১২. নিব্বানসন্নিহিতপঞ্হো

১২. ‘‘ভন্তে নাগসেন, অত্থি সো পদেসো পুৰত্থিমায ৱা দিসায দক্খিণায ৱা দিসায পচ্ছিমায ৱা দিসায উত্তৰায ৱা দিসায উদ্ধং ৱা অধো ৱা তিৰিযং ৱা, যত্থ নিব্বানং সন্নিহিত’’ন্তি? ‘‘নত্থি, মহাৰাজ, সো পদেসো পুৰত্থিমায ৱা দিসায দক্খিণায ৱা দিসায পচ্ছিমায ৱা দিসায উত্তৰায ৱা দিসায উদ্ধং ৱা অধো ৱা তিৰিযং ৱা, যত্থ নিব্বানং সন্নিহিত’’ন্তি.

‘‘যদি, ভন্তে নাগসেন, নত্থি নিব্বানস্স সন্নিহিতোকাসো, তেন হি নত্থি নিব্বানং? যেসঞ্চ তং নিব্বানং সচ্ছিকতং, তেসম্পি সচ্ছিকিৰিযা মিচ্ছা, কাৰণং তত্থ ৱক্খামি, যথা, ভন্তে নাগসেন, মহিযা ধঞ্ঞুট্ঠানং খেত্তং অত্থি, গন্ধুট্ঠানং পুপ্ফং অত্থি, পুপ্ফুট্ঠানং গুম্বো অত্থি, ফলুট্ঠানং ৰুক্খো অত্থি, ৰতনুট্ঠানং আকৰো অত্থি, তত্থ যো কোচি যং যং ইচ্ছতি, সো তত্থ গন্ত্ৱা তং তং হৰতি, এৱমেৱ খো, ভন্তে নাগসেন, যদি নিব্বানং অত্থি, তস্স নিব্বানস্স উট্ঠানোকাসোপি ইচ্ছিতব্বো, যস্মা চ খো, ভন্তে নাগসেন, নিব্বানস্স উট্ঠানোকাসো নত্থি, তস্মা নত্থি নিব্বানন্তি ব্ৰূমি, যেসঞ্চ নিব্বানং সচ্ছিকতং, তেসম্পি সচ্ছিকিৰিযা মিচ্ছা’’তি.

‘‘নত্থি, মহাৰাজ, নিব্বানস্স সন্নিহিতোকাসো, অত্থি চেতং নিব্বানং, সম্মাপটিপন্নো যোনিসো মনসিকাৰেন নিব্বানং সচ্ছিকৰোতি. যথা পন, মহাৰাজ, অত্থি অগ্গি নাম, নত্থি তস্স সন্নিহিতোকাসো, দ্ৱে কট্ঠানি সঙ্ঘট্টেন্তো অগ্গিং অধিগচ্ছতি. এৱমেৱ খো, মহাৰাজ, অত্থি নিব্বানং, নত্থি তস্স সন্নিহিতোকাসো, সম্মাপটিপন্নো যোনিসো মনসিকাৰেন নিব্বানং সচ্ছিকৰোতি.

‘‘যথা ৱা পন, মহাৰাজ, অত্থি সত্ত ৰতনানি নাম. সেয্যথিদং, চক্কৰতনং হত্থিৰতনং অস্সৰতনং মণিৰতনং ইত্থিৰতনং গহপতিৰতনং পৰিণাযকৰতনং. ন চ তেসং ৰতনানং সন্নিহিতোকাসো অত্থি, খত্তিযস্স পন সম্মাপটিপন্নস্স পটিপত্তিবলেন তানি ৰতনানি উপগচ্ছন্তি. এৱমেৱ খো, মহাৰাজ, অত্থি নিব্বানং, নত্থি তস্স সন্নিহিতোকাসো, সম্মাপটিপন্নো যোনিসো মনসিকাৰেন নিব্বানং সচ্ছিকৰোতী’’তি.

‘‘ভন্তে নাগসেন, নিব্বানস্স সন্নিহিতোকাসো মা হোতু, অত্থি পন তং ঠানং, যত্থ ঠিতো সম্মাপটিপন্নো নিব্বানং সচ্ছিকৰোতী’’তি? ‘‘আম, মহাৰাজ, অত্থি তং ঠানং, যত্থ ঠিতো সম্মাপটিপন্নো নিব্বানং সচ্ছিকৰোতী’’তি.

‘‘কতমং পন, ভন্তে, তং ঠানং, যত্থ ঠিতো সম্মাপটিপন্নো নিব্বানং সচ্ছিকৰোতী’’তি? ‘‘সীলং, মহাৰাজ, ঠানং, সীলে পতিট্ঠিতো যোনিসো মনসিকৰোন্তো সক্কযৱনেপি চীনৱিলাতেপি অলসন্দেপি নিগুম্বেপি [নিকুম্বেপি (সী. স্যা. পী.)] কাসিকোসলেপি কস্মীৰেপি গন্ধাৰেপি নগমুদ্ধনিপি ব্ৰহ্মলোকেপি যত্থ কত্থচিপি ঠিতো সম্মাপটিপন্নো নিব্বানং সচ্ছিকৰোতি. যথা, মহাৰাজ, যো কোচি চক্খুমা পুৰিসো সকযৱনেপি চীনৱিলাতেপি অলসন্দেপি নিগুম্বেপি কাসিকোসলেপি কস্মীৰেপি গন্ধাৰেপি নগমুদ্ধনিপি ব্ৰহ্মলোকেপি যত্থ কত্থচিপি ঠিতো আকাসং পস্সতি, এৱমেৱ খো, মহাৰাজ, সীলে পতিট্ঠিতো যোনিসো মনসিকৰোন্তো সকযৱনেপি…পে… যত্থ কত্থচিপি ঠিতো সম্মাপটিপন্নো নিব্বানং সচ্ছিকৰোতি.

‘‘যথা ৱা পন, মহাৰাজ, সকযৱনেপি…পে… যত্থ কত্থচিপি ঠিতস্স পুব্বদিসা অত্থি, এৱমেৱ খো, মহাৰাজ, সীলে পতিট্ঠিতস্স যোনিসো মনসিকৰোন্তস্স সক্কযৱনেপি…পে… যত্থ কত্থচিপি ঠিতস্স সম্মাপটিপন্নস্স অত্থি নিব্বানসচ্ছিকিৰিযা’’তি. ‘‘সাধু, ভন্তে নাগসেন, দেসিতং তযা নিব্বানং, দেসিতা নিব্বানসচ্ছিকিৰিযা, পৰিক্খতা সীলগুণা, দস্সিতা সম্মাপটিপত্তি, উস্সাপিতো ধম্মদ্ধজো, সণ্ঠপিতা ধম্মনেত্তি, অৱঞ্ঝো সুপ্পযুত্তানং সম্মাপযোগো, এৱমেতং গণিৱৰপৱৰ তথা সম্পটিচ্ছামী’’তি.

নিব্বানসন্নিহিতপঞ্হো দ্ৱাদসমো.

ৱেস্সন্তৰৱগ্গো ততিযো.

ইমস্মিং ৱগ্গে দ্ৱাদস পঞ্হা.