২. গন্ধাৰৱগ্গো

৪০৬. গন্ধাৰজাতকং (৭-২-১)

৭৬. হিত্ৱা গামসহস্সানি, পৰিপুণ্ণানি সোড়স;

কোট্ঠাগাৰানি ফীতানি, সন্নিধিং দানি কুব্বসি.

৭৭. হিত্ৱা গন্ধাৰৱিসযং, পহূতধনধাৰিযং [ধানিযং (সী. পী.), ধঞ্ঞন্তি অত্থো];

পসাসনতো [পসাসনিতো (সী. স্যা.), পসাসনাতো (পী.)] নিক্খন্তো, ইধ দানি পসাসসি.

৭৮. ধম্মং ভণামি ৱেদেহ, অধম্মো মে ন ৰুচ্চতি;

ধম্মং মে ভণমানস্স, ন পাপমুপলিম্পতি.

৭৯. যেন কেনচি ৱণ্ণেন, পৰো লভতি ৰুপ্পনং;

মহত্থিযম্পি চে ৱাচং, ন তং ভাসেয্য পণ্ডিতো.

৮০. কামং ৰুপ্পতু ৱা মা ৱা, ভুসংৱ ৱিকিৰীযতু;

ধম্মং মে ভণমানস্স, ন পাপমুপলিম্পতি.

৮১. নো চে অস্স সকা বুদ্ধি, ৱিনযো ৱা সুসিক্খিতো;

ৱনে অন্ধমহিংসোৱ [অন্ধমহিসোৱ (সী. পী.)] চৰেয্য বহুকো জনো.

৮২. যস্মা চ পনিধেকচ্চে, আচেৰম্হি [আচাৰম্হি (সী. পী.)] সুসিক্খিতা;

তস্মা ৱিনীতৱিনযা, চৰন্তি সুসমাহিতাতি.

গন্ধাৰজাতকং পঠমং.

৪০৭. মহাকপিজাতকং (৭-২-২)

৮৩. অত্তানং সঙ্কমং কত্ৱা, যো সোত্থিং সমতাৰযি;

কিং ত্ৱং তেসং কিমে [কিমো (সী. পী.), কিং মে (স্যা.)] তুয্হং, হোন্তি এতে [হেতে (স্যা.), সো তে (ক.)] মহাকপি.

৮৪. ৰাজাহং ইস্সৰো তেসং, যূথস্স পৰিহাৰকো;

তেসং সোকপৰেতানং, ভীতানং তে অৰিন্দম.

৮৫. উল্লঙ্ঘযিত্ৱা [স লঙ্ঘযিত্ৱা (পী.), সুলঙ্ঘযিত্ৱা (ক.)] অত্তানং, ৱিস্সট্ঠধনুনো সতং;

ততো অপৰপাদেসু, দড়্হং বন্ধং লতাগুণং.

৮৬. ছিন্নব্ভমিৱ ৱাতেন, নুণ্ণো [নুন্নো (সী.)] ৰুক্খং উপাগমিং;

সোহং অপ্পভৱং তত্থ, সাখং হত্থেহি অগ্গহিং.

৮৭. তং মং ৱিযাযতং সন্তং, সাখায চ লতায চ;

সমনুক্কমন্তা পাদেহি, সোত্থিং সাখামিগা গতা.

৮৮. তং মং ন তপতে বন্ধো, মতো [ৱধো (সী. স্যা. পী.)] মে ন তপেস্সতি;

সুখমাহৰিতং তেসং, যেসং ৰজ্জমকাৰযিং.

৮৯. এসা তে উপমা ৰাজ, তং সুণোহি অৰিন্দম [অত্থসন্দস্সনী কতা (পী.)];

ৰঞ্ঞা ৰট্ঠস্স যোগ্গস্স, বলস্স নিগমস্স চ;

সব্বেসং সুখমেট্ঠব্বং, খত্তিযেন পজানতাতি.

মহাকপিজাতকং দুতিযং.

৪০৮. কুম্ভকাৰজাতকং (৭-২-৩)

৯০. অম্বাহমদ্দং ৱনমন্তৰস্মিং, নীলোভাসং ফলিতং [ফলিনং (পী.)] সংৱিৰূড়্হং;

তমদ্দসং ফলহেতু ৱিভগ্গং, তং দিস্ৱা ভিক্খাচৰিযং চৰামি.

৯১. সেলং সুমট্ঠং নৰৱীৰনিট্ঠিতং [নৰৱিদ্দুনিট্ঠিতং (ক.)], নাৰী যুগং ধাৰযি অপ্পসদ্দং;

দুতিযঞ্চ আগম্ম অহোসি সদ্দো, তং দিস্ৱা ভিক্খাচৰিযং চৰামি.

৯২. দিজা দিজং কুণপমাহৰন্তং, একং সমানং বহুকা সমেচ্চ;

আহাৰহেতূ পৰিপাতযিংসু, তং দিস্ৱা ভিক্খাচৰিযং চৰামি.

৯৩. উসভাহমদ্দং যূথস্স মজ্ঝে, চলক্ককুং ৱণ্ণবলূপপন্নং;

তমদ্দসং কামহেতু ৱিতুন্নং, তং দিস্ৱা ভিক্খাচৰিযং চৰামি.

৯৪. কৰণ্ডকো [কৰণ্ডুনাম (সী. পী.)] কলিঙ্গানং, গন্ধাৰানঞ্চ নগ্গজি;

নিমিৰাজা ৱিদেহানং, পঞ্চালানঞ্চ দুম্মুখো;

এতে ৰট্ঠানি হিত্ৱান, পব্বজিংসু অকিঞ্চনা.

৯৫. সব্বেপিমে দেৱসমা সমাগতা, অগ্গী যথা পজ্জলিতো তথেৱিমে;

অহম্পি একো চৰিস্সামি ভগ্গৱি, হিত্ৱান কামানি যথোধিকানি.

৯৬. অযমেৱ কালো ন হি অঞ্ঞো অত্থি, অনুসাসিতা মে ন ভৱেয্য পচ্ছা;

অহম্পি একা চৰিস্সামি ভগ্গৱ, সকুণীৱ মুত্তা পুৰিসস্স হত্থা.

৯৭. আমং পক্কঞ্চ জানন্তি, অথো লোণং অলোণকং;

তমহং দিস্ৱান পব্বজিং, চৰেৱ ত্ৱং চৰামহন্তি.

কুম্ভকাৰজাতকং ততিযং.

৪০৯. দড়্হধম্মজাতকং (৭-২-৪)

৯৮. অহং চে দড়্হধম্মস্স [দড়্হধম্মায (পী.)], ৱহন্তি নাভিৰাধযিং;

ধৰন্তী উৰসি সল্লং, যুদ্ধে ৱিক্কন্তচাৰিনী.

৯৯. নূন ৰাজা ন জানাতি [ন হ নূন ৰাজা জানাতি (সী. পী.)], মম ৱিক্কমপোৰিসং;

সঙ্গামে সুকতন্তানি, দূতৱিপ্পহিতানি চ.

১০০. সা নূনাহং মৰিস্সামি, অবন্ধু অপৰাযিনী [অপৰাযিণী (সী.), অপৰাযণী (?)];

তদা হি [তথা হি (পী.)] কুম্ভকাৰস্স, দিন্না ছকণহাৰিকা.

১০১. যাৱতাসীসতী পোসো, তাৱদেৱ পৱীণতি;

অত্থাপাযে জহন্তি নং, ওট্ঠিব্যাধিংৱ খত্তিযো.

১০২. যো পুব্বে কতকল্যাণো, কতত্থো নাৱবুজ্ঝতি;

অত্থা তস্স পলুজ্জন্তি, যে হোন্তি অভিপত্থিতা.

১০৩. যো পুব্বে কতকল্যাণো, কতত্থো মনুবুজ্ঝতি;

অত্থা তস্স পৱড্ঢন্তি, যে হোন্তি অভিপত্থিতা.

১০৪. তং ৱো ৱদামি ভদ্দন্তে [ভদ্দং ৱো (সী. স্যা. পী.)], যাৱন্তেত্থ সমাগতা;

সব্বে কতঞ্ঞুনো হোথ, চিৰং সগ্গম্হি ঠস্সথাতি.

দড়্হধম্মজাতকং চতুত্থং.

৪১০. সোমদত্তজাতকং (৭-২-৫)

১০৫. যো মং পুৰে পচ্চুড্ডেতি [পচ্চুদেতি (সী. স্যা. পী.), পচ্চুট্ঠেতি (ক.)], অৰঞ্ঞে দূৰমাযতো;

সো ন দিস্সতি মাতঙ্গো, সোমদত্তো কুহিং গতো.

১০৬. অযং ৱা সো মতো সেতি, অল্লসিঙ্গংৱ ৱচ্ছিতো [অল্লপিঙ্কৱ ছিজ্জিতো (সী. পী.), অল্লপীতংৱ ৱিচ্ছিতো (স্যা.)];

ভুম্যা নিপতিতো সেতি, অমৰা ৱত কুঞ্জৰো.

১০৭. অনগাৰিযুপেতস্স, ৱিপ্পমুত্তস্স তে সতো;

সমণস্স ন তং সাধু, যং পেতমনুসোচসি.

১০৮. সংৱাসেন হৱে সক্ক, মনুস্সস্স মিগস্স ৱা;

হদযে জাযতে পেমং, তং ন সক্কা অসোচিতুং.

১০৯. মতং মৰিস্সং ৰোদন্তি, যে ৰুদন্তি লপন্তি চ;

তস্মা ত্ৱং ইসি মা ৰোদি, ৰোদিতং মোঘমাহু সন্তো.

১১০. কন্দিতেন হৱে ব্ৰহ্মে, মতো পেতো সমুট্ঠহে;

সব্বে সঙ্গম্ম ৰোদাম, অঞ্ঞমঞ্ঞস্স ঞাতকে.

১১১. আদিত্তং ৱত মং সন্তং, ঘতসিত্তংৱ পাৱকং;

ৱাৰিনা ৱিয ওসিঞ্চং, সব্বং নিব্বাপযে দৰং.

১১২. অব্বহী ৱত মে সল্লং, যমাসি হদযস্সিতং;

যো মে সোকপৰেতস্স, পুত্তসোকং অপানুদি.

১১৩. সোহং অব্বূড়্হসল্লোস্মি, ৱীতসোকো অনাৱিলো;

ন সোচামি ন ৰোদামি, তৱ সুত্ৱান ৱাসৱাতি.

সোমদত্তজাতকং পঞ্চমং.

৪১১. সুসীমজাতকং (৭-২-৬)

১১৪. কাড়ানি কেসানি পুৰে অহেসুং, জাতানি সীসম্হি যথাপদেসে;

তানজ্জ সেতানি সুসীম [সুসিম (ক.)] দিস্ৱা, ধম্মং চৰ ব্ৰহ্মচৰিযস্স কালো.

১১৫. মমেৱ দেৱ পলিতং ন তুয্হং, মমেৱ সীসং মম উত্তমঙ্গং;

‘‘অত্থং কৰিস্স’’ন্তি মুসা অভাণিং [অভাসিং (ক.)], একাপৰাধং খম ৰাজসেট্ঠ.

১১৬. দহৰো তুৱং দস্সনিযোসি ৰাজ, পঠমুগ্গতো হোসি [হোহি (সী.), হোতি (ক.)] যথা কড়ীৰো;

ৰজ্জঞ্চ কাৰেহি মমঞ্চ পস্স, মা কালিকং অনুধাৱী জনিন্দ.

১১৭. পস্সামি ৱোহং দহৰিং কুমাৰিং, সামট্ঠপস্সং সুতনুং সুমজ্ঝং;

কাড়প্পৱাড়াৱ পৱেল্লমানা, পলোভযন্তীৱ [সা লোভযন্তীৱ (পী.)] নৰেসু গচ্ছতি.

১১৮. তমেন পস্সামিপৰেন নাৰিং, আসীতিকং নাৱুতিকং ৱ জচ্চা;

দণ্ডং গহেত্ৱান পৱেধমানং, গোপানসীভোগ্গসমং চৰন্তিং.

১১৯. সোহং তমেৱানুৱিচিন্তযন্তো, একো সযামি [পস্সামি (ক.)] সযনস্স মজ্ঝে;

‘‘অহম্পি এৱং’’ ইতি পেক্খমানো, ন গহে ৰমে [ন গেহে ৰমে (সী.), গেহে ন ৰমে (স্যা. ক.)] ব্ৰহ্মচৰিযস্স কালো.

১২০. ৰজ্জুৱালম্বনী চেসা, যা গেহে ৱসতো ৰতি;

এৱম্পি ছেত্ৱান ৱজন্তি ধীৰা, অনপেক্খিনো কামসুখং পহাযাতি.

সুসীমজাতকং ছট্ঠং.

৪১২. কোটসিম্বলিজাতকং (৭-২-৭)

১২১. অহং দসসতংব্যামং, উৰগমাদায আগতো;

তঞ্চ মঞ্চ মহাকাযং, ধাৰযং নপ্পৱেধসি [ন পৱেধযি (ক.)].

১২২. অথিমং খুদ্দকং পক্খিং, অপ্পমংসতৰং মযা;

ধাৰযং ব্যথসি [ব্যাধসে (সী.), ব্যধসে (পী.), ব্যাধসি (ক.)] ভীতা [ভীতো (সী. স্যা. পী.)], কমত্থং কোটসিম্বলি [কোটিসিম্বলি (সী. পী.)].

১২৩. মংসভক্খো তুৱং ৰাজ, ফলভক্খো অযং দিজো;

অযং নিগ্ৰোধবীজানি, পিলক্খুদুম্বৰানি চ;

অস্সত্থানি চ ভক্খিত্ৱা, খন্ধে মে ওহদিস্সতি.

১২৪. তে ৰুক্খা সংৱিৰূহন্তি, মম পস্সে নিৱাতজা;

তে মং পৰিযোনন্ধিস্সন্তি, অৰুক্খং মং কৰিস্সৰে.

১২৫. সন্তি অঞ্ঞেপি ৰুক্খা সে, মূলিনো খন্ধিনো দুমা;

ইমিনা সকুণজাতেন, বীজমাহৰিতা হতা.

১২৬. অজ্ঝাৰূহাভিৱড্ঢন্তি [অজ্ঝাৰূড়্হাভিৱড্ঢন্তি (সী. পী.)], ব্ৰহন্তম্পি ৱনপ্পতিং;

তস্মা ৰাজ পৱেধামি, সম্পস্সংনাগতং ভযং.

১২৭. সঙ্কেয্য সঙ্কিতব্বানি, ৰক্খেয্যানাগতং ভযং;

অনাগতভযা ধীৰো, উভো লোকে অৱেক্খতীতি.

কোটসিম্বলিজাতকং সত্তমং.

৪১৩. ধূমকাৰিজাতকং (৭-২-৮)

১২৮. ৰাজা অপুচ্ছি ৱিধুৰং, ধম্মকামো যুধিট্ঠিলো;

অপি ব্ৰাহ্মণ জানাসি, কো একো বহু সোচতি.

১২৯. ব্ৰাহ্মণো অজযূথেন, পহূতেধো [বহূতেজো (পী. ক.), বহুতেন্দো (স্যা.)] ৱনে ৱসং;

ধূমং অকাসি ৱাসেট্ঠো, ৰত্তিন্দিৱমতন্দিতো.

১৩০. তস্স তং ধূমগন্ধেন, সৰভা মকসড্ডিতা [মকসদ্দিতা (সী. স্যা.), মকসট্টিতা (পী. ক.)];

ৱস্সাৱাসং উপাগচ্ছুং, ধূমকাৰিস্স সন্তিকে.

১৩১. সৰভেসু মনং কত্ৱা, অজা সো নাৱবুজ্ঝথ;

আগচ্ছন্তী ৱজন্তী ৱা [আগচ্ছন্তি ৱজন্তি ৱা (স্যা. পী.), আগচ্ছন্তিং ৱজন্তিং ৱা (ক.)], তস্স তা ৱিনসুং [ৱিনস্সুং (সী.)] অজা.

১৩২. সৰভা সৰদে কালে, পহীনমকসে ৱনে;

পাৱিসুং গিৰিদুগ্গানি, নদীনং পভৱানি চ.

১৩৩. সৰভে চ গতে দিস্ৱা, অজা চ ৱিভৱং গতা [অজে চ ৱিভৱং গতে (ক.)];

কিসো চ ৱিৱণ্ণো চাসি, পণ্ডুৰোগী চ ব্ৰাহ্মণো.

১৩৪. এৱং যো সং নিৰংকত্ৱা, আগন্তুং কুৰুতে পিযং;

সো একো বহু সোচতি, ধূমকাৰীৱ ব্ৰাহ্মণোতি.

ধূমকাৰিজাতকং অট্ঠমং.

৪১৪. জাগৰজাতকং (৭-২-৯)

১৩৫. কোধ জাগৰতং সুত্তো, কোধ সুত্তেসু জাগৰো;

কো মমেতং ৱিজানাতি, কো তং পটিভণাতি মে.

১৩৬. অহং জাগৰতং সুত্তো, অহং সুত্তেসু জাগৰো;

অহমেতং ৱিজানামি, অহং পটিভণামি তে.

১৩৭. কথং জাগৰতং সুত্তো, কথং সুত্তেসু জাগৰো;

কথং এতং ৱিজানাসি, কথং পটিভণাসি মে.

১৩৮. যে ধম্মং নপ্পজানন্তি, সংযমোতি দমোতি চ;

তেসু সুপ্পমানেসু, অহং জগ্গামি দেৱতে.

১৩৯. যেসং ৰাগো চ দোসো চ, অৱিজ্জা চ ৱিৰাজিতা;

তেসু জাগৰমানেসু, অহং সুত্তোস্মি দেৱতে.

১৪০. এৱং জাগৰতং সুত্তো, এৱং সুত্তেসু জাগৰো;