১০. কপ্পমাণৱপুচ্ছানিদ্দেসো

৬১. মজ্ঝে সৰস্মিং তিট্ঠতং, [ইচ্চাযস্মা কপ্পো]

ওঘে জাতে মহব্ভযে;

জৰামচ্চুপৰেতানং, দীপং পব্ৰূহি মাৰিস;

ত্ৱঞ্চ মে দীপমক্খাহি, যথাযিদং নাপৰং সিযা.

মজ্ঝে সৰস্মিং তিট্ঠতন্তি সৰো ৱুচ্চতি সংসাৰো আগমনং গমনং গমনাগমনং কালং গতি ভৱাভৱো চুতি চ উপপত্তি চ নিব্বত্তি চ ভেদো চ জাতি চ জৰা চ মৰণঞ্চ. সংসাৰস্স পুৰিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি; মজ্ঝেৱ সংসাৰে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তা.

কথং সংসাৰস্স পুৰিমা কোটি ন পঞ্ঞাযতি? এত্তকা জাতিযো ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি জাতিসতানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি জাতিসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি জাতিসতসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকা জাতিকোটিযো ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি জাতিকোটিসতানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি জাতিকোটিসহস্সানি ৱট্টং ৱত্তি, ততো পৰং ন ৱত্ততীতি, হেৱং নত্থি. এৱম্পি সংসাৰস্স পুৰিমা কোটি ন পঞ্ঞাযতি. এত্তকানি জাতিকোটিসতসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি.

এত্তকানি ৱস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি ৱস্সসতানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি ৱস্সসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি ৱস্সসতসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকা ৱস্সকোটিযো ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি ৱস্সকোটিসতানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি ৱস্সকোটিসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি ৱস্সকোটিসতসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি.

এত্তকানি কপ্পানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি কপ্পসতানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি কপ্পসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি কপ্পসতসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকা কপ্পকোটিযো ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি কপ্পকোটিসতানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি কপ্পকোটিসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি. এত্তকানি কপ্পকোটিসতসহস্সানি ৱট্টং ৱত্তি, ততো পৰং ন ৱত্ততীতি হেৱং নত্থি, এৱম্পি সংসাৰস্স পুৰিমা কোটি ন পঞ্ঞাযতি.

ৱুত্তঞ্হেতং ভগৱতা – ‘‘অনমতগ্গোযং, ভিক্খৱে, সংসাৰো, পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. এৱং দীঘৰত্তং খো, ভিক্খৱে, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী ৱড্ঢিতা [কটসীৱৱড্ঢিতং (স্যা.) পস্স সং. নি. ২.১২৪]. যাৱঞ্চিদং, ভিক্খৱে, অলমেৱ সব্বসঙ্খাৰেসু নিব্বিন্দিতুং অলং ৱিৰজ্জিতুং অলং ৱিমুচ্চিতু’’ন্তি. এৱম্পি সংসাৰস্স পুৰিমা কোটি ন পঞ্ঞাযতি.

কথং সংসাৰস্স পচ্ছিমা কোটি ন পঞ্ঞাযতি? এত্তকা জাতিযো ৱট্টং ৱত্তিস্সতি, ততো পৰং ন ৱত্তিস্সতীতি হেৱং নত্থি, এৱম্পি সংসাৰস্স পচ্ছিমা কোটি ন পঞ্ঞাযতি. এত্তকানি জাতিসতানি, এত্তকানি জাতিসহস্সানি, এত্তকানি জাতিসতসহস্সানি, এত্তকা জাতিকোটিযো, এত্তকানি জাতিকোটিসতানি, এত্তকানি জাতিকোটিসহস্সানি, এত্তকানি জাতিকোটিসতসহস্সানি, এত্তকানি ৱস্সানি, এত্তকানি ৱস্সসতানি, এত্তকানি ৱস্সসহস্সানি, এত্তকানি ৱস্সসতসহস্সানি, এত্তকা ৱস্সকোটিযো, এত্তকানি ৱস্সকোটিসতানি, এত্তকানি ৱস্সকোটিসহস্সানি, এত্তকানি ৱস্সকোটিসতসহস্সানি, এত্তকানি কপ্পানি, এত্তকানি কপ্পসতানি, এত্তকানি কপ্পসহস্সানি, এত্তকানি কপ্পসতসহস্সানি, এত্তকা কপ্পকোটিযো, এত্তকানি কপ্পকোটিসতানি, এত্তকানি কপ্পকোটিসহস্সানি, এত্তকানি কপ্পকোটিসতসহস্সানি ৱট্টং ৱত্তিস্সতি, ততো পৰং ন ৱত্তিস্সতীতি হেৱং নত্থি, এৱম্পি সংসাৰস্স পচ্ছিমা কোটি ন পঞ্ঞাযতি. এৱম্পি সংসাৰস্স পুৰিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি, মজ্ঝেৱ সংসাৰে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তাতি – মজ্ঝে সৰস্মিং তিট্ঠতং. ইচ্চাযস্মা কপ্পোতি. ইচ্চাতি পদসন্ধি…পে…. আযস্মাতি পিযৱচনং…পে…. কপ্পোতি তস্স ব্ৰাহ্মণস্স নামং…পে… অভিলাপোতি – ইচ্চাযস্মা কপ্পো.

ওঘে জাতে মহব্ভযেতি কামোঘে ভৱোঘে দিট্ঠোঘে অৱিজ্জোঘে জাতে সঞ্জাতে নিব্বত্তে অভিনিব্বত্তে পাতুভূতে. মহব্ভযেতি জাতিভযে জৰাভযে ব্যাধিভযে মৰণভযেতি – ওঘে জাতে মহব্ভযে.

জৰামচ্চুপৰেতানন্তি জৰায ফুট্ঠানং পৰেতানং সমোহিতানং সমন্নাগতানং. মচ্চুনা ফুট্ঠানং পৰেতানং সমোহিতানং সমন্নাগতানং, জাতিযা অনুগতানং জৰায অনুসটানং ব্যাধিনা অভিভূতানং মৰণেন অব্ভাহতানং অতাণানং অলেণানং অসৰণানং অসৰণীভূতানন্তি – জৰামচ্চুপৰেতানং.

দীপং পব্ৰূহি মাৰিসাতি দীপং তাণং লেণং সৰণং গতিং পৰাযনং [গতিপৰাযনং (স্যা.) এৱমুপৰিপি] ব্ৰূহি আচিক্খাহি দেসেহি পঞ্ঞপেহি পট্ঠপেহি ৱিৱৰাহি ৱিভজাহি উত্তানীকৰোহি পকাসেহি. মাৰিসাতি পিযৱচনং গৰুৱচনং সগাৰৱসপ্পতিস্সাধিৱচনমেতং মাৰিসাতি – দীপং পব্ৰূহি মাৰিস.

ত্ৱঞ্চ মে দীপমক্খাহীতি. ত্ৱন্তি ভগৱন্তং ভণতি. দীপমক্খাহীতি দীপং তাণং লেণং সৰণং গতিং পৰাযনং অক্খাহি আচিক্খাহি দেসেহি পঞ্ঞপেহি পট্ঠপেহি ৱিৱৰাহি ৱিভজাহি উত্তানীকৰোহি পকাসেহীতি – ত্ৱঞ্চ মে দীপমক্খাহি.

যথাযিদং নাপৰং সিযাতি যথযিদং দুক্খং ইধেৱ নিৰুজ্ঝেয্য ৱূপসমেয্য অত্থং গচ্ছেয্য পটিপ্পস্সম্ভেয্য পুনপটিসন্ধিকং দুক্খং ন নিব্বত্তেয্য, কামধাতুযা ৱা ৰূপধাতুযা ৱা অৰূপধাতুযা ৱা কামভৱে ৱা ৰূপভৱে ৱা অৰূপভৱে ৱা সঞ্ঞাভৱে ৱা অসঞ্ঞাভৱে ৱা নেৱসঞ্ঞানাসঞ্ঞাভৱে ৱা একৱোকাৰভৱে ৱা চতুৱোকাৰভৱে ৱা পঞ্চৱোকাৰভৱে ৱা পুনগতিযা ৱা উপপত্তিযা ৱা পটিসন্ধিযা ৱা ভৱে ৱা সংসাৰে ৱা ৱট্টে ৱা ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্য. ইধেৱ নিৰুজ্ঝেয্য ৱূপসমেয্য অত্থং গচ্ছেয্য পটিপ্পস্সম্ভেয্যাতি – যথাযিদং নাপৰং সিযা. তেনাহ সো ব্ৰাহ্মণো –

‘‘মজ্ঝে সৰস্মিং তিট্ঠতং, [ইচ্চাযস্মা কপ্পো]

ওঘে জাতে মহব্ভযে;

জৰামচ্চুপৰেতানং, দীপং পব্ৰূহি মাৰিস;

ত্ৱঞ্চ মে দীপমক্খাহি, যথাযিদং নাপৰং সিযা’’তি.

৬২. মজ্ঝে সৰস্মিং তিট্ঠতং, [কপ্পাতি ভগৱা]

ওঘে জাতে মহব্ভযে;

জৰামচ্চুপৰেতানং, দীপং পব্ৰূমি কপ্প তে.

মজ্ঝে সৰস্মিং তিট্ঠতন্তি সৰো ৱুচ্চতি সংসাৰো আগমনং গমনং গমনাগমনং কালং গতি ভৱাভৱো, চুতি চ উপপত্তি চ নিব্বত্তি চ ভেদো চ জাতি চ জৰা চ মৰণঞ্চ. সংসাৰস্স পুৰিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি. মজ্ঝেৱ সংসাৰে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তা.

কথং সংসাৰস্স পুৰিমা কোটি ন পঞ্ঞাযতি…পে… এৱং সংসাৰস্স পুৰিমা কোটি ন পঞ্ঞাযতি. কথং সংসাৰস্স পচ্ছিমা কোটি ন পঞ্ঞাযতি…পে… এৱং সংসাৰস্স পচ্ছিমা কোটি ন পঞ্ঞাযতি. এৱং সংসাৰস্স পুৰিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি. মজ্ঝেৱ সংসাৰে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তাতি – মজ্ঝে সৰস্মিং তিট্ঠতং. কপ্পাতি ভগৱাতি. কপ্পাতি ভগৱা তং ব্ৰাহ্মণং নামেন আলপতি. ভগৱাতি গাৰৱাধিৱচনমেতং…পে… সচ্ছিকা পঞ্ঞত্তি, যদিদং ভগৱাতি – কপ্পাতি ভগৱা.

ওঘে জাতে মহব্ভযেতি কামোঘে ভৱোঘে দিট্ঠোঘে অৱিজ্জোঘে জাতে সঞ্জাতে নিব্বত্তে অভিনিব্বত্তে পাতুভূতে. মহব্ভযেতি জাতিভযে জৰাভযে ব্যাধিভযে মৰণভযেতি – ওঘে জাতে মহব্ভযে.

জৰামচ্চুপৰেতানন্তি জৰায ফুট্ঠানং পৰেতানং সমোহিতানং সমন্নাগতানং, মচ্চুনা ফুট্ঠানং পৰেতানং সমোহিতানং সমন্নাগতানং জাতিযা অনুগতানং জৰায অনুসটানং ব্যাধিনা অভিভূতানং মৰণেন অব্ভাহতানং অতাণানং অলেণানং অসৰণানং অসৰণীভূতানন্তি – জৰামচ্চুপৰেতানং.

দীপং পব্ৰূমি কপ্প তেতি দীপং তাণং লেণং সৰণং গতিং পৰাযনং ব্ৰূমি আচিক্খামি দেসেমি পঞ্ঞপেমি পট্ঠপেমি ৱিৱৰামি ৱিভজামি উত্তানীকৰোমি পকাসেমীতি – দীপং পব্ৰূমি কপ্প তে. তেনাহ ভগৱা –

‘‘মজ্ঝে সৰস্মিং তিট্ঠতং, [কপ্পাতি ভগৱা]

ওঘে জাতে মহব্ভযে;

জৰামচ্চুপৰেতানং, দীপং পব্ৰূমি কপ্প তে’’তি.

৬৩. অকিঞ্চনং অনাদানং, এতং দীপং অনাপৰং;

নিব্বানং ইতি নং ব্ৰূমি, জৰামচ্চুপৰিক্খযং.

অকিঞ্চনং অনাদানন্তি. কিঞ্চনন্তি – ৰাগকিঞ্চনং দোসকিঞ্চনং মোহকিঞ্চনং মানকিঞ্চনং দিট্ঠিকিঞ্চনং কিলেসকিঞ্চনং দুচ্চৰিতকিঞ্চনং; কিঞ্চনপ্পহানং কিঞ্চনৱূপসমং [কিঞ্চনৱূপসমো (স্যা.) এৱমীদিসেসু ঠানেসু] কিঞ্চনপটিনিস্সগ্গং [কিঞ্চনপটিনিস্সগ্গো (স্যা.)] কিঞ্চনপটিপ্পস্সদ্ধিং অমতং নিব্বানন্তি – অকিঞ্চনং. অনাদানন্তি আদানং ৱুচ্চতি তণ্হা. যো ৰাগো সাৰাগো…পে… অভিজ্ঝা লোভো অকুসলমূলং. আদানপ্পহানং আদানৱূপসমং আদানপটিনিস্সগ্গং আদানপটিপ্পস্সদ্ধিং অমতং নিব্বানন্তি – অকিঞ্চনং অনাদানং.

এতং দীপং অনাপৰন্তি এতং দীপং তাণং লেণং সৰণং গতি পৰাযনং. অনাপৰন্তি তম্হা পৰো অঞ্ঞো দীপো নত্থি. অথ খো সো এৱং দীপো অগ্গো চ সেট্ঠো চ ৱিসেট্ঠো চ পামোক্খো চ উত্তমো চ পৱৰো চাতি – এতং দীপং অনাপৰং.

নিব্বানং ইতি নং ব্ৰূমীতি ৱানং ৱুচ্চতি তণ্হা. যো ৰাগো সাৰাগো…পে… অভিজ্ঝা লোভো অকুসলমূলং. ৱানপ্পহানং ৱানৱূপসমং ৱানপটিনিস্সগ্গং ৱানপটিপ্পস্সদ্ধিং অমতং নিব্বানং. ইতীতি পদসন্ধি পদসংসগ্গো পদপাৰিপূৰী অক্খৰসমৱাযো ব্যঞ্জনসিলিট্ঠতা পদানুপুব্বতাপেতং – ইতীতি. ব্ৰূমীতি ব্ৰূমি আচিক্খামি দেসেমি পঞ্ঞপেমি পট্ঠপেমি ৱিৱৰামি ৱিভজামি উত্তানীকৰোমি পকাসেমীতি – নিব্বানং ইতি নং ব্ৰূমি.

জৰামচ্চুপৰিক্খযন্তি জৰামৰণস্স পহানং ৱূপসমং পটিনিস্সগ্গং পটিপ্পস্সদ্ধিং অমতং নিব্বানন্তি – জৰামচ্চুপৰিক্খযং. তেনাহ ভগৱা –

‘‘অকিঞ্চনং অনাদানং, এতং দীপং অনাপৰং;

নিব্বানং ইতি নং ব্ৰূমি, জৰামচ্চুপৰিক্খয’’ন্তি.

৬৪. এতদঞ্ঞায যে সতা, দিট্ঠধম্মাভিনিব্বুতা;

ন তে মাৰৱসানুগা, ন তে মাৰস্স পদ্ধগূ [পট্ঠগূ (স্যা. ক.)] .

এতদঞ্ঞায যে সতাতি. এতন্তি অমতং নিব্বানং. যো সো সব্বসঙ্খাৰসমথো সব্বূপধিপটিনিস্সগ্গো তণ্হক্খযো ৱিৰাগো নিৰোধো নিব্বানং. অঞ্ঞাযাতি অঞ্ঞায জানিত্ৱা তুলযিত্ৱা তীৰযিত্ৱা ৱিভাৱযিত্ৱা ৱিভূতং কত্ৱা, ‘‘সব্বে সঙ্খাৰা অনিচ্চা’’তি…পে… ‘‘যং কিঞ্চি সমুদযধম্মং, সব্বং তং নিৰোধধম্ম’’ন্তি অঞ্ঞায জানিত্ৱা তুলযিত্ৱা তীৰযিত্ৱা ৱিভাৱযিত্ৱা ৱিভূতং কত্ৱা. যেতি অৰহন্তো খীণাসৱা. সতাতি চতূহি কাৰণেহি সতা – কাযে কাযানুপস্সনাসতিপট্ঠানং ভাৱেন্তা [ভাৱিতত্তা (ক.)] সতা…পে… তে ৱুচ্চন্তি সতাতি – এতদঞ্ঞায যে সতা.

দিট্ঠধম্মাভিনিব্বুতাতি. দিট্ঠধম্মাতি দিট্ঠধম্মা ঞাতধম্মা তুলিতধম্মা তীৰিতধম্মা ৱিভূতধম্মা ৱিভাৱিতধম্মা. অভিনিব্বুতাতি ৰাগস্স নিব্বাপিতত্তা নিব্বুতা, দোসস্স…পে… সব্বাকুসলাভিসঙ্খাৰানং সন্তত্তা সমিতত্তা ৱূপসমিতত্তা নিজ্ঝাতত্তা নিব্বুতত্তা পটিপ্পস্সদ্ধত্তা সন্তা উপসন্তা ৱূপসন্তা নিব্বুতা পটিপ্পস্সদ্ধাতি – দিট্ঠধম্মাভিনিব্বুতা.

ন তে মাৰৱসানুগাতি. মাৰোতি যো সো মাৰো কণ্হো অধিপতি অন্তগূ নমুচি পমত্তবন্ধু. ন তে মাৰৱসানুগাতি ন তে মাৰস্স ৱসে ৱত্তন্তি, নাপি মাৰো তেসু ৱসং ৱত্তেতি. তে মাৰঞ্চ মাৰপক্খঞ্চ মাৰপাসঞ্চ মাৰবড়িসঞ্চ [মাৰবলিসঞ্চ (ক.)] মাৰামিসঞ্চ মাৰৱিসযঞ্চ মাৰনিৱাসঞ্চ মাৰগোচৰঞ্চ মাৰবন্ধনঞ্চ অভিভুয্য অভিভৱিত্ৱা অজ্ঝোত্থৰিত্ৱা পৰিযাদিযিত্ৱা মদ্দিত্ৱা চৰন্তি ৱিহৰন্তি ইৰিযন্তি ৱত্তেন্তি পালেন্তি যপেন্তি যাপেন্তীতি – ন তে মাৰৱসানুগা.

ন তে মাৰস্স পদ্ধগূতি ন তে মাৰস্স পদ্ধা পদ্ধচৰা [পট্ঠা পট্ঠচৰা (স্যা. ক.)] পৰিচাৰিকা সিযা; বুদ্ধস্স তে ভগৱতো পদ্ধা পদ্ধচৰা পৰিচাৰিকা সিযাতি – ন তে মাৰস্স পদ্ধগূ. তেনাহ ভগৱা –

‘‘এতদঞ্ঞায যে সতা, দিট্ঠধম্মাভিনিব্বুতা;

ন তে মাৰৱসানুগা, ন তে মাৰস্স পদ্ধগূ’’তি.

সহ গাথাপৰিযোসানা…পে… সত্থা মে ভন্তে ভগৱা, সাৱকোহমস্মীতি.

কপ্পমাণৱপুচ্ছানিদ্দেসো দসমো.