১০. বুদ্ধনিদস্সনপঞ্হো

১০. ৰাজা আহ ‘‘ভন্তে নাগসেন, বুদ্ধো অত্থী’’তি? ‘‘আম, মহাৰাজ, ভগৱা অত্থী’’তি. ‘‘সক্কা পন, ভন্তে নাগসেন, বুদ্ধো নিদস্সেতুং ইধৱা ইধৱা’’তি? ‘‘পৰিনিব্বুতো, মহাৰাজ, ভগৱা অনুপাদিসেসায নিব্বানধাতুযা, ন সক্কা ভগৱা নিদস্সেতুং ‘ইধ ৱা ইধ ৱা’’’তি.

‘‘ওপম্মং কৰোহী’’তি. ‘‘তং কিং মঞ্ঞসি, মহাৰাজ, মহতো অগ্গিক্খন্ধস্স জলমানস্স যা অচ্চি অত্থঙ্গতা, সক্কা সা অচ্চি দস্সেতুং ‘ইধ ৱা ইধ ৱা’’’তি? ‘‘ন হি, ভন্তে, নিৰুদ্ধা সা অচ্চি অপ্পঞ্ঞত্তিং গতা’’তি. ‘‘এৱমেৱ খো, মহাৰাজ, ভগৱা অনুপাদিসেসায নিব্বানধাতুযা পৰিনিব্বুতো অত্থঙ্গতো, ন সক্কা ভগৱা নিদস্সেতুং ‘ইধ ৱা ইধ ৱা’ তি, ধম্মকাযেন পন খো, মহাৰাজ, সক্কা ভগৱা নিদস্সেতুং. ধম্মো হি, মহাৰাজ, ভগৱতা দেসিতো’’তি.

‘‘কল্লোসি, ভন্তে নাগসেনা’’তি.

বুদ্ধনিদস্সনপঞ্হো দসমো.

বুদ্ধৱগ্গো পঞ্চমো.

ইমস্মিং ৱগ্গে দস পঞ্হা.