৪১৬. পৰন্তপজাতকং (৭-২-১১)

১৫৪. আগমিস্সতি মে পাপং, আগমিস্সতি মে ভযং;

তদা হি চলিতা সাখা, মনুস্সেন মিগেন ৱা.

১৫৫. ভীৰুযা নূন মে কামো, অৱিদূৰে ৱসন্তিযা;

কৰিস্সতি কিসং পণ্ডুং, সাৱ সাখা পৰন্তপং.

১৫৬. সোচযিস্সতি মং কন্তা, গামে ৱসমনিন্দিতা;

কৰিস্সতি কিসং পণ্ডুং, সাৱ সাখা পৰন্তপং.

১৫৭. তযা মং অসিতাপঙ্গি [হসিতাপঙ্গি (সী. স্যা. পী.)], সিতানি [মিহিতানি (সী. স্যা. পী.)] ভণিতানি চ;

কিসং পণ্ডুং কৰিস্সন্তি, সাৱ সাখা পৰন্তপং.

১৫৮. অগমা নূন সো সদ্দো, অসংসি নূন সো তৱ;

অক্খাতং নূন তং তেন, যো তং সাখমকম্পযি.

১৫৯. ইদং খো তং সমাগম্ম, মম বালস্স চিন্তিতং;

তদা হি চলিতা সাখা, মনুস্সেন মিগেন ৱা.

১৬০. তথেৱ ত্ৱং অৱেদেসি, অৱঞ্চি [অৱজ্ঝি (ক.)] পিতৰং মম;

হন্ত্ৱা সাখাহি ছাদেন্তো, আগমিস্সতি মে [তে (স্যা. ক.)] ভযন্তি.

পৰন্তপজাতকং একাদসমং.

গন্ধাৰৱগ্গো দুতিযো.

তস্সুদ্দানং –

ৱৰগাম মহাকপি ভগ্গৱ চ, দড়্হধম্ম সকুঞ্জৰ কেসৱৰো;

উৰগো ৱিধুৰো পুন জাগৰতং, অথ কোসলাধিপ পৰন্তপ চাতি.

অথ ৱগ্গুদ্দানং –

অথ সত্তনিপাতম্হি, ৱগ্গং মে ভণতো সুণ;

কুক্কু চ পুন গন্ধাৰো, দ্ৱেৱ গুত্তা মহেসিনাতি.

সত্তকনিপাতং নিট্ঠিতং.