৬. বোজ্ঝঙ্গপঞ্হো

৬. ৰাজা আহ ‘‘কতি নু খো, ভন্তে নাগসেন, বোজ্ঝঙ্গা’’তি? ‘‘সত্ত খো, মহাৰাজ, বোজ্ঝঙ্গা’’তি. ‘‘কতিহি পন, ভন্তে, বোজ্ঝঙ্গেহি বুজ্ঝতী’’তি? ‘‘একেন খো, মহাৰাজ, বোজ্ঝঙ্গেন বুজ্ঝতি ধম্মৱিচযসম্বোজ্ঝঙ্গেনা’’তি. ‘‘অথ কিস্স নু খো, ভন্তে, ৱুচ্চন্তি ‘সত্ত বোজ্ঝঙ্গা’’’তি? ‘‘তং কিং মঞ্ঞসি, মহাৰাজ, অসি কোসিযা পক্খিত্তো অগ্গহিতো হত্থেন উস্সহতি ছেজ্জং ছিন্দিতু’’ন্তি. ‘‘ন হি, ভন্তে’’তি. ‘‘এৱমেৱ খো, মহাৰাজ, ধম্মৱিচযসম্বোজ্ঝঙ্গেন ৱিনা ছহি বোজ্ঝঙ্গেহি ন বুজ্ঝতী’’তি.

‘‘কল্লোসি, ভন্তে নাগসেনা’’তি.

বোজ্ঝঙ্গপঞ্হো ছট্ঠো.