতস্স ভিক্খুনো, সুত্তং অদাসিং উপসঙ্কম্ম যাচিতা;

তস্স ৱিপাকো ৱিপুলফলূপলব্ভতি, বহুকা চ মে উপ্পজ্জৰে [বহূ চ মে উপপজ্জৰে (সী.)] ৱত্থকোটিযো.

৩৪২. ‘‘পুপ্ফাভিকিণ্ণং ৰমিতং [ৰম্মমিদং (ক.)] ৱিমানং, অনেকচিত্তং নৰনাৰিসেৱিতং;

সাহং ভুঞ্জামি চ পাৰুপামি চ, পহূতৱিত্তা ন চ তাৱ খীযতি.

৩৪৩. ‘‘তস্সেৱ কম্মস্স ৱিপাকমন্ৱযা, সুখঞ্চ সাতঞ্চ ইধূপলব্ভতি;

সাহং গন্ত্ৱা পুনদেৱ মানুসং, কাহামি পুঞ্ঞানি নযয্যপুত্ত ম’’ন্তি.

৩৪৪. ‘‘সত্ত তুৱং ৱস্সসতা ইধাগতা,

জিণ্ণা চ ৱুড্ঢা চ তহিং ভৱিস্সসি;

সব্বেৱ তে কালকতা চ ঞাতকা,

কিং তত্থ গন্ত্ৱান ইতো কৰিস্সসী’’তি.

৩৪৫. ‘‘সত্তেৱ ৱস্সানি ইধাগতায মে, দিব্বঞ্চ সুখঞ্চ সমপ্পিতায;

সাহং গন্ত্ৱান পুনদেৱ মানুসং, কাহামি পুঞ্ঞানি নযয্যপুত্ত ম’’ন্তি.

৩৪৬. সো তং গহেত্ৱান পসয্হ বাহাযং, পচ্চানযিত্ৱান থেৰিং সুদুব্বলং;

‘‘ৱজ্জেসি অঞ্ঞম্পি জনং ইধাগতং, ‘কৰোথ পুঞ্ঞানি সুখূপলব্ভতি’’.

৩৪৭. ‘‘দিট্ঠা মযা অকতেন সাধুনা, পেতা ৱিহঞ্ঞন্তি তথেৱ মনুস্সা;

কম্মঞ্চ কত্ৱা সুখৱেদনীযং, দেৱা মনুস্সা চ সুখে ঠিতা পজা’’তি.

সুত্তপেতৱত্থু একাদসমং.