১০. ৱেৱচনহাৰৱিভঙ্গো

৩৭. তত্থ কতমো ৱেৱচনো হাৰো? ‘‘ৱেৱচনানি বহূনী’’তি. যথা একং ভগৱা ধম্মং অঞ্ঞমঞ্ঞেহি ৱেৱচনেহি নিদ্দিসতি. যথাহ ভগৱা –

‘‘আসা চ পিহা অভিনন্দনা চ, অনেকধাতূসু সৰা পতিট্ঠিতা;

অঞ্ঞাণমূলপ্পভৱা পজপ্পিতা, সব্বা মযা ব্যন্তিকতা সমূলিকা’’তি.

আসা নাম ৱুচ্চতি যা ভৱিস্সস্স অত্থস্স আসীসনা [আসিংসনা (সী.)] অৱস্সং আগমিস্সতীতি আসাস্স উপ্পজ্জতি. পিহা নাম যা ৱত্তমানস্স [ৱত্তমানকস্স (সী.)] অত্থস্স পত্থনা, সেয্যতৰং ৱা দিস্ৱা ‘‘এদিসো ভৱেয্য’’ন্তি পিহাস্স উপ্পজ্জতি. অত্থনিপ্ফত্তিপটিপালনা অভিনন্দনা নাম, পিযং ৱা ঞাতিং অভিনন্দতি, পিযং ৱা ধম্মং অভিনন্দতি, অপ্পটিকূলতো ৱা অভিনন্দতি.

অনেকধাতূতি চক্খুধাতু ৰূপধাতু চক্খুৱিঞ্ঞাণধাতু, সোতধাতু সদ্দধাতু সোতৱিঞ্ঞাণধাতু, ঘানধাতু গন্ধধাতু ঘানৱিঞ্ঞাণধাতু, জিৱ্হাধাতু ৰসধাতু জিৱ্হাৱিঞ্ঞাণধাতু, কাযধাতু ফোট্ঠব্বধাতু কাযৱিঞ্ঞাণধাতু, মনোধাতু ধম্মধাতু মনোৱিঞ্ঞাণধাতু.

সৰাতি কেচি ৰূপাধিমুত্তা কেচি সদ্দাধিমুত্তা কেচি গন্ধাধিমুত্তা কেচি ৰসাধিমুত্তা কেচি ফোট্ঠব্বাধিমুত্তা কেচি ধম্মাধিমুত্তা. তত্থ যানি ছ গেহসিতানি দোমনস্সানি যানি চ ছ গেহসিতানি সোমনস্সানি যানি চ ছ নেক্খম্মসিতানি দোমনস্সানি যানি চ ছ নেক্খম্মসিতানি সোমনস্সানি, ইমানি চতুৱীসপদানি তণ্হাপক্খো, তণ্হায এতং ৱেৱচনং. যা ছ উপেক্খা গেহসিতা, অযং দিট্ঠিপক্খো.

৩৮. সাযেৱ পত্থনাকাৰেন ধম্মনন্দী ধম্মপেমং ধম্মজ্ঝোসানন্তি তণ্হায এতং ৱেৱচনং. চিত্তং মনো ৱিঞ্ঞাণন্তি চিত্তস্স এতং ৱেৱচনং. মনিন্দ্ৰিযং মনোধাতু মনাযতনং ৱিজাননাতি মনস্সেতং ৱেৱচনং. পঞ্ঞিন্দ্ৰিযং পঞ্ঞাবলং অধিপঞ্ঞা সিক্খা পঞ্ঞা পঞ্ঞাক্খন্ধো ধম্মৱিচযসম্বোজ্ঝঙ্গো ঞাণং সম্মাদিট্ঠি তীৰণা ৱিপস্সনা ধম্মে ঞাণং অত্থে ঞাণং অন্ৱযে ঞাণং খযে ঞাণং অনুপ্পাদে ঞাণং অনঞ্ঞাতঞ্ঞস্সামীতিন্দ্ৰিযং অঞ্ঞিন্দ্ৰিযং অঞ্ঞাতাৱিন্দ্ৰিযং চক্খু ৱিজ্জা বুদ্ধি ভূৰি মেধা আলোকো, যং ৱা পন যং কিঞ্চি অঞ্ঞংপি এৱং জাতিযং, পঞ্ঞায এতং ৱেৱচনং. পঞ্চিন্দ্ৰিযানি লোকুত্তৰানি, সব্বা পঞ্ঞা. অপি চ আধিপতেয্যট্ঠেন সদ্ধা, আৰম্ভট্ঠেন ৱীৰিযং, অপিলাপনট্ঠেন সতি, অৱিক্খেপট্ঠেন সমাধি, পজাননট্ঠেন পঞ্ঞা.

যথা চ বুদ্ধানুস্সতিযং ৱুত্তং ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা. বলনিপ্ফত্তিগতো ৱেসাৰজ্জপ্পত্তো অধিগতপ্পটিসম্ভিদো চতুযোগৱিপ্পহীনো অগতিগমনৱীতিৱত্তো উদ্ধটসল্লো নিৰূড়্হৱণো মদ্দিতকণ্ডকো নিব্বাপিতপৰিযুট্ঠানো [নিব্বাহিত … (ক.)] বন্ধনাতীতো গন্থৱিনিৱেঠনো অজ্ঝাসযৱীতিৱত্তো ভিন্নন্ধকাৰো চক্খুমা লোকধম্মসমতিক্কন্তো অনুৰোধৱিৰোধৱিপ্পযুত্তো ইট্ঠানিট্ঠেসু ধম্মেসু অসঙ্খেপগতো বন্ধনাতিৱত্তো ঠপিতসঙ্গামো অভিক্কন্ততৰো উক্কাধৰো আলোককৰো পজ্জোতকৰো তমোনুদো ৰণঞ্জহো অপৰিমাণৱণ্ণো অপ্পমেয্যৱণ্ণো অসঙ্খেয্যৱণ্ণো আভংকৰো পভংকৰো ধম্মোভাসপজ্জোতকৰোতি চ বুদ্ধা ভগৱন্তোতি চ বুদ্ধানুস্সতিযা এতং ৱেৱচনং.

যথা চ ধম্মানুস্সতিযং ৱুত্তং স্ৱাক্খাতো ভগৱতা ধম্মো সন্দিট্ঠিকো অকালিকো এহিপস্সিকো ওপনেয্যিকো [ওপনযিকো (সী.)] পচ্চত্তং ৱেদিতব্বো ৱিঞ্ঞূহি. যদিদং মদনিম্মদনো পিপাসৱিনযো আলযসমুগ্ঘাটো ৱট্টূপচ্ছেদো সুঞ্ঞতো অতিদুল্লভো তণ্হক্খযো ৱিৰাগো নিৰোধো নিব্বানং.

‘‘অসঙ্খতং অনতং [অসঙ্খতং নন্ত … (সী.) পস্স সং. নি. ৪.৪০৯] অনাসৱঞ্চ, সচ্চঞ্চ পাৰং নিপুণং সুদুদ্দসং;

অজজ্জৰং ধুৱং অপলোকিতং [অপলোকিযং (সী. ক.)], অনিদস্সনং নিপ্পপঞ্চ সন্তং.

‘‘অমতং পণীতঞ্চ সিৱঞ্চ খেমং, তণ্হাক্খযো অচ্ছৰিযঞ্চ অব্ভুতং;

অনীতিকং অনীতিকধম্মং [নীতিকধম্মমেৱ ৱা (সী. ক.) পস্স সং. নি. ৪.৪০৯], নিব্বানমেতং সুগতেন দেসিতং.

‘‘অজাতং অভূতং অনুপদ্দৱঞ্চ, অকতং অসোকঞ্চ অথো ৱিসোকং;

অনূপসগ্গংনুপসগ্গধম্মং, নিব্বানমেতং সুগতেন দেসিতং.

‘‘গম্ভীৰঞ্চেৱ দুপ্পস্সং, উত্তৰঞ্চ অনুত্তৰং;

অসমং অপ্পটিসমং, জেট্ঠং সেট্ঠন্তি ৱুচ্চতি.

‘‘লেণঞ্চ তাণং অৰণং অনঙ্গণং, অকাচ মেতং ৱিমলন্তি ৱুচ্চতি;

দীপো সুখং অপ্পমাণং পতিট্ঠা, অকিঞ্চনং অপ্পপঞ্চন্তি ৱুত্ত’’ন্তি.

ধম্মানুস্সতিযা এতং ৱেৱচনং.

যথা চ সঙ্ঘানুস্সতিযং ৱুত্তং সুপ্পটিপন্নো উজুপ্পটিপন্নো ঞাযপ্পটিপন্নো সামীচিপ্পটিপন্নো যদিদং চত্তাৰি পুৰিসযুগানি অট্ঠ পুৰিসপুগ্গলা এস ভগৱতো সাৱকসঙ্ঘো আহুনেয্যো পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্স, সীলসম্পন্নো সমাধিসম্পন্নো পঞ্ঞাসম্পন্নো ৱিমুত্তিসম্পন্নো ৱিমুত্তিঞাণদস্সনসম্পন্নো সত্তানং সাৰো সত্তানং মণ্ডো সত্তানং উদ্ধাৰো সত্তানং এসিকা [এসিকো (ক.)] সত্তানং সুৰভিপসূনং পুজ্জো দেৱানঞ্চ মনুস্সানঞ্চাতি সঙ্ঘানুস্সতিযা এতং ৱেৱচনং.

যথা চ সীলানুস্সতিযং ৱুত্তং যানি তানি সীলানি অখণ্ডানি অচ্ছিদ্দানি অসবলানি অকম্মাসানি অৰিযানি অৰিযকন্তানি ভুজিস্সানি ৱিঞ্ঞুপ্পসত্থানি অপৰামট্ঠানি সমাধিসংৱত্তনিকানি, অলঙ্কাৰো চ সীলং উত্তমঙ্গোপসোভণতায, নিধানঞ্চ সীলং সব্বদোভগ্গসমতিক্কমনট্ঠেন, সিপ্পঞ্চ সীলং অক্খণৱেধিতায, ৱেলা চ সীলং অনতিক্কমনট্ঠেন, ধঞ্ঞঞ্চ সীলং দলিদ্দোপচ্ছেদনট্ঠেন [দড়িদ্দো… (সী.)], আদাসো চ সীলং ধম্মৱোলোকনতায, পাসাদো চ সীলং ৱোলোকনট্ঠেন, সব্বভূমানুপৰিৱত্তি চ সীলং অমতপৰিযোসানন্তি সীলানুস্সতিযা এতং ৱেৱচনং.

যথা চ চাগানুস্সতিযং ৱুত্তং যস্মিং সমযে অৰিযসাৱকো অগাৰং অজ্ঝাৱসতি মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতোতি চাগানুস্সতিযা এতং ৱেৱচনং. তেনাহ আযস্মা মহাকচ্চাযনো ‘‘ৱেৱচনানি বহূনী’’তি.

নিযুত্তো ৱেৱচনো হাৰো.