১৭. পাৰাযনত্থুতিগাথানিদ্দেসো

৯৩. ইদমৱোচ ভগৱা মগধেসু ৱিহৰন্তো পাসাণকে চেতিযে, পৰিচাৰকসোড়সানং [পৰিচাৰিতসোড়সন্নং (স্যা. ক.)] ব্ৰাহ্মণানং অজ্ঝিট্ঠো পুট্ঠো পুট্ঠো পঞ্হং ব্যাকাসি.

ইদমৱোচ ভগৱাতি ইদং পাৰাযনং অৱোচ. ভগৱাতি গাৰৱাধিৱচনমেতং…পে… সচ্ছিকা পঞ্ঞত্তি, যদিদং ভগৱাতি – ইদমৱোচ ভগৱা. মগধেসু ৱিহৰন্তোতি মগধনামকে জনপদে ৱিহৰন্তো ইৰিযন্তো ৱত্তেন্তো পালেন্তো যপেন্তো যাপেন্তো. পাসাণকে চেতিযেতি পাসাণকচেতিযং ৱুচ্চতি বুদ্ধাসনন্তি – মগধেসু ৱিহৰন্তো পাসাণকে চেতিযে. পৰিচাৰকসোড়সানং ব্ৰাহ্মণানন্তি পিঙ্গিযো [সিঙ্গিযো (ক.)] ব্ৰাহ্মণো বাৱৰিস্স ব্ৰাহ্মণস্স পদ্ধো পদ্ধচৰো পৰিচাৰকো [পৰিচাৰিকো (স্যা. ক.)] সিস্সো. পিঙ্গিযেন [তেন (ক.)] তে সোড়সাতি – এৱম্পি পৰিচাৰকসোড়সানং ব্ৰাহ্মণানং. অথ ৱা, তে সোড়স ব্ৰাহ্মণা বুদ্ধস্স ভগৱতো পদ্ধা পদ্ধচৰা পৰিচাৰকা সিস্সাতি – এৱম্পি পৰিচাৰকসোড়সানং ব্ৰাহ্মণানং.

অজ্ঝিট্ঠো পুট্ঠো পুট্ঠো পঞ্হং ব্যাকাসীতি. অজ্ঝিট্ঠোতি অজ্ঝিট্ঠো অজ্ঝেসিতো. পুট্ঠো পুট্ঠোতি পুট্ঠো পুট্ঠো পুচ্ছিতো পুচ্ছিতো যাচিতো যাচিতো অজ্ঝেসিতো অজ্ঝেসিতো পসাদিতো পসাদিতো. পঞ্হং ব্যাকাসীতি পঞ্হং ব্যাকাসি আচিক্খি দেসেসি পঞ্ঞপেসি পট্ঠপেসি ৱিৱৰি ৱিভজি উত্তানীআকাসি পকাসেসীতি – অজ্ঝিট্ঠো পুট্ঠো পুট্ঠো পঞ্হং ব্যাকাসি. তেনেতং ৱুচ্চতি –

‘‘ইদমৱোচ ভগৱা মগধেসু ৱিহৰন্তো পাসাণকে চেতিযে, পৰিচাৰকসোড়সানং ব্ৰাহ্মণানং অজ্ঝিট্ঠো পুট্ঠো পুট্ঠো পঞ্হং ব্যাকাসী’’তি.

৯৪. একমেকস্স চেপি পঞ্হস্স অত্থমঞ্ঞায ধম্মমঞ্ঞায ধম্মানুধম্মং পটিপজ্জেয্য, গচ্ছেয্যেৱ জৰামৰণস্স পাৰং. পাৰঙ্গমনীযা ইমে ধম্মাতি. তস্মা ইমস্স ধম্মপৰিযাযস্স ‘‘পাৰাযন’’ন্তেৱ অধিৱচনং.

একমেকস্স চেপি পঞ্হস্সাতি একমেকস্স চেপি অজিতপঞ্হস্স, একমেকস্স চেপি তিস্সমেত্তেয্যপঞ্হস্স, একমেকস্স চেপি পুণ্ণকপঞ্হস্স, একমেকস্স চেপি মেত্তগূপঞ্হস্স, একমেকস্স চেপি ধোতকপঞ্হস্স, একমেকস্স চেপি উপসীৱপঞ্হস্স, একমেকস্স চেপি নন্দকপঞ্হস্স, একমেকস্স চেপি হেমকপঞ্হস্স, একমেকস্স চেপি তোদেয্যপঞ্হস্স, একমেকস্স চেপি কপ্পপঞ্হস্স, একমেকস্স চেপি জতুকণ্ণিপঞ্হস্স, একমেকস্স চেপি ভদ্ৰাৱুধপঞ্হস্স, একমেকস্স চেপি উদযপঞ্হস্স, একমেকস্স চেপি পোসালপঞ্হস্স, একমেকস্স চেপি মোঘৰাজপঞ্হস্স, একমেকস্স চেপি পিঙ্গিযপঞ্হস্সাতি – একমেকস্স চেপি পঞ্হস্স.

অত্থমঞ্ঞায ধম্মমঞ্ঞাযাতি স্ৱেৱ পঞ্হো ধম্মো, ৱিসজ্জনং [ৱিস্সজ্জনং (ক.)] অত্থোতি অত্থং অঞ্ঞায জানিত্ৱা তুলযিত্ৱা তীৰযিত্ৱা ৱিভাৱযিত্ৱা ৱিভূতং কত্ৱাতি – অত্থমঞ্ঞায. ধম্মমঞ্ঞাযাতি ধম্মং অঞ্ঞায জানিত্ৱা তুলযিত্ৱা তীৰযিত্ৱা ৱিভাৱযিত্ৱা ৱিভূতং কত্ৱাতি – ধম্মমঞ্ঞাযাতি – অত্থমঞ্ঞায ধম্মমঞ্ঞায. ধম্মানুধম্মং পটিপজ্জেয্যাতি সম্মাপটিপদং অনুলোমপটিপদং অপচ্চনীকপটিপদং অন্ৱত্থপটিপদং ধম্মানুধম্মপটিপদং পটিপজ্জেয্যাতি – ধম্মানুধম্মং পটিপজ্জেয্য. গচ্ছেয্যেৱ জৰামৰণস্স পাৰন্তি জৰামৰণস্স পাৰং ৱুচ্চতি অমতং নিব্বানং. যো সো সব্বসঙ্খাৰসমথো সব্বূপধিপ্পটিনিস্সগ্গো তণ্হক্খযো ৱিৰাগো নিৰোধো নিব্বানং. গচ্ছেয্যেৱ জৰামৰণস্স পাৰন্তি জৰামৰণস্স পাৰং গচ্ছেয্য, পাৰং অধিগচ্ছেয্য, পাৰং অধিফস্সেয্য, পাৰং সচ্ছিকৰেয্যাতি – গচ্ছেয্যেৱ জৰামৰণস্স পাৰং. পাৰঙ্গমনীযা ইমে ধম্মাতি ইমে ধম্মা পাৰঙ্গমনীযা. পাৰং পাপেন্তি পাৰং সম্পাপেন্তি পাৰং সমনুপাপেন্তি, জৰামণস্স তৰণায [তাৰণায (স্যা.)] সংৱত্তন্তীতি – পাৰঙ্গমনীযা ইমে ধম্মাতি.

তস্মা ইমস্স ধম্মপৰিযাযস্সাতি. তস্মাতি তস্মা তংকাৰণা তংহেতু তপ্পচ্চযা তংনিদানাতি – তস্মা. ইমস্স ধম্মপৰিযাযস্সাতি ইমস্স পাৰাযনস্সাতি – তস্মা ইমস্স ধম্মপৰিযাযস্স. পাৰাযনন্তেৱ অধিৱচনন্তি পাৰং ৱুচ্চতি অমতং নিব্বানং…পে… নিৰোধো নিব্বানং. অযনং ৱুচ্চতি মগ্গো, সেয্যথিদং – সম্মাদিট্ঠি…পে… সম্মাসমাধি. অধিৱচনন্তি সঙ্খা সমঞ্ঞা পঞ্ঞত্তি ৱোহাৰো নামং নামকম্মং নামধেয্যং নিৰুত্তি ব্যঞ্জনং অভিলাপোতি – পাৰাযনন্তেৱ অধিৱচনং. তেনেতং ৱুচ্চতি –

‘‘একমেকস্স চেপি পঞ্হস্স অত্থমঞ্ঞায ধম্মমঞ্ঞায ধম্মানুধম্মং পটিপজ্জেয্য, গচ্ছেয্যেৱ জৰামৰণস্স পাৰং. পাৰঙ্গমনীযা ইমে ধম্মাতি. তস্মা ইমস্স ধম্মপৰিযাযস্স ‘পাৰাযন’ন্তেৱ অধিৱচন’’ন্তি.

৯৫. অজিতো তিস্সমেত্তেয্যো, পুণ্ণকো অথ মেত্তগূ;

ধোতকো উপসীৱো চ, নন্দো চ অথ হেমকো.

৯৬. তোদেয্যকপ্পা দুভযো, জতুকণ্ণী চ পণ্ডিতো;

ভদ্ৰাৱুধো উদযো চ, পোসালো চাপি ব্ৰাহ্মণো;

মোঘৰাজা চ মেধাৱী, পিঙ্গিযো চ মহাইসি.

৯৭. এতে বুদ্ধং উপাগচ্ছুং, সম্পন্নচৰণং ইসিং;

পুচ্ছন্তা নিপুণে পঞ্হে, বুদ্ধসেট্ঠং উপাগমুং.

এতে বুদ্ধং উপাগচ্ছুন্তি. এতেতি সোড়স পাৰাযনিযা ব্ৰাহ্মণা. বুদ্ধোতি যো সো ভগৱা সযম্ভূ অনাচৰিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পত্তো বলেসু চ ৱসীভাৱং. বুদ্ধোতি কেনট্ঠেন বুদ্ধো? বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো, সব্বঞ্ঞুতায বুদ্ধো, সব্বদস্সাৱিতায বুদ্ধো, অভিঞ্ঞেয্যতায বুদ্ধো, ৱিসৱিতায বুদ্ধো, খীণাসৱসঙ্খাতেন বুদ্ধো, নিৰুপলেপসঙ্খাতেন বুদ্ধো, একন্তৱীতৰাগোতি বুদ্ধো, একন্তৱীতদোসোতি বুদ্ধো, একন্তৱীতমোহোতি বুদ্ধো, একন্তনিক্কিলেসোতি বুদ্ধো, একাযনমগ্গং গতোতি বুদ্ধো, একো অনুত্তৰং সম্মাসম্বোধিং অভিসম্বুদ্ধোতি বুদ্ধো, অবুদ্ধিৱিহতত্তা বুদ্ধিপটিলাভাতি বুদ্ধো. বুদ্ধোতি নেতং নামং মাতৰা কতং ন পিতৰা কতং ন ভাতৰা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্ৰাহ্মণেহি কতং ন দেৱতাহি কতং. ৱিমোক্খন্তিকমেতং বুদ্ধানং ভগৱন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি, যদিদং বুদ্ধোতি. এতে বুদ্ধং উপাগচ্ছুন্তি এতে বুদ্ধং উপাগমিংসু উপসঙ্কমিংসু পযিৰুপাসিংসু পৰিপুচ্ছিংসু পৰিপঞ্হিংসূতি – এতে বুদ্ধং উপাগচ্ছুং.

সম্পন্নচৰণং ইসিন্তি চৰণং ৱুচ্চতি সীলাচাৰনিব্বত্তি. সীলসংৱৰোপি চৰণং, ইন্দ্ৰিযসংৱৰোপি চৰণং, ভোজনে মত্তঞ্ঞুতাপি চৰণং, জাগৰিযানুযোগোপি চৰণং, সত্তপি সদ্ধম্মা চৰণং, চত্তাৰিপি ঝানানি চৰণং. সম্পন্নচৰণন্তি সম্পন্নচৰণং সেট্ঠচৰণং ৱিসেট্ঠচৰণং [ৱিসিট্ঠচৰণং (ক.)] পামোক্খচৰণং উত্তমচৰণং পৱৰচৰণং. ইসীতি ইসি ভগৱা মহন্তং সীলক্খন্ধং এসী গৱেসী পৰিযেসীতি ইসি…পে… মহেসক্খেহি ৱা সত্তেহি এসিতো গৱেসিতো পৰিযেসিতো – ‘‘কহং বুদ্ধো, কহং ভগৱা, কহং দেৱদেৱো কহং নৰাসভো’’তি – ইসীতি – সম্পন্নচৰণং ইসিং.

পুচ্ছন্তা নিপুণে পঞ্হেতি. পুচ্ছন্তাতি পুচ্ছন্তা যাচন্তা অজ্ঝেসন্তা পসাদেন্তা. নিপুণে পঞ্হেতি গম্ভীৰে দুদ্দসে দুৰনুবোধে সন্তে পণীতে অতক্কাৱচৰে নিপুণে পণ্ডিতৱেদনীযে পঞ্হেতি – পুচ্ছন্তা নিপুণে পঞ্হে.

বুদ্ধসেট্ঠং উপাগমুন্তি. বুদ্ধোতি যো সো ভগৱা…পে… সচ্ছিকা পঞ্ঞত্তি, যদিদং বুদ্ধোতি. সেট্ঠন্তি অগ্গং সেট্ঠং ৱিসেট্ঠং পামোক্খং উত্তমং পৱৰং বুদ্ধং উপাগমুং উপাগমিংসু উপসঙ্কমিংসু পযিৰুপাসিংসু পৰিপুচ্ছিংসু পৰিপঞ্হিংসূতি – বুদ্ধসেট্ঠং উপাগমুং. তেনেতং ৱুচ্চতি –

‘‘এতে বুদ্ধং উপাগচ্ছুং, সম্পন্নচৰণং ইসিং;

পুচ্ছন্তা নিপুণে পঞ্হে, বুদ্ধসেট্ঠং উপাগমু’’ন্তি.

৯৮. তেসং বুদ্ধো পব্যাকাসি, পঞ্হং পুট্ঠো যথাতথং;

পঞ্হানং ৱেয্যাকৰণেন, তোসেসি ব্ৰাহ্মণে মুনি.

তেসং বুদ্ধো পব্যাকাসীতি. তেসন্তি সোড়সানং পাৰাযনিযানং ব্ৰাহ্মণানং. বুদ্ধোতি যো সো ভগৱা…পে… সচ্ছিকা পঞ্ঞত্তি, যদিদং বুদ্ধোতি. পব্যাকাসীতি তেসং বুদ্ধো পব্যাকাসি আচিক্খি দেসেসি পঞ্ঞপেসি পট্ঠপেসি ৱিৱৰি ৱিভজি উত্তানীঅকাসি পকাসেসীতি – তেসং বুদ্ধো পব্যাকাসি.

পঞ্হং পুট্ঠো যথাতথন্তি. পঞ্হং পুট্ঠোতি পঞ্হং পুট্ঠো পুচ্ছিতো যাচিতো অজ্ঝেসিতো পসাদিতো. যথাতথন্তি যথা আচিক্খিতব্বং তথা আচিক্খি, যথা দেসিতব্বং তথা দেসেসি, যথা পঞ্ঞপেতব্বং তথা পঞ্ঞপেসি, যথা পট্ঠপেতব্বং তথা পট্ঠপেসি, যথা ৱিৱৰিতব্বং তথা ৱিৱৰি, যথা ৱিভজিতব্বং তথা ৱিভজি, যথা উত্তানীকাতব্বং তথা উত্তানীঅকাসি, যথা পকাসিতব্বং তথা পকাসেসীতি – পঞ্হং পুট্ঠো যথাতথং.

পঞ্হানং ৱেয্যাকৰণেনাতি পঞ্হানং ৱেয্যাকৰণেন আচিক্খনেন দেসনেন পঞ্ঞপনেন পট্ঠপনেন ৱিৱৰণেন ৱিভজনেন উত্তানীকম্মেন পকাসনেনাতি – পঞ্হানং ৱেয্যাকৰণেন.

তোসেসি ব্ৰাহ্মণে মুনীতি. তোসেসীতি তোসেসি ৱিতোসেসি পসাদেসি আৰাধেসি অত্তমনে অকাসি. ব্ৰাহ্মণেতি সোড়স পাৰাযনিযে ব্ৰাহ্মণে. মুনীতি মোনং ৱুচ্চতি ঞাণং…পে… সঙ্গজালমতিচ্চ সো মুনীতি – তোসেসি ব্ৰাহ্মণে মুনি. তেনেতং ৱুচ্চতি –

‘‘তেসং বুদ্ধো পব্যাকাসি, পঞ্হং পুট্ঠো যথাতথং;

পঞ্হানং ৱেয্যাকৰণেন, তোসেসি ব্ৰাহ্মণে মুনী’’তি.

৯৯. তে তোসিতা চক্খুমতা, বুদ্ধেনাদিচ্চবন্ধুনা;

ব্ৰহ্মচৰিযমচৰিংসু, ৱৰপঞ্ঞস্স সন্তিকে.

তে তোসিতা চক্খুমতাতি. তেতি সোড়স পাৰাযনিযা ব্ৰাহ্মণা. তোসিতাতি তোসিতা ৱিতোসিতা পসাদিতা আৰাধিতা অত্তমনা কতাতি – তে তোসিতা. চক্খুমতাতি ভগৱা পঞ্চহি চক্খূহি চক্খুমা – মংসচক্খুনাপি চক্খুমা, দিব্বচক্খুনাপি চক্খুমা, পঞ্ঞাচক্খুনাপি চক্খুমা, বুদ্ধচক্খুনাপি চক্খুমা, সমন্তচক্খুনাপি চক্খুমা. কথং ভগৱা মংসচক্খুনাপি চক্খুমা…পে… এৱং ভগৱা সমন্তচক্খুনাপি চক্খুমাতি – তে তোসিতা চক্খুমতা.

বুদ্ধেনাদিচ্চবন্ধুনাতি. বুদ্ধোতি যো সো ভগৱা…পে… সচ্ছিকা পঞ্ঞত্তি, যদিদং বুদ্ধোতি. আদিচ্চবন্ধুনাতি আদিচ্চো ৱুচ্চতি সূৰিযো. সো গোতমো গোত্তেন, ভগৱাপি গোতমো গোত্তেন, ভগৱা সূৰিযস্স গোত্তঞাতকো গোত্তবন্ধু. তস্মা বুদ্ধো আদিচ্চবন্ধূতি – বুদ্ধেনাদিচ্চবন্ধুনা.

ব্ৰহ্মচৰিযমচৰিংসূতি ব্ৰহ্মচৰিযং ৱুচ্চতি অসদ্ধম্মসমাপত্তিযা আৰতি ৱিৰতি পটিৱিৰতি ৱেৰমণী ৱিৰমণং অকিৰিযা অকৰণং অনজ্ঝাপত্তি ৱেলাঅনতিক্কমো সেতুঘাতো. অপি চ, নিপ্পৰিযাযৱসেন ব্ৰহ্মচৰিযং ৱুচ্চতি অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি. ব্ৰহ্মচৰিযমচৰিংসূতি ব্ৰহ্মচৰিযং চৰিংসু অচৰিংসু সমাদায ৱত্তিংসূতি – ব্ৰহ্মচৰিযমচৰিংসু.

ৱৰপঞ্ঞস্স সন্তিকেতি ৱৰপঞ্ঞস্স অগ্গপঞ্ঞস্স সেট্ঠপঞ্ঞস্স ৱিসেট্ঠপঞ্ঞস্স পামোক্খপঞ্ঞস্স উত্তমপঞ্ঞস্স পৱৰপঞ্ঞস্স. সন্তিকেতি সন্তিকে সামন্তা আসন্নে অৱিদূৰে উপকট্ঠেতি – ৱৰপঞ্ঞস্স সন্তিকে. তেনেতং ৱুচ্চতি –

‘‘তে তোসিতা চক্খুমতা, বুদ্ধেনাদিচ্চবন্ধুনা;

ব্ৰহ্মচৰিযমচৰিংসু, ৱৰপঞ্ঞস্স সন্তিকে’’তি.

১০০. একমেকস্স পঞ্হস্স, যথা বুদ্ধেন দেসিতং;

তথা যো পটিপজ্জেয্য, গচ্ছে পাৰং অপাৰতো.

একমেকস্স পঞ্হস্সাতি একমেকস্স অজিতপঞ্হস্স, একমেকস্স তিস্সমেত্তেয্যপঞ্হস্স…পে… একমেকস্স পিঙ্গিযপঞ্হস্সাতি – একমেকস্স পঞ্হস্স.

যথা বুদ্ধেন দেসিতন্তি. বুদ্ধোতি যো সো ভগৱা সযম্ভূ…পে… সচ্ছিকা পঞ্ঞত্তি, যদিদং বুদ্ধোতি. যথা বুদ্ধেন দেসিতন্তি যথা বুদ্ধেন আচিক্খিতং দেসিতং পঞ্ঞপিতং পট্ঠপিতং ৱিৱৰিতং ৱিভজিতং [ৱিভত্তং (স্যা.)] উত্তানীকতং পকাসিতন্তি – যথা বুদ্ধেন দেসিতং.

তথা যো পটিপজ্জেয্যাতি সম্মাপটিপদং অনুলোমপটিপদং অপচ্চনীকপটিপদং অন্ৱত্থপটিপদং ধম্মানুধম্মপটিপদং পটিপজ্জেয্যাতি – তথা যো পটিপজ্জেয্য.

গচ্ছে পাৰং অপাৰতোতি পাৰং ৱুচ্চতি অমতং নিব্বানং…পে… নিৰোধো নিব্বানং; অপাৰং ৱুচ্চন্তি কিলেসা চ খন্ধা চ অভিসঙ্খাৰা চ. গচ্ছে পাৰং অপাৰতোতি অপাৰতো পাৰং গচ্ছেয্য, পাৰং অধিগচ্ছেয্য, পাৰং ফস্সেয্য, পাৰং সচ্ছিকৰেয্যাতি – গচ্ছে পাৰং অপাৰতো. তেনেতং ৱুচ্চতি –

‘‘একমেকস্স পঞ্হস্স, যথা বুদ্ধেন দেসিতং;

তথা যো পটিপজ্জেয্য, গচ্ছে পাৰং অপাৰতো’’তি.

১০১. অপাৰা পাৰং গচ্ছেয্য, ভাৱেন্তো মগ্গমুত্তমং;

মগ্গো সো পাৰং গমনায, তস্মা পাৰাযনং ইতি.

অপাৰা পাৰং গচ্ছেয্যাতি অপাৰং ৱুচ্চন্তি কিলেসা চ খন্ধা চ অভিসঙ্খাৰা চ; পাৰং ৱুচ্চতি অমতং নিব্বানং…পে… তণ্হক্খযো ৱিৰাগো নিৰোধো নিব্বানং. অপাৰা পাৰং গচ্ছেয্যাতি অপাৰা পাৰং গচ্ছেয্য, পাৰং অধিগচ্ছেয্য, পাৰং ফস্সেয্য, পাৰং সচ্ছিকৰেয্যাতি – অপাৰা পাৰং গচ্ছেয্য.

ভাৱেন্তো মগ্গমুত্তমন্তি মগ্গমুত্তমং ৱুচ্চতি অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. মগ্গমুত্তমন্তি মগ্গং অগ্গং সেট্ঠং ৱিসেট্ঠং পামোক্খং উত্তমং পৱৰং. ভাৱেন্তোতি ভাৱেন্তো আসেৱন্তো বহুলীকৰোন্তোতি – ভাৱেন্তো মগ্গমুত্তমং.

মগ্গো সো পাৰং গমনাযাতি –

মগ্গো পন্থো পথো পজ্জো [অদ্ধো (ক.)], অঞ্জসং ৱটুমাযনং;

নাৱা উত্তৰসেতু চ, কুল্লো চ ভিসি সঙ্কমো [সঙ্গমো (স্যা. ক.) পস্স-ধাতুমালাযং মগ্গধাতুৱণ্ণনাযং].

পাৰং গমনাযাতি পাৰং গমনায পাৰং সম্পাপনায পাৰং সমনুপাপনায জৰামৰণস্স তৰণাযাতি – মগ্গো সো পাৰং গমনায.

তস্মা পাৰাযনং ইতীতি. তস্মাতি তস্মা তংকাৰণা তংহেতু তপ্পচ্চযা তংনিদানা. পাৰং ৱুচ্চতি অমতং নিব্বানং…পে… নিৰোধো নিব্বানং. অযনং ৱুচ্চতি মগ্গো. ইতীতি পদসন্ধি…পে… পদানুপুব্বতাপেতং ইতীতি – তস্মা পাৰাযনং ইতি. তেনেতং ৱুচ্চতি –

‘‘অপাৰা পাৰং গচ্ছেয্য, ভাৱেন্তো মগ্গমুত্তমং;

মগ্গো সো পাৰং গমনায, তস্মা পাৰাযনং ইতী’’তি.

পাৰাযনত্থুতিগাথানিদ্দেসো সত্তৰসমো.