৮. অট্ঠকনিপাতো

৪১৭. কচ্চানিজাতকং (১)

১. ওদাতৱত্থা সুচি অল্লকেসা, কচ্চানি কিং কুম্ভিমধিস্সযিত্ৱা [কুম্ভিমপস্সযিত্ৱা (পী.)];

পিট্ঠা তিলা ধোৱসি তণ্ডুলানি, তিলোদনো হেহিতি কিস্স হেতু.

২. ন খো অযং ব্ৰাহ্মণ ভোজনত্থা [ভোজনত্থং (স্যা.)], তিলোদনো হেহিতি সাধুপক্কো;

ধম্মো মতো তস্স পহুত্তমজ্জ [পহূনমজ্জ (স্যা.), পহূতমজ্জ (সী.), বহূতমজ্জা (পী.)], অহং কৰিস্সামি সুসানমজ্ঝে.

৩. অনুৱিচ্চ কচ্চানি কৰোহি কিচ্চং, ধম্মো মতো কো নু তৱেৱ [তৱেত (সী. স্যা. পী.)] সংসি;

সহস্সনেত্তো অতুলানুভাৱো, ন মিয্যতী ধম্মৱৰো কদাচি.

৪. দড়্হপ্পমাণং মম এত্থ ব্ৰহ্মে, ধম্মো মতো নত্থি মমেত্থ কঙ্খা;

যে যেৱ দানি পাপা ভৱন্তি, তে তেৱ দানি সুখিতা ভৱন্তি.

৫. সুণিসা হি ময্হং ৱঞ্ঝা অহোসি, সা মং ৱধিত্ৱান ৱিজাযি পুত্তং;

সা দানি সব্বস্স কুলস্স ইস্সৰা, অহং পনম্হি [ৱসামি (স্যা.)] অপৱিদ্ধা একিকা.

৬. জীৱামি ৱোহং ন মতোহমস্মি [নাহং মতোস্মি (সী. পী.)], তৱেৱ অত্থায ইধাগতোস্মি;

যা তং ৱধিত্ৱান ৱিজাযি পুত্তং, সহাৱ পুত্তেন কৰোমি ভস্মং.

৭. এৱঞ্চ [এতঞ্চ (সী. পী.)] তে ৰুচ্চতি দেৱৰাজ, মমেৱ অত্থায ইধাগতোসি;

অহঞ্চ পুত্তো সুণিসা চ নত্তা, সম্মোদমানা ঘৰমাৱসেম.

৮. এৱঞ্চ তে ৰুচ্চতি কাতিযানি, হতাপি সন্তা ন জহাসি ধম্মং;

তুৱঞ্চ [ত্ৱঞ্চ (পী. ক.)] পুত্তো সুণিসা চ নত্তা, সম্মোদমানা ঘৰমাৱসেথ.

৯. সা কাতিযানী সুণিসায সদ্ধিং, সম্মোদমানা ঘৰমাৱসিত্থ;

পুত্তো চ নত্তা চ উপট্ঠহিংসু, দেৱানমিন্দেন অধিগ্গহীতাতি.

কচ্চানিজাতকং পঠমং.

৪১৮. অট্ঠসদ্দজাতকং (২)

১০. ইদং পুৰে নিন্নমাহু, বহুমচ্ছং মহোদকং;

আৱাসো বকৰাজস্স, পেত্তিকং ভৱনং মম;

ত্যজ্জ ভেকেন [ভিঙ্গেন (ক.)] যাপেম, ওকং ন ৱজহামসে [ওকন্তং ন জহামসে (ক.)].

১১. কো দুতিযং অসীলিস্স, বন্ধৰস্সক্খি ভেচ্ছতি [ভেজ্জতি (সী. স্যা. পী.), ভিন্দতি (ক.)];

কো মে পুত্তে কুলাৱকং, মঞ্চ সোত্থিং কৰিস্সতি.

১২. সব্বা পৰিক্খযা ফেগ্গু, যাৱ তস্সা গতী অহু;

খীণভক্খো মহাৰাজ, সাৰে ন ৰমতী ঘুণো.

১৩. সা নূনাহং ইতো গন্ত্ৱা, ৰঞ্ঞো মুত্তা নিৱেসনা;

অত্তানং ৰমযিস্সামি, দুমসাখনিকেতিনী.

১৪. সো নূনাহং ইতো গন্ত্ৱা, ৰঞ্ঞো মুত্তো নিৱেসনা;

অগ্গোদকানি পিস্সামি, যূথস্স পুৰতো ৱজং.

১৫. তং মং কামেহি সম্মত্তং, ৰত্তং কামেসু মুচ্ছিতং;

আনযী ভৰতো [ৱনতো (ক.)] লুদ্দো, বাহিকো ভদ্দমত্থু তে.

১৬. অন্ধকাৰতিমিসাযং, তুঙ্গে উপৰিপব্বতে;

সা মং সণ্হেন মুদুনা, মা পাদং খলি [খণি (সী. স্যা. পী.)] যস্মনি.

১৭. অসংসযং জাতিখযন্তদস্সী, ন গব্ভসেয্যং পুনৰাৱজিস্সং;

অযমন্তিমা পচ্ছিমা গব্ভসেয্যা [অযং হি মে অন্তিমা গব্ভসেয্যা (সী. পী.)], খীণো মে সংসাৰো পুনব্ভৱাযাতি.

অট্ঠসদ্দজাতকং দুতিযং.

৪১৯. সুলসাজাতকং (৩)

১৮. ইদং সুৱণ্ণকাযূৰং, মুত্তা ৱেড়ুৰিযা বহূ;

সব্বং হৰস্সু ভদ্দন্তে, মঞ্চ দাসীতি সাৱয.

১৯. ওৰোপযস্সু কল্যাণি, মা বাড়্হং [বহুং (সী. স্যা. পী.)] পৰিদেৱসি;

ন চাহং অভিজানামি, অহন্ত্ৱা ধনমাভতং.

২০. যতো সৰামি অত্তানং, যতো পত্তাস্মি ৱিঞ্ঞুতং;

ন চাহং অভিজানামি, অঞ্ঞং পিযতৰং তযা.

২১. এহি তং উপগূহিস্সং [উপগুয্হিস্সং (ক.)], কৰিস্সঞ্চ পদক্খিণং;

ন হি দানি পুন অত্থি, মম তুয্হঞ্চ সঙ্গমো.

২২. ন হি সব্বেসু ঠানেসু, পুৰিসো হোতি পণ্ডিতো;

ইত্থীপি পণ্ডিতা হোতি, তত্থ তত্থ ৱিচক্খণা.

২৩. ন হি সব্বেসু ঠানেসু, পুৰিসো হোতি পণ্ডিতো;

ইত্থীপি পণ্ডিতা হোতি, লহুং অত্থং ৱিচিন্তিকা [লহুমত্থৱিচিন্তিকা (সী. পী.)].

২৪. লহুঞ্চ ৱত খিপ্পঞ্চ, নিকট্ঠে সমচেতযি;

মিগং পুণ্ণাযতেনেৱ [পুণ্ণাযতনেৱ (স্যা.)], সুলসা সত্তুকং ৱধি.

২৫. যোধ উপ্পতিতং অত্থং, ন খিপ্পমনুবুজ্ঝতি;

সো হঞ্ঞতি মন্দমতি, চোৰোৱ গিৰিগব্ভৰে.

২৬. যো চ উপ্পতিতং অত্থং, খিপ্পমেৱ নিবোধতি;

মুচ্চতে সত্তুসম্বাধা, সুলসা সত্তুকামিৱাতি.

সুলসাজাতকং ততিযং.

৪২০. সুমঙ্গলজাতকং (৪)

২৭. ভুসম্হি [ভুসম্পি (ক.), ভুসং হি (সী. নিয্য)] কুদ্ধোতি অৱেক্খিযান, ন তাৱ দণ্ডং পণযেয্য ইস্সৰো;

অট্ঠানসো অপ্পতিৰূপমত্তনো, পৰস্স দুক্খানি ভুসং উদীৰযে.

২৮. যতো চ জানেয্য পসাদমত্তনো, অত্থং নিযুঞ্জেয্য পৰস্স দুক্কটং;

তদাযমত্থোতি সযং অৱেক্খিয, অথস্স দণ্ডং সদিসং নিৱেসযে.

২৯. ন চাপি ঝাপেতি পৰং ন অত্তনং, অমুচ্ছিতো যো নযতে নযানযং;

যো দণ্ডধাৰো ভৱতীধ ইস্সৰো, স ৱণ্ণগুত্তো সিৰিযা ন ধংসতি.

৩০. যে খত্তিযা সে অনিসম্মকাৰিনো, পণেন্তি দণ্ডং সহসা পমুচ্ছিতা;

অৱণ্ণসংযুতা [যুত্তাৱ (ক.)] জহন্তি জীৱিতং, ইতো ৱিমুত্তাপি চ যন্তি দুগ্গতিং.

৩১. ধম্মে চ যে অৰিযপ্পৱেদিতে ৰতা, অনুত্তৰা তে ৱচসা মনসা কম্মুনা চ;

তে সন্তিসোৰচ্চসমাধিসণ্ঠিতা, ৱজন্তি লোকং দুভযং তথাৱিধা.

৩২. ৰাজাহমস্মি নৰপমদানমিস্সৰো, সচেপি কুজ্ঝামি ঠপেমি অত্তনং;

নিসেধযন্তো জনতং তথাৱিধং, পণেমি দণ্ডং অনুকম্প যোনিসো.

৩৩. সিৰী চ লক্খী চ তৱেৱ খত্তিয, জনাধিপ মা ৱিজহি কুদাচনং;

অক্কোধনো নিচ্চপসন্নচিত্তো, অনীঘো তুৱং ৱস্সসতানি পালয.

৩৪. গুণেহি এতেহি উপেত খত্তিয, ঠিতমৰিযৱত্তী [ৱত্তি (সী.), ৱুত্তি (ক.)] সুৱচো অকোধনো;

সুখী অনুপ্পীড় পসাসমেদিনিং [অনুপ্পীড়ং সহসমেদনিং (ক.)], ইতো ৱিমুত্তোপি চ যাহি সুগ্গতিং.

৩৫. এৱং সুনীতেন [সুৱিনীতেন (পী.)] সুভাসিতেন, ধম্মেন ঞাযেন উপাযসো নযং;

নিব্বাপযে সঙ্খুভিতং মহাজনং, মহাৱ মেঘো সলিলেন মেদিনিন্তি [মেদনিন্তি (স্যা. ক.)].

সুমঙ্গলজাতকং চতুত্থং.

৪২১. গঙ্গমালজাতকং (৫)

৩৬. অঙ্গাৰজাতা পথৱী, কুক্কুড়ানুগতা মহী;

অথ গাযসি ৱত্তানি [ৱত্থানি (ক.)], ন তং তপতি আতপো.

৩৭. উদ্ধং তপতি আদিচ্চো, অধো তপতি ৱালুকা;

অথ গাযসি ৱত্তানি [ৱত্থানি (ক.)], ন তং তপতি আতপো.

৩৮. ন মং তপতি আতপো, আতপা [আতপ্পা (সী. স্যা. পী.)] তপযন্তি মং;

অত্থা হি ৱিৱিধা ৰাজ, তে তপন্তি ন আতপো.

৩৯. অদ্দসং কাম তে মূলং, সঙ্কপ্পা কাম জাযসি;

ন তং সঙ্কপ্পযিস্সামি, এৱং কাম ন হেহিসি.

৪০. অপ্পাপি কামা ন অলং, বহূহিপি ন তপ্পতি;

অহহা বাললপনা, পৰিৱজ্জেথ [পটিৱিজ্ঝেথ (পী. সী. অট্ঠ.)] জগ্গতো.

৪১. অপ্পস্স কম্মস্স ফলং মমেদং, উদযো অজ্ঝাগমা মহত্তপত্তং;

সুলদ্ধলাভো ৱত মাণৱস্স, যো পব্বজী কামৰাগং পহায.

৪২. তপসা পজহন্তি পাপকম্মং, তপসা ন্হাপিতকুম্ভকাৰভাৱং;

তপসা অভিভুয্য গঙ্গমাল, নামেনালপসজ্জ ব্ৰহ্মদত্তং.

৪৩. সন্দিট্ঠিকমেৱ ‘‘অম্ম’’ পস্সথ, খন্তীসোৰচ্চস্স অযং [যো (স্যা. পী. ক.)] ৱিপাকো;

যো [সো (স্যা. ক.)] সব্বজনস্স ৱন্দিতোহু, তং ৱন্দাম সৰাজিকা সমচ্চা.

৪৪. মা কিঞ্চি অৱচুত্থ গঙ্গমালং, মুনিনং মোনপথেসু সিক্খমানং;

এসো হি অতৰি অণ্ণৱং, যং তৰিত্ৱা চৰন্তি ৱীতসোকাতি.

গঙ্গমালজাতকং পঞ্চমং.

৪২২. চেতিযজাতকং (৬)

৪৫. ধম্মো হৱে হতো হন্তি, নাহতো হন্তি কিঞ্চনং [কঞ্চিনং (পী.)];

তস্মা হি ধম্মং ন হনে, মা ত্ৱং [তং (স্যা. পী.)] ধম্মো হতো হনি.

৪৬. অলিকং ভাসমানস্স, অপক্কমন্তি দেৱতা;

পূতিকঞ্চ মুখং ৱাতি, সকট্ঠানা চ ধংসতি;