৯. পৰিৱত্তনহাৰৱিভঙ্গো

৩৫. তত্থ কতমো পৰিৱত্তনো হাৰো? ‘‘কুসলাকুসলে ধম্মে’’তি. সম্মাদিট্ঠিস্স পুৰিসপুগ্গলস্স মিচ্ছাদিট্ঠি নিজ্জিণ্ণা ভৱতি. যে চস্স মিচ্ছাদিট্ঠিপচ্চযা উপ্পজ্জেয্যুং অনেকে [অনেকা (ক.)] পাপকা অকুসলা ধম্মা, তে চস্স নিজ্জিণ্ণা হোন্তি. সম্মাদিট্ঠিপচ্চযা চস্স অনেকে কুসলা ধম্মা সম্ভৱন্তি, তে চস্স ভাৱনাপাৰিপূৰিং গচ্ছন্তি. সম্মাসঙ্কপ্পস্স পুৰিসপুগ্গলস্স মিচ্ছাসঙ্কপ্পো নিজ্জিণ্ণো ভৱতি. যে চস্স মিচ্ছাসঙ্কপ্পপচ্চযা উপ্পজ্জেয্যুং অনেকে পাপকা অকুসলা ধম্মা, তে চস্স নিজ্জিণ্ণা হোন্তি. সম্মাসঙ্কপ্পপচ্চযা চস্স অনেকে কুসলা ধম্মা সম্ভৱন্তি. তে চস্স ভাৱনাপাৰিপূৰিং গচ্ছন্তি. এৱং সম্মাৱাচস্স সম্মাকম্মন্তস্স সম্মাআজীৱস্স সম্মাৱাযামস্স সম্মাসতিস্স সম্মাসমাধিস্স সম্মাৱিমুত্তস্স সম্মাৱিমুত্তিঞাণদস্সনস্স পুৰিসপুগ্গলস্স মিচ্ছাৱিমুত্তিঞাণদস্সনং নিজ্জিণ্ণং ভৱতি. যে চস্স মিচ্ছাৱিমুত্তিঞাণদস্সনপচ্চযা উপ্পজ্জেয্যুং অনেকে পাপকা অকুসলা ধম্মা, তে চস্স নিজ্জিণ্ণা হোন্তি. সম্মাৱিমুত্তিঞাণদস্সনপচ্চযা চস্স অনেকে কুসলা ধম্মা সম্ভৱন্তি, তে চস্স ভাৱনাপাৰিপূৰিং গচ্ছন্তি.

৩৬. যস্স ৱা পাণাতিপাতা পটিৱিৰতস্স পাণাতিপাতো পহীনো হোতি. অদিন্নাদানা পটিৱিৰতস্স অদিন্নাদানং পহীনং হোতি. ব্ৰহ্মচাৰিস্স অব্ৰহ্মচৰিযং পহীনং হোতি. সচ্চৱাদিস্স মুসাৱাদো পহীনো হোতি. অপিসুণৱাচস্স পিসুণা ৱাচা পহীনা হোতি. সণ্হৱাচস্স ফৰুসা ৱাচা পহীনা হোতি. কালৱাদিস্স সম্ফপ্পলাপো পহীনো হোতি. অনভিজ্ঝালুস্স [অনভিজ্ঝামনস্স (ক.)] অভিজ্ঝা পহীনা হোতি. অব্যাপন্নচিত্তস্স ব্যাপাদো পহীনো হোতি. সম্মাদিট্ঠিস্স মিচ্ছাদিট্ঠি পহীনা হোতি.

যে চ খো কেচি অৰিযং অট্ঠঙ্গিকং মগ্গং গৰহন্তি, নেসং সন্দিট্ঠিকা সহধম্মিকা গাৰয্হা ৱাদানুৱাদা আগচ্ছন্তি. সম্মাদিট্ঠিঞ্চ তে ভৱন্তো ধম্মং গৰহন্তি. তেন হি যে মিচ্ছাদিট্ঠিকা, তেসং ভৱন্তানং পুজ্জা চ পাসংসা চ. এৱং সম্মাসঙ্কপ্পং সম্মাৱাচং সম্মাকম্মন্তং সম্মাআজীৱং সম্মাৱাযামং সম্মাসতিং সম্মাসমাধিং সম্মাৱিমুত্তিং সম্মাৱিমুত্তিঞাণদস্সনঞ্চ তে ভৱন্তো ধম্মং গৰহন্তি. তেন হি যে মিচ্ছাৱিমুত্তিঞাণদস্সনা, তেসং ভৱন্তানং পুজ্জা চ পাসংসা চ.

যে চ খো কেচি এৱমাহংসু ‘‘ভুঞ্জিতব্বা কামা, পৰিভুঞ্জিতব্বা কামা, আসেৱিতব্বা কামা, নিসেৱিতব্বা কামা, ভাৱযিতব্বা কামা, বহুলীকাতব্বা কামা’’তি. কামেহি ৱেৰমণী তেসং অধম্মো.

যে ৱা পন কেচি এৱমাহংসু ‘‘অত্তকিলমথানুযোগো ধম্মো’’তি. নিয্যানিকো তেসং ধম্মো অধম্মো. যে চ খো কেচি এৱমাহংসু ‘‘দুক্খো ধম্মো’’তি. সুখো তেসং ধম্মো অধম্মো. যথা ৱা পন ভিক্খুনো সব্বসঙ্খাৰেসু অসুভানুপস্সিনো ৱিহৰতো সুভসঞ্ঞা পহীযন্তি. দুক্খানুপস্সিনো ৱিহৰতো সুখসঞ্ঞা পহীযন্তি. অনিচ্চানুপস্সিনো ৱিহৰতো নিচ্চসঞ্ঞা পহীযন্তি. অনত্তানুপস্সিনো ৱিহৰতো অত্তসঞ্ঞা পহীযন্তি. যং যং ৱা পন ধম্মং ৰোচযতি ৱা উপগচ্ছতি ৱা, তস্স তস্স ধম্মস্স যো পটিপক্খো, স্ৱস্স অনিট্ঠতো অজ্ঝাপন্নো ভৱতি. তেনাহ আযস্মা মহাকচ্চাযনো ‘‘কুসলাকুসলধম্মে’’তি.

নিযুত্তো পৰিৱত্তনো হাৰো.