১০. দেৱদত্তসুত্তং

৮৯. ৱুত্তঞ্হেতং ভগৱতা, ৱুত্তমৰহতাতি মে সুতং –

‘‘তীহি, ভিক্খৱে, অসদ্ধম্মেহি অভিভূতো পৰিযাদিন্নচিত্তো দেৱদত্তো আপাযিকো নেৰযিকো কপ্পট্ঠো অতেকিচ্ছো. কতমেহি তীহি? পাপিচ্ছতায, ভিক্খৱে, অভিভূতো পৰিযাদিন্নচিত্তো দেৱদত্তো আপাযিকো নেৰযিকো কপ্পট্ঠো অতেকিচ্ছো. পাপমিত্ততায, ভিক্খৱে, অভিভূতো পৰিযাদিন্নচিত্তো দেৱদত্তো আপাযিকো নেৰযিকো কপ্পট্ঠো অতেকিচ্ছো. সতি খো পন উত্তৰিকৰণীযে [উত্তৰিং কৰণীযে (স্যা.)] ওৰমত্তকেন ৱিসেসাধিগমেন [ৱিসেসাধিগমেন চ (স্যা. পী.)] অন্তৰা ৱোসানং আপাদি. ইমেহি খো, ভিক্খৱে, তীহি অসদ্ধম্মেহি অভিভূতো পৰিযাদিন্নচিত্তো দেৱদত্তো আপাযিকো নেৰযিকো কপ্পট্ঠো অতেকিচ্ছো’’তি. এতমত্থং ভগৱা অৱোচ. তত্থেতং ইতি ৱুচ্চতি –

‘‘মা জাতু কোচি লোকস্মিং, পাপিচ্ছো উদপজ্জথ;

তদমিনাপি জানাথ, পাপিচ্ছানং যথা গতি.

‘‘পণ্ডিতোতি সমঞ্ঞাতো, ভাৱিতত্তোতি সম্মতো;

জলংৱ যসসা অট্ঠা, দেৱদত্তোতি ৱিস্সুতো [মে সুতং (পাড়িযং)].

‘‘সো পমাণমনুচিণ্ণো [পমাদমনুচিণ্ণো (ক. সী. স্যা. পী.), সমানমনুচিণ্ণো (অট্ঠ.)], আসজ্জ নং তথাগতং;

অৱীচিনিৰযং পত্তো, চতুদ্ৱাৰং ভযানকং.

‘‘অদুট্ঠস্স হি যো দুব্ভে, পাপকম্মং অকুব্বতো;

তমেৱ পাপং ফুসতি [ফুস্সেতি (স্যা.)], দুট্ঠচিত্তং অনাদৰং.

‘‘সমুদ্দং ৱিসকুম্ভেন, যো মঞ্ঞেয্য পদূসিতুং;

ন সো তেন পদূসেয্য, ভেস্মা হি উদধি মহা.

‘‘এৱমেৱ [এৱমেতং (স্যা.)] তথাগতং, যো ৱাদেন ৱিহিংসতি;

সম্মগ্গতং [সমগ্গতং (সী. ক.)] সন্তচিত্তং, ৱাদো তম্হি ন ৰূহতি.

‘‘তাদিসং মিত্তং কুব্বেথ, তঞ্চ সেৱেয্য পণ্ডিতো;

যস্স মগ্গানুগো ভিক্খু, খযং দুক্খস্স পাপুণে’’তি.

অযম্পি অত্থো ৱুত্তো ভগৱতা, ইতি মে সুতন্তি. দসমং.

চতুত্থো ৱগ্গো নিট্ঠিতো.

তস্সুদ্দানং –

ৱিতক্কাসক্কাৰসদ্দ, চৱনলোকে অসুভং;

ধম্মঅন্ধকাৰমলং, দেৱদত্তেন তে দসাতি.