২. বুদ্ধস্স অনুত্তৰভাৱপঞ্হো

২. ৰাজা আহ ‘‘ভন্তে নাগসেন, বুদ্ধো অনুত্তৰো’’তি? ‘‘আম, মহাৰাজ, ভগৱা অনুত্তৰো’’তি. ‘‘কথং, ভন্তে নাগসেন, অদিট্ঠপুব্বং জানাসি ‘বুদ্ধো অনুত্তৰো’’’তি? ‘‘তং কিং মঞ্ঞসি, মহাৰাজ, যেহি অদিট্ঠপুব্বো মহাসমুদ্দো, জানেয্যুং তে, মহাৰাজ, মহন্তো খো মহাসমুদ্দো গম্ভীৰো অপ্পমেয্যো দুপ্পৰিযোগাহো, যত্থিমা পঞ্চ মহানদিযো সততং সমিতং অপ্পেন্তি, সেয্যথিদং, গঙ্গা যমুনা অচিৰৱতী সৰভূ মহী, নেৱ তস্স ঊনত্তং ৱা পূৰত্তং ৱা পঞ্ঞাযতী’’তি? ‘‘আম, ভন্তে, জানেয্যু’’ন্তি. ‘‘এৱমেৱ খো, মহাৰাজ, সাৱকে মহন্তে পৰিনিব্বুতে পস্সিত্ৱা জানামি ‘ভগৱা অনুত্তৰো’’’তি.

‘‘কল্লোসি, ভন্তে নাগসেনা’’তি.

বুদ্ধস্স অনুত্তৰভাৱপঞ্হো দুতিযো.