১. ধম্মসন্ততিপঞ্হো

১. ৰাজা আহ ‘‘ভন্তে নাগসেন, যো উপ্পজ্জতি, সো এৱ সো, উদাহু অঞ্ঞো’’তি? থেৰো আহ ‘‘ন চ সো, ন চ অঞ্ঞো’’তি.

‘‘ওপম্মং কৰোহী’’তি. ‘‘তং কিং মঞ্ঞসি, মহাৰাজ, যদা ত্ৱং দহৰো তৰুণো মন্দো উত্তানসেয্যকো অহোসি, সো যেৱ ত্ৱং এতৰহি মহন্তো’’তি? ‘‘ন হি, ভন্তে, অঞ্ঞো সো দহৰো তৰুণো মন্দো উত্তানসেয্যকো অহোসি, অঞ্ঞো অহং এতৰহি মহন্তো’’তি. ‘‘এৱং সন্তে খো, মহাৰাজ, মাতাতিপি ন ভৱিস্সতি, পিতাতিপি ন ভৱিস্সতি, আচৰিযোতিপি ন ভৱিস্সতি, সিপ্পৱাতিপি ন ভৱিস্সতি, সীলৱাতিপি ন ভৱিস্সতি, পঞ্ঞৱাতিপি ন ভৱিস্সতি. কিং নু খো, মহাৰাজ, অঞ্ঞা এৱ কললস্স মাতা, অঞ্ঞা অব্বুদস্স মাতা, অঞ্ঞা পেসিযা মাতা, অঞ্ঞা ঘনস্স মাতা, অঞ্ঞা খুদ্দকস্স মাতা, অঞ্ঞা মহন্তস্স মাতা, অঞ্ঞো সিপ্পং সিক্খতি, অঞ্ঞো সিক্খিতো ভৱতি, অঞ্ঞো পাপকম্মং কৰোতি, অঞ্ঞস্স হত্থপাদা ছিজ্জন্তী’’তি? ‘‘ন হি, ভন্তে. ত্ৱং পন, ভন্তে, এৱং ৱুত্তে কিং ৱদেয্যাসী’’তি? থেৰো আহ ‘‘অহঞ্ঞেৱ খো, মহাৰাজ, দহৰো অহোসিং তৰুণো মন্দো উত্তানসেয্যকো, অহঞ্ঞেৱ এতৰহি মহন্তো, ইমমেৱ কাযং নিস্সায সব্বে তে একসঙ্গহিতা’’তি.

‘‘ভিয্যো ওপম্মং কৰোহী’’তি. ‘‘যথা, মহাৰাজ, কোচিদেৱ পুৰিসো পদীপং পদীপেয্য, কিং সো সব্বৰত্তিং পদীপেয্যা’’তি? ‘‘আম, ভন্তে, সব্বৰত্তিং পদীপেয্যা’’তি. ‘‘কিং নু খো, মহাৰাজ, যা পুৰিমে যামে অচ্চি, সা মজ্ঝিমে যামে অচ্চী’’তি? ‘‘ন হি ভন্তে’’তি. ‘‘যা মজ্ঝিমে যামে অচ্চি, সা পচ্ছিমে যামে অচ্চী’’তি? ‘‘ন হি ভন্তে’’তি. ‘‘কিং নু খো, মহাৰাজ, অঞ্ঞো সো অহোসি পুৰিমে যামে পদীপো, অঞ্ঞো মজ্ঝিমে যামে পদীপো, অঞ্ঞো পচ্ছিমে যামে পদীপো’’তি? ‘‘ন হি ভন্তে, তং যেৱ নিস্সায সব্বৰত্তিং পদীপিতো’’তি. ‘‘এৱমেৱ খো, মহাৰাজ, ধম্মসন্ততি সন্দহতি, অঞ্ঞো উপ্পজ্জতি, অঞ্ঞো নিৰুজ্ঝতি, অপুব্বং অচৰিমং ৱিয সন্দহতি, তেন ন চ সো, ন চ অঞ্ঞো, পুৰিমৱিঞ্ঞাণে পচ্ছিমৱিঞ্ঞাণং সঙ্গহং গচ্ছতী’’তি.

‘‘ভিয্যো ওপম্মং কৰোহী’’তি. ‘‘যথা, মহাৰাজ, খীৰং দুয্হমানং কালন্তৰেন দধি পৰিৱত্তেয্য, দধিতো নৱনীতং, নৱনীততো ঘতং পৰিৱত্তেয্য, যো নু খো, মহাৰাজ, এৱং ৱদেয্য ‘যং যেৱ খীৰং তং যেৱ দধি, যং যেৱ দধি তং যেৱ নৱনীতং, যং যেৱ নৱনীতং তং যেৱ ঘত’ন্তি, সম্মা নু খো সো, মহাৰাজ, ৱদমানো ৱদেয্যা’’তি? ‘‘ন হি ভন্তে, তংযেৱ নিস্সায সম্ভূত’’ন্তি. ‘‘এৱমেৱ খো, মহাৰাজ, ধম্মসন্ততি সন্দহতি, অঞ্ঞো উপ্পজ্জতি, অঞ্ঞো নিৰুজ্ঝতি, অপুব্বং অচৰিমং ৱিয সন্দহতি, তেন ন চ সো, ন চ অঞ্ঞো, পুৰিমৱিঞ্ঞাণে পচ্ছিমৱিঞ্ঞাণং সঙ্গহং গচ্ছতী’’তি.

‘‘কল্লোসি, ভন্তে নাগসেনা’’তি.

ধম্মসন্ততিপঞ্হো পঠমো.