৭. সত্তকনিপাতো

১. কুক্কুৱগ্গো

৩৯৬. কুক্কুজাতকং (৭-১-১)

১. দিযড্ঢকুক্কূ উদযেন কণ্ণিকা, ৱিদত্থিযো অট্ঠ পৰিক্খিপন্তি নং;

সা সিংসপা [সসিংসপা (সী. পী.), সা সীসপা (স্যা.), যা সিংসপা (ক. সী. নিয্য)] সাৰমযা অফেগ্গুকা, কুহিং ঠিতা উপ্পৰিতো [উপৰিতো (সী. স্যা. পী.)] ন ধংসতি.

২. যা তিংসতি সাৰমযা অনুজ্জুকা, পৰিকিৰিয [পকিৰিযা (ক.)] গোপাণসিযো সমং ঠিতা [সমট্ঠিতা (সী. স্যা.)];

তাহি সুসঙ্গহিতা বলসা পীড়িতা [তা সঙ্গহিতা বলসা চ পীড়িতা (সী.), তাহি সুসঙ্গহিতা বলসা চ পীড়িতা (স্যা.), তাহি সঙ্গহীতা বলসা চ পীড়িতা (পী.)], সমং ঠিতা উপ্পৰিতো ন ধংসতি.

৩. এৱম্পি মিত্তেহি দড়্হেহি পণ্ডিতো, অভেজ্জৰূপেহি সুচীহি মন্তিভি;

সুসঙ্গহীতো সিৰিযা ন ধংসতি, গোপাণসী ভাৰৱহাৱ কণ্ণিকা.

৪. খৰত্তচং বেল্লং যথাপি সত্থৱা, অনামসন্তোপি কৰোতি তিত্তকং;

সমাহৰং সাদুং কৰোতি পত্থিৱ, অসাদুং কযিৰা তনুবন্ধমুদ্ধৰং [তনুৱট্টমুদ্ধৰং (সী. পী.)].

৫. এৱম্পি গামনিগমেসু পণ্ডিতো, অসাহসং ৰাজধনানি সঙ্ঘৰং;

ধম্মানুৱত্তী পটিপজ্জমানো, স ফাতি কযিৰা অৱিহেঠযং পৰং.

৬. ওদাতমূলং সুচিৱাৰিসম্ভৱং, জাতং যথা পোক্খৰণীসু অম্বুজং;

পদুমং যথা অগ্গিনিকাসিফালিমং, ন কদ্দমো ন ৰজো ন ৱাৰি লিম্পতি.

৭. এৱম্পি ৱোহাৰসুচিং অসাহসং, ৱিসুদ্ধকম্মন্তমপেতপাপকং;

ন লিম্পতি কম্মকিলেস তাদিসো, জাতং যথা পোক্খৰণীসু অম্বুজন্তি.

কুক্কুজাতকং পঠমং.

৩৯৭. মনোজজাতকং (৭-১-২)

৮. যথা চাপো নিন্নমতি, জিযা চাপি নিকূজতি;

হঞ্ঞতে নূন মনোজো, মিগৰাজা সখা মম.

৯. হন্দ দানি ৱনন্তানি, পক্কমামি যথাসুখং;

নেতাদিসা সখা হোন্তি, লব্ভা মে জীৱতো সখা.

১০. ন পাপজনসংসেৱী, অচ্চন্তং সুখমেধতি;

মনোজং পস্স সেমানং, গিৰিযস্সানুসাসনী [অৰিযস্সানুসাসনী (সী. স্যা. পী.)].

১১. ন পাপসম্পৱঙ্কেন, মাতা পুত্তেন নন্দতি;

মনোজং পস্স সেমানং, অচ্ছন্নং [সচ্ছন্নং (ক.)] সম্হি লোহিতে.

১২. এৱমাপজ্জতে পোসো, পাপিযো চ নিগচ্ছতি;

যো ৱে হিতানং ৱচনং, ন কৰোতি অত্থদস্সিনং.

১৩. এৱঞ্চ সো হোতি ততো চ পাপিযো, যো উত্তমো অধমজনূপসেৱী;

পস্সুত্তমং অধমজনূপসেৱিতং [সেৱিং (স্যা.)], মিগাধিপং সৰৱৰৱেগনিদ্ধুতং.

১৪. নিহীযতি পুৰিসো নিহীনসেৱী, ন চ হাযেথ কদাচি তুল্যসেৱী;

সেট্ঠমুপগমং [মুপনমং (সী. পী. অ. নি. ৩.২৬)] উদেতি খিপ্পং, তস্মাত্তনা উত্তৰিতৰং [তস্মা অত্তনো উত্তৰিং (সী. পী.), তস্মা অত্তনো উত্তৰং (স্যা.)] ভজেথাতি.

মনোজজাতকং দুতিযং.

৩৯৮. সুতনুজাতকং (৭-১-৩)

১৫. ৰাজা তে ভত্তং পাহেসি, সুচিং মংসূপসেচনং;

মঘদেৱস্মিং [মখাদেৱস্মিং (সী. পী.), মাঘদেৱস্মিং (ক.)] অধিৱত্থে, এহি নিক্খম্ম ভুঞ্জস্সু.

১৬. এহি মাণৱ ওৰেন, ভিক্খমাদায সূপিতং;

ত্ৱঞ্চ মাণৱ ভিক্খা চ [ভক্খোসি (স্যা.), ভক্খাৱ (ক.)], উভো ভক্খা ভৱিস্সথ.

১৭. অপ্পকেন তুৱং যক্খ, থুল্লমত্থং জহিস্সসি;

ভিক্খং তে নাহৰিস্সন্তি, জনা মৰণসঞ্ঞিনো.

১৮. লদ্ধায যক্খা [লদ্ধাযং যক্খ (সী. স্যা. পী.)] তৱ নিচ্চভিক্খং, সুচিং পণীতং ৰসসা উপেতং;

ভিক্খঞ্চ তে আহৰিযো নৰো ইধ, সুদুল্লভো হেহিতি ভক্খিতে [খাদিতে (সী. স্যা. পী.)] মযি.

১৯. মমেৱ [মমেস (সী. পী.)] সুতনো অত্থো, যথা ভাসসি মাণৱ;

মযা ত্ৱং সমনুঞ্ঞাতো, সোত্থিং পস্সাহি মাতৰং.

২০. খগ্গং ছত্তঞ্চ পাতিঞ্চ, গচ্ছমাদায [গচ্ছেৱাদায (সী. স্যা. পী.)] মাণৱ;

সোত্থিং পস্সতু তে মাতা, ত্ৱঞ্চ পস্সাহি মাতৰং.

২১. এৱং যক্খ সুখী হোহি, সহ সব্বেহি ঞাতিভি;

ধনঞ্চ মে অধিগতং, ৰঞ্ঞো চ ৱচনং কতন্তি.

সুতনুজাতকং ততিযং.

৩৯৯. মাতুপোসকগিজ্ঝজাতকং (৭-১-৪)

২২. তে কথং নু কৰিস্সন্তি, ৱুদ্ধা গিৰিদৰীসযা;

অহং বদ্ধোস্মি পাসেন, নিলীযস্স ৱসং গতো.

২৩. কিং গিজ্ঝ পৰিদেৱসি, কা নু তে পৰিদেৱনা;

ন মে সুতো ৱা দিট্ঠো ৱা, ভাসন্তো মানুসিং দিজো.

২৪. ভৰামি মাতাপিতৰো, ৱুদ্ধে গিৰিদৰীসযে;

তে কথং নু কৰিস্সন্তি, অহং ৱসং গতো তৱ.

২৫. যং নু গিজ্ঝো যোজনসতং, কুণপানি অৱেক্খতি;

কস্মা জালঞ্চ পাসঞ্চ, আসজ্জাপি ন বুজ্ঝসি.

২৬. যদা পৰাভৱো হোতি, পোসো জীৱিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতি.

২৭. ভৰস্সু মাতাপিতৰো, ৱুদ্ধে গিৰিদৰীসযে;

মযা ত্ৱং সমনুঞ্ঞাতো, সোত্থিং পস্সাহি ঞাতকে.

২৮. এৱং লুদ্দক নন্দস্সু, সহ সব্বেহি ঞাতিভি;

ভৰিস্সং মাতাপিতৰো, ৱুদ্ধে গিৰিদৰীসযেতি.

মাতুপোসকগিজ্ঝজাতকং চতুত্থং.

৪০০. দব্ভপুপ্ফজাতকং (৭-১-৫)

২৯. অনুতীৰচাৰী ভদ্দন্তে, সহাযমনুধাৱ মং;

মহা মে গহিতো [ৰোহিতো (ক.)] মচ্ছো, সো মং হৰতি ৱেগসা.

৩০. গম্ভীৰচাৰী ভদ্দন্তে, দড়্হং গণ্হাহি থামসা;

অহং তং উদ্ধৰিস্সামি, সুপণ্ণো উৰগামিৱ [উৰগম্মিৱ (সী. স্যা. পী.)].

৩১. ৱিৱাদো নো সমুপ্পন্নো, দব্ভপুপ্ফ সুণোহি মে;

সমেহি মেধগং [মেধকং (পী.)] সম্ম, ৱিৱাদো ৱূপসম্মতং.

৩২. ধম্মট্ঠোহং পুৰে আসিং, বহূ অড্ডা মে তীৰিতা [বহুঅট্টং মে তীৰিতং (সী.), বহুঅট্টংৱ তীৰিতং (স্যা.), বহু অত্থং মে তীৰিতং (পী.)];

সমেমি মেধগং সম্ম, ৱিৱাদো ৱূপসম্মতং.

৩৩. অনুতীৰচাৰি নঙ্গুট্ঠং, সীসং গম্ভীৰচাৰিনো;

অচ্চাযং [অথাযং (সী. পী.)] মজ্ঝিমো খণ্ডো, ধম্মট্ঠস্স ভৱিস্সতি.

৩৪. চিৰম্পি ভক্খো অভৱিস্স, সচে ন ৱিৱদেমসে;

অসীসকং অনঙ্গুট্ঠং, সিঙ্গালো হৰতি ৰোহিতং.

৩৫. যথাপি ৰাজা নন্দেয্য, ৰজ্জং লদ্ধান খত্তিযো;

এৱাহমজ্জ নন্দামি, দিস্ৱা পুণ্ণমুখং পতিং.

৩৬. কথং নু থলজো সন্তো, উদকে মচ্ছং পৰামসি;

পুট্ঠো মে সম্ম অক্খাহি, কথং অধিগতং তযা.

৩৭. ৱিৱাদেন কিসা হোন্তি, ৱিৱাদেন ধনক্খযা;

জীনা উদ্দা ৱিৱাদেন, ভুঞ্জ মাযাৱি ৰোহিতং.

৩৮. এৱমেৱ মনুস্সেসু, ৱিৱাদো যত্থ জাযতি;

ধম্মট্ঠং পটিধাৱন্তি, সো হি নেসং ৱিনাযকো;

ধনাপি তত্থ জীযন্তি, ৰাজকোসো পৱড্ঢতীতি [চ ৱড্ঢতি (পী.)].

দব্ভপুপ্ফজাতকং পঞ্চমং.

৪০১. পণ্ণকজাতকং (৭-১-৬)

৩৯. পণ্ণকং [দসণ্ণকং (সী. স্যা. পী.)] তিখিণধাৰং, অসিং সম্পন্নপাযিনং;

পৰিসাযং পুৰিসো গিলতি, কিং দুক্কৰতৰং ততো;

যদঞ্ঞং দুক্কৰং ঠানং, তং মে অক্খাহি পুচ্ছিতো.

৪০. গিলেয্য পুৰিসো লোভা, অসিং সম্পন্নপাযিনং;

যো চ ৱজ্জা দদামীতি, তং দুক্কৰতৰং ততো;

সব্বঞ্ঞং সুকৰং ঠানং, এৱং জানাহি মদ্দৱ [মাগধ (সী. স্যা. পী.)].

৪১. ব্যাকাসি আযুৰো পঞ্হং, অত্থং [অত্থ (পী. সী. নিয্য)] ধম্মস্স কোৱিদো;

পুক্কুসং দানি পুচ্ছামি, কিং দুক্কৰতৰং ততো;

যদঞ্ঞং দুক্কৰং ঠানং, তং মে অক্খাহি পুচ্ছিতো.

৪২. ন ৱাচমুপজীৱন্তি, অফলং গিৰমুদীৰিতং;

যো চ দত্ৱা অৱাকযিৰা, তং দুক্কৰতৰং ততো;

সব্বঞ্ঞং সুকৰং ঠানং, এৱং জানাহি মদ্দৱ.

৪৩. ব্যাকাসি পুক্কুসো পঞ্হং, অত্থং ধম্মস্স কোৱিদো;

সেনকং দানি পুচ্ছামি, কিং দুক্কৰতৰং ততো;

যদঞ্ঞং দুক্কৰং ঠানং, তং মে অক্খাহি পুচ্ছিতো.

৪৪. দদেয্য পুৰিসো দানং, অপ্পং ৱা যদি ৱা বহুং;

যো চ দত্ৱা নানুতপ্পে [তপে (সী. পী.)], তং দুক্কৰতৰং ততো;

সব্বঞ্ঞং সুকৰং ঠানং, এৱং জানাহি মদ্দৱ.

৪৫. ব্যাকাসি আযুৰো পঞ্হং, অথো পুক্কুসপোৰিসো;

সব্বে পঞ্হে অতিভোতি, যথা ভাসতি সেনকোতি.

পণ্ণক [দসণ্ণক (সী. স্যা. পী.)] জাতকং ছট্ঠং.

৪০২. সত্তুভস্তজাতকং (৭-১-৭)

৪৬. ৱিব্ভন্তচিত্তো কুপিতিন্দ্ৰিযোসি, নেত্তেহি তে ৱাৰিগণা সৱন্তি;

কিং তে নট্ঠং কিং পন পত্থযানো, ইধাগমা ব্ৰহ্মে তদিঙ্ঘ [ব্ৰাহ্মণ ইঙ্ঘ (সী. স্যা.)] ব্ৰূহি.

৪৭. মিয্যেথ ভৰিযা ৱজতো মমজ্জ, অগচ্ছতো মৰণমাহ যক্খো;

এতেন দুক্খেন পৱেধিতোস্মি, অক্খাহি মে সেনক এতমত্থং.

৪৮. বহূনি ঠানানি ৱিচিন্তযিত্ৱা, যমেত্থ ৱক্খামি তদেৱ সচ্চং;

মঞ্ঞামি তে ব্ৰাহ্মণ সত্তুভস্তং, অজানতো কণ্হসপ্পো পৱিট্ঠো.

৪৯. আদায দণ্ডং পৰিসুম্ভ ভস্তং, পস্সেড়মূগং উৰগং দুজিৱ্হং [দিজিৱ্হং (সী. পী.)];

ছিন্দজ্জ কঙ্খং ৱিচিকিচ্ছিতানি, ভুজঙ্গমং পস্স পমুঞ্চ ভস্তং.

৫০. সংৱিগ্গৰূপো পৰিসায মজ্ঝে, সো ব্ৰাহ্মণো সত্তুভস্তং পমুঞ্চি;

অথ নিক্খমি উৰগো উগ্গতেজো, আসীৱিসো সপ্পো ফণং কৰিত্ৱা.

৫১. সুলদ্ধলাভা জনকস্স ৰঞ্ঞো, যো পস্সতী সেনকং সাধুপঞ্ঞং;

ৱিৱট্টছদ্দো [ৱিৱত্তচ্ছদ্দো (সী.), ৱিৱট্টচ্ছদো (স্যা.), ৱিৱট্টচ্ছদ্দা (পী.)] নুসি সব্বদস্সী, ঞাণং নু তে ব্ৰাহ্মণ ভিংসৰূপং.

৫২. ইমানি মে সত্তসতানি অত্থি, গণ্হাহি সব্বানি দদামি তুয্হং;

তযা হি মে জীৱিতমজ্জ লদ্ধং, অথোপি ভৰিযায মকাসি সোত্থিং.

৫৩. ন পণ্ডিতা ৱেতনমাদিযন্তি, চিত্ৰাহি গাথাহি সুভাসিতাহি;

ইতোপি তে ব্ৰহ্মে দদন্তু ৱিত্তং, আদায ত্ৱং গচ্ছ সকং নিকেতন্তি.

সত্তুভস্তজাতকং [সেনকজাতকং (স্যা.)] সত্তমং.

৪০৩. অট্ঠিসেনকজাতকং (৭-১-৮)

৫৪. যেমে অহং ন জানামি, অট্ঠিসেন ৱনিব্বকে;

তে মং সঙ্গম্ম যাচন্তি, কস্মা মং ত্ৱং ন যাচসি.

৫৫. যাচকো অপ্পিযো হোতি, যাচং অদদমপ্পিযো;

তস্মাহং তং ন যাচামি, মা মে ৱিদেস্সনা [ৱিদ্দেসনা (সী. পী.)] অহু.

৫৬. যো ৱে যাচনজীৱানো, কালে যাচং ন যাচতি;

পৰঞ্চ পুঞ্ঞা [পুঞ্ঞং (স্যা. ক.)] ধংসেতি, অত্তনাপি ন জীৱতি.

৫৭. যো চ [যো ৱে (ক.)] যাচনজীৱানো, কালে যাচঞ্হি যাচতি [যাচংপি যাচতি (স্যা.), যাচানি যাচতি (পী.), যাচতি যাচনং (সী. নিয্য), যাচনং যাচতি (ক.)];

পৰঞ্চ পুঞ্ঞং লব্ভেতি, অত্তনাপি চ জীৱতি.

৫৮. ন ৱে দেস্সন্তি [ন ৱে দুস্সন্তি (স্যা.), ন ৱে দিস্সন্তি (পী.), ন ৱিদেস্সন্তি (ক. অট্ঠ.)] সপ্পঞ্ঞা, দিস্ৱা যাচকমাগতে;

ব্ৰহ্মচাৰি পিযো মেসি, ৱদ ত্ৱং [ৱৰ তং (সী.), ৱৰ ত্ৱং (পী.)] ভঞ্ঞমিচ্ছসি [যঞ্ঞমিচ্ছসি (?)].

৫৯. ন ৱে যাচন্তি সপ্পঞ্ঞা, ধীৰো চ ৱেদিতুমৰহতি;

উদ্দিস্স অৰিযা তিট্ঠন্তি, এসা অৰিযান যাচনা.

৬০. দদামি তে ব্ৰাহ্মণ ৰোহিণীনং, গৱং সহস্সং সহ পুঙ্গৱেন;

অৰিযো হি অৰিযস্স কথং ন দজ্জা, সুত্ৱান গাথা তৱ ধম্মযুত্তাতি.

অট্ঠিসেনকজাতকং অট্ঠমং.

৪০৪. কপিজাতকং (৭-১-৯)

৬১. যত্থ ৱেৰী নিৱসতি, ন ৱসে তত্থ পণ্ডিতো;

একৰত্তং দিৰত্তং ৱা, দুক্খং ৱসতি ৱেৰিসু.

৬২. দিসো ৱে লহুচিত্তস্স, পোসস্সানুৱিধীযতো;

একস্স কপিনো হেতু, যূথস্স অনযো কতো.