৪. পঞ্চপুব্বনিমিত্তসুত্তং

৮৩. ৱুত্তঞ্হেতং ভগৱতা, ৱুত্তমৰহতাতি মে সুতং –

‘‘যদা, ভিক্খৱে, দেৱো দেৱকাযা চৱনধম্মো হোতি, পঞ্চস্স পুব্বনিমিত্তানি পাতুভৱন্তি – মালা মিলাযন্তি, ৱত্থানি কিলিস্সন্তি, কচ্ছেহি সেদা মুচ্চন্তি, কাযে দুব্বণ্ণিযং ওক্কমতি, সকে দেৱো দেৱাসনে নাভিৰমতীতি. তমেনং, ভিক্খৱে, দেৱা ‘চৱনধম্মো অযং দেৱপুত্তো’তি ইতি ৱিদিত্ৱা তীহি ৱাচাহি অনুমোদেন্তি [অনুমোদন্তি (সী. স্যা. পী.)] – ‘ইতো, ভো, সুগতিং গচ্ছ, সুগতিং গন্ত্ৱা সুলদ্ধলাভং লভ, সুলদ্ধলাভং লভিত্ৱা সুপ্পতিট্ঠিতো ভৱাহী’’’তি.

এৱং ৱুত্তে, অঞ্ঞতৰো ভিক্খু ভগৱন্তং এতদৱোচ – ‘‘কিন্নু খো, ভন্তে, দেৱানং সুগতিগমনসঙ্খাতং; কিঞ্চ, ভন্তে, দেৱানং সুলদ্ধলাভসঙ্খাতং; কিং পন, ভন্তে, দেৱানং সুপ্পতিট্ঠিতসঙ্খাত’’ন্তি?

‘‘মনুস্সত্তং খো, ভিক্খু [ভিক্খৱে (স্যা. পী.)], দেৱানং সুগতিগমনসঙ্খাতং; যং মনুস্সভূতো সমানো তথাগতপ্পৱেদিতে ধম্মৱিনযে সদ্ধং পটিলভতি. ইদং খো, ভিক্খু [ভিক্খৱে (স্যা. পী.)], দেৱানং সুলদ্ধলাভসঙ্খাতং; সা খো পনস্স সদ্ধা নিৱিট্ঠা হোতি মূলজাতা পতিট্ঠিতা দড়্হা অসংহাৰিযা সমণেন ৱা ব্ৰাহ্মণেন ৱা দেৱেন ৱা মাৰেন ৱা ব্ৰহ্মুনা ৱা কেনচি ৱা লোকস্মিং. ইদং খো, ভিক্খু [ভিক্খৱে (স্যা. পী.)], দেৱানং সুপ্পতিট্ঠিতসঙ্খাত’’ন্তি. এতমত্থং ভগৱা অৱোচ. তত্থেতং ইতি ৱুচ্চতি –

‘‘যদা দেৱো দেৱকাযা, চৱতি আযুসঙ্খযা;

তযো সদ্দা নিচ্ছৰন্তি, দেৱানং অনুমোদতং.

‘‘‘ইতো ভো সুগতিং গচ্ছ, মনুস্সানং সহব্যতং;

মনুস্সভূতো সদ্ধম্মে, লভ সদ্ধং অনুত্তৰং.

‘‘‘সা তে সদ্ধা নিৱিট্ঠস্স, মূলজাতা পতিট্ঠিতা;

যাৱজীৱং অসংহীৰা, সদ্ধম্মে সুপ্পৱেদিতে.

‘‘‘কাযদুচ্চৰিতং হিত্ৱা, ৱচীদুচ্চৰিতানি চ;

মনোদুচ্চৰিতং হিত্ৱা, যঞ্চঞ্ঞং দোসসঞ্হিতং.

‘‘‘কাযেন কুসলং কত্ৱা, ৱাচায কুসলং বহুং;

মনসা কুসলং কত্ৱা, অপ্পমাণং নিৰূপধিং.

‘‘‘ততো ওপধিকং পুঞ্ঞং, কত্ৱা দানেন তং বহুং;

অঞ্ঞেপি মচ্চে সদ্ধম্মে, ব্ৰহ্মচৰিযে নিৱেসয’ [নিৱেসযে (সী. স্যা.)].

‘‘ইমায অনুকম্পায, দেৱা দেৱং যদা ৱিদূ;

চৱন্তং অনুমোদেন্তি, এহি দেৱ পুনপ্পুন’’ন্তি.

অযম্পি অত্থো ৱুত্তো ভগৱতা, ইতি মে সুতন্তি. চতুত্থং.