৮. ৱিভত্তিহাৰৱিভঙ্গো

৩৩. তত্থ কতমো ৱিভত্তিহাৰো? ‘‘ধম্মঞ্চ পদট্ঠানং ভূমিঞ্চা’’তি.

দ্ৱে সুত্তানি ৱাসনাভাগিযঞ্চ নিব্বেধভাগিযঞ্চ. দ্ৱে পটিপদা পুঞ্ঞভাগিযা চ ফলভাগিযা চ. দ্ৱে সীলানি সংৱৰসীলঞ্চ পহানসীলঞ্চ, তত্থ ভগৱা ৱাসনাভাগিযং সুত্তং পুঞ্ঞভাগিযায পটিপদায দেসযতি, সো সংৱৰসীলে ঠিতো তেন ব্ৰহ্মচৰিযেন ব্ৰহ্মচাৰী ভৱতি, তত্থ ভগৱা নিব্বেধভাগিযং সুত্তং ফলভাগিযায পটিপদায দেসযতি, সো পহানসীলে ঠিতো তেন ব্ৰহ্মচৰিযেন ব্ৰহ্মচাৰী ভৱতি.

তত্থ কতমং ৱাসনাভাগিযং সুত্তং? ৱাসনাভাগিযং নাম সুত্তং দানকথা সীলকথা সগ্গকথা কামানং আদীনৱো নেক্খম্মে আনিসংসোতি.

তত্থ কতমং নিব্বেধভাগিযং সুত্তং? নিব্বেধভাগিযং নাম সুত্তং যা চতুসচ্চপ্পকাসনা, ৱাসনাভাগিযে সুত্তে নত্থি পজাননা, নত্থি মগ্গো, নত্থি ফলং. নিব্বেধভাগিযে সুত্তে অত্থি পজাননা, অত্থি মগ্গো, অত্থি ফলং. ইমানি চত্তাৰি সুত্তানি. ইমেসং চতুন্নং সুত্তানং দেসনায ফলেন সীলেন ব্ৰহ্মচৰিযেন সব্বতো ৱিচযেন হাৰেন ৱিচিনিত্ৱা যুত্তিহাৰেন যোজযিতব্বা যাৱতিকা ঞাণস্স ভূমি.

৩৪. তত্থ কতমে ধম্মা সাধাৰণা? দ্ৱে ধম্মা সাধাৰণা নামসাধাৰণা ৱত্থুসাধাৰণা চ. যং ৱা পন কিঞ্চি অঞ্ঞম্পি এৱং জাতিযং, মিচ্ছত্তনিযতানং সত্তানং অনিযতানঞ্চ সত্তানং দস্সনপ্পহাতব্বা কিলেসা সাধাৰণা, পুথুজ্জনস্স সোতাপন্নস্স চ কামৰাগব্যাপাদা সাধাৰণা, পুথুজ্জনস্স অনাগামিস্স চ উদ্ধংভাগিযা সংযোজনা সাধাৰণা, যং কিঞ্চি অৰিযসাৱকো লোকিযং সমাপত্তিং সমাপজ্জতি, সব্বা সা অৱীতৰাগেহি [অৱিগতৰাগেহি (ক.)] সাধাৰণা, সাধাৰণা হি ধম্মা এৱং অঞ্ঞমঞ্ঞং পৰং পৰং সকং সকং ৱিসযং নাতিৱত্তন্তি. যোপি ইমেহি ধম্মেহি সমন্নাগতো ন সো তং ধম্মং উপাতিৱত্ততি. ইমে ধম্মা সাধাৰণা.

তত্থ কতমে ধম্মা অসাধাৰণা? যাৱ দেসনং উপাদায গৱেসিতব্বা সেক্খাসেক্খা ভব্বাভব্বাতি, অট্ঠমকস্স সোতাপন্নস্স চ কামৰাগব্যাপাদা সাধাৰণা ধম্মতা অসাধাৰণা, অট্ঠমকস্স অনাগামিস্স চ উদ্ধম্ভাগিযা সংযোজনা সাধাৰণা ধম্মতা অসাধাৰণা. সব্বেসং সেক্খানং নামং সাধাৰণং ধম্মতা অসাধাৰণা. সব্বেসং পটিপন্নকানং নামং সাধাৰণং ধম্মতা অসাধাৰণা. সব্বেসং সেক্খানং সেক্খসীলং সাধাৰণং ধম্মতা অসাধাৰণা. এৱং ৱিসেসানুপস্সিনা হীনুক্কট্ঠমজ্ঝিমং উপাদায গৱেসিতব্বং.

দস্সনভূমি নিযামাৱক্কন্তিযা পদট্ঠানং, ভাৱনাভূমি উত্তৰিকানং ফলানং পত্তিযা পদট্ঠানং, দুক্খা পটিপদা দন্ধাভিঞ্ঞা সমথস্স পদট্ঠানং, সুখা পটিপদা খিপ্পাভিঞ্ঞা ৱিপস্সনায পদট্ঠানং, দানমযং পুঞ্ঞকিৰিযৱত্থু পৰতো ঘোসস্স সাধাৰণং পদট্ঠানং, সীলমযং পুঞ্ঞকিৰিযৱত্থু চিন্তামযিযা পঞ্ঞায সাধাৰণং পদট্ঠানং, ভাৱনামযং পুঞ্ঞকিৰিযৱত্থু ভাৱনামযিযা পঞ্ঞায সাধাৰণং পদট্ঠানং. দানমযং পুঞ্ঞকিৰিযৱত্থু পৰতো চ ঘোসস্স সুতমযিযা চ পঞ্ঞায সাধাৰণং পদট্ঠানং সীলমযং পুঞ্ঞকিৰিযৱত্থু চিন্তামযিযা চ পঞ্ঞায যোনিসো চ মনসিকাৰস্স সাধাৰণং পদট্ঠানং, ভাৱনামযং পুঞ্ঞকিৰিযৱত্থু ভাৱনামযিযা চ পঞ্ঞায সম্মাদিট্ঠিযা চ সাধাৰণং পদট্ঠানং. পতিৰূপদেসৱাসো ৱিৱেকস্স চ সমাধিস্স চ সাধাৰণং পদট্ঠানং, সপ্পুৰিসূপনিস্সযো তিণ্ণঞ্চ অৱেচ্চপ্পসাদানং সমথস্স চ সাধাৰণং পদট্ঠানং, অত্তসম্মাপণিধানং হিৰিযা চ ৱিপস্সনায চ সাধাৰণং পদট্ঠানং, অকুসলপৰিচ্চাগো কুসলৱীমংসায চ সমাধিন্দ্ৰিযস্স চ সাধাৰণং পদট্ঠানং, ধম্মস্ৱাক্খাততা কুসলমূলৰোপনায চ ফলসমাপত্তিযা চ সাধাৰণং পদট্ঠানং, সঙ্ঘসুপ্পটিপন্নতা সঙ্ঘসুট্ঠুতায সাধাৰণং পদট্ঠানং, সত্থুসম্পদা অপ্পসন্নানঞ্চ পসাদায পসন্নানঞ্চ ভিয্যোভাৱায সাধাৰণং পদট্ঠানং, অপ্পটিহতপাতিমোক্খতা দুম্মঙ্কূনঞ্চ পুগ্গলানং নিগ্গহায পেসলানঞ্চ পুগ্গলানং ফাসুৱিহাৰায সাধাৰণং পদট্ঠানং. তেনাহ আযস্মা মহাকচ্চাযনো ‘‘ধম্মঞ্চ পদট্ঠান’’ন্তি.

নিযুত্তো ৱিভত্তি হাৰো.