২. পটিসন্দহনপঞ্হো

২. ৰাজা আহ ‘‘ভন্তে নাগসেন, যো ন পটিসন্দহতি, জানাতি সো ‘ন পটিসন্দহিস্সামী’তি? ‘‘আম, মহাৰাজ, যো ন পটিসন্দহতি, জানাতি সো ‘ন পটিসন্দহিস্সামী’তি. ‘‘কথং, ভন্তে, জানাতী’’তি? ‘‘যো হেতু যো পচ্চযো, মহাৰাজ, পটিসন্দহনায, তস্স হেতুস্স তস্স পচ্চযস্স উপৰমা জানাতি সো ‘ন পটিসন্দহিস্সামী’’’তি.

‘‘ওপম্মং কৰোহী’’তি. ‘‘যথা, মহাৰাজ, কস্সকো গহপতিকো কসিত্ৱা চ ৱপিত্ৱা চ ধঞ্ঞাগাৰং পৰিপূৰেয্য. সো অপৰেন সমযেন নেৱ কস্সেয্য ন ৱপ্পেয্য, যথাসম্ভতঞ্চ ধঞ্ঞং পৰিভুঞ্জেয্য ৱা ৱিসজ্জেয্য ৱা যথা পচ্চযং ৱা কৰেয্য, জানেয্য সো, মহাৰাজ, কস্সকো গহপতিকো ‘ন মে ধঞ্ঞাগাৰং পৰিপূৰেস্সতী’তি? ‘‘আম, ভন্তে, জানেয্যা’’তি. ‘‘কথং জানেয্যা’’তি? ‘‘যো হেতু যো পচ্চযো ধঞ্ঞাগাৰস্স পৰিপূৰণায, তস্স হেতুস্স তস্স পচ্চযস্স উপৰমা জানাতি ‘ন মে ধঞ্ঞাগাৰং পৰিপূৰেস্সতী’’’তি. ‘‘এৱমেৱ খো, মহাৰাজ, যো হেতু যো পচ্চযো পটিসন্দহনায, তস্স হেতুস্স তস্স পচ্চযস্স উপৰমা জানাতি সো ‘ন পটিসন্দহিস্সামী’তি.

‘‘কল্লোসি, ভন্তে নাগসেনা’’তি.

পটিসন্দহনপঞ্হো দুতিযো.