১৩. সোধনহাৰৱিভঙ্গো

৪৫. তত্থ কতমো সোধনো হাৰো? ‘‘ৱিস্সজ্জিতম্হি পঞ্হে’’তিগাথা. যথা আযস্মা অজিতো পাৰাযনে ভগৱন্তং পঞ্হং পুচ্ছতি –

‘‘কেনস্সু নিৱুতো লোকো, কেনস্সু নপ্পকাসতি;

কিস্সাভিলেপনং ব্ৰূসি, কিংসু তস্স মহব্ভয’’ন্তি.

‘‘অৱিজ্জায নিৱুতো লোকো, [অজিতাতি ভগৱা]

ৱিৱিচ্ছা পমাদা নপ্পকাসতি;

জপ্পাভিলেপনং ব্ৰূমি, দুক্খমস্স মহব্ভয’’ন্তি.

‘‘কেনস্সু নিৱুতো লোকো’’তি পঞ্হে ‘‘অৱিজ্জায নিৱুতো লোকো’’তি ভগৱা পদং সোধেতি, নো চ আৰম্ভং. ‘‘কেনস্সু নপ্পকাসতী’’তি পঞ্হে ‘‘ৱিৱিচ্ছা পমাদা নপ্পকাসতী’’তি ভগৱা পদং সোধেতি, নো চ আৰম্ভং. ‘‘কিস্সাভিলেপনং ব্ৰূসী’’তি পঞ্হে ‘‘জপ্পাভিলেপনং ব্ৰূমী’’তি ভগৱা পদং সোধেতি, নো চ আৰম্ভং. ‘‘কিংসু তস্স মহব্ভয’’ন্তি পঞ্হে ‘‘দুক্খমস্স মহব্ভয’’ন্তি সুদ্ধো আৰম্ভো. তেনাহ ভগৱা ‘‘অৱিজ্জায নিৱুতো লোকো’’তি.

‘‘সৱন্তি সব্বধি সোতা, [ইচ্চাযস্মা অজিতো]

সোতানং কিং নিৱাৰণং;

সোতানং সংৱৰং ব্ৰূহি, কেন সোতা পিধীযৰে’’তি.

‘‘যানি সোতানি লোকস্মিং, [অজিতাতি ভগৱা]

সতি তেসং নিৱাৰণং;

সোতানং সংৱৰং ব্ৰূমি, পঞ্ঞাযেতে পিধীযৰে’’তি.

‘‘সৱন্তি সব্বধি সোতা, সোতানং কিং নিৱাৰণ’’ন্তি পঞ্হে ‘‘যানি সোতানি লোকস্মিং, সতি তেসং নিৱাৰণ’’ন্তি ভগৱা পদং সোধেতি, নো চ আৰম্ভং. ‘‘সোতানং সংৱৰং ব্ৰূহি, কেন সোতা পিধীযৰে’’তি পঞ্হে ‘‘সোতানং সংৱৰং ব্ৰূমি, পঞ্ঞাযেতে পিধীযৰে’’তি সুদ্ধো আৰম্ভো. তেনাহ ভগৱা ‘‘যানি সোতানি লোকস্মি’’ন্তি.

‘‘পঞ্ঞা চেৱ সতি চ, [ইচ্চাযস্মা অজিতো]

নামৰূপঞ্চ [নামং ৰূপঞ্চ (ক.) পস্স সু. নি. ১০৪২] মাৰিস;

এতং মে পুট্ঠো পব্ৰূহি, কত্থেতং উপৰুজ্ঝতী’’তি.

পঞ্হে –

‘‘যমেতং পঞ্হং অপুচ্ছি, অজিত তং ৱদামি তে;

যত্থ নামঞ্চ ৰূপঞ্চ, অসেসং উপৰুজ্ঝতি;

ৱিঞ্ঞাণস্স নিৰোধেন, এত্থেতং উপৰুজ্ঝতী’’তি.

সুদ্ধো আৰম্ভো. তেনাহ ভগৱা ‘‘যমেতং পঞ্হং অপুচ্ছী’’তি. যত্থ এৱং সুদ্ধো আৰম্ভো, সো পঞ্হো ৱিসজ্জিতো ভৱতি. যত্থ পন আৰম্ভো অসুদ্ধো, ন তাৱ সো পঞ্হো ৱিসজ্জিতো ভৱতি. তেনাহ আযস্মা মহাকচ্চাযনো ‘‘ৱিস্সজ্জিতম্হি পঞ্হে’’তি.

নিযুত্তো সোধনো হাৰো.