৪১৫. কুম্মাসপিণ্ডিজাতকং (৭-২-১০)

১৪২. ন কিৰত্থি অনোমদস্সিসু, পাৰিচৰিযা বুদ্ধেসু অপ্পিকা [অপ্পকা (ক.)];

সুক্খায অলোণিকায চ, পস্সফলং কুম্মাসপিণ্ডিযা.

১৪৩. হত্থিগৱস্সা চিমে বহূ [হত্থিগৱাস্সা চ মে বহূ (সী.), হত্থী গৱাস্সা চিমে বহূ (স্যা.), হত্থী গৱাস্সা চ মে বহূ (পী.)], ধনধঞ্ঞং পথৱী চ কেৱলা;

নাৰিযো চিমা অচ্ছৰূপমা, পস্সফলং কুম্মাসপিণ্ডিযা.

১৪৪. অভিক্খণং ৰাজকুঞ্জৰ, গাথা ভাসসি কোসলাধিপ;

পুচ্ছামি তং ৰট্ঠৱড্ঢন, বাড়্হং পীতিমনো পভাসসি.

১৪৫. ইমস্মিঞ্ঞেৱ নগৰে, কুলে অঞ্ঞতৰে অহুং;

পৰকম্মকৰো আসিং, ভতকো সীলসংৱুতো.

১৪৬. কম্মায নিক্খমন্তোহং, চতুৰো সমণেদ্দসং;

আচাৰসীলসম্পন্নে, সীতিভূতে অনাসৱে.

১৪৭. তেসু চিত্তং পসাদেত্ৱা, নিসীদেত্ৱা [নিসাদেত্ৱা (?)] পণ্ণসন্থতে;

অদং বুদ্ধান কুম্মাসং, পসন্নো সেহি পাণিভি.

১৪৮. তস্স কম্মস্স কুসলস্স, ইদং মে এদিসং ফলং;

অনুভোমি ইদং ৰজ্জং, ফীতং ধৰণিমুত্তমং.

১৪৯. দদং ভুঞ্জ মা চ পমাদো [দদ ভুঞ্জ চ মা চ পমাদো (সী. পী.)], চক্কং ৱত্তয কোসলাধিপ;

মা ৰাজ অধম্মিকো অহু, ধম্মং পালয কোসলাধিপ.

১৫০. সোহং তদেৱ পুনপ্পুনং, ৱটুমং আচৰিস্সামি সোভনে;

অৰিযাচৰিতং সুকোসলে, অৰহন্তো মে মনাপাৱ পস্সিতুং.

১৫১. দেৱী ৱিয অচ্ছৰূপমা, মজ্ঝে নাৰিগণস্স সোভসি;

কিং কম্মমকাসি ভদ্দকং, কেনাসি ৱণ্ণৱতী সুকোসলে.

১৫২. অম্বট্ঠকুলস্স খত্তিয, দাস্যাহং পৰপেসিযা অহুং;

সঞ্ঞতা চ [সঞ্ঞতা (সী. পী.)] ধম্মজীৱিনী, সীলৱতী চ অপাপদস্সনা.

১৫৩. উদ্ধটভত্তং অহং তদা, চৰমানস্স অদাসি ভিক্খুনো;

ৱিত্তা সুমনা সযং অহং, তস্স কম্মস্স ফলং মমেদিসন্তি.

কুম্মাসপিণ্ডিজাতকং দসমং.