১০. জাগৰিযসুত্তং

৪৭. ৱুত্তঞ্হেতং ভগৱতা, ৱুত্তমৰহতাতি মে সুতং –

‘‘জাগৰো চস্স, ভিক্খৱে, ভিক্খু ৱিহৰেয্য সতো সম্পজানো সমাহিতো পমুদিতো ৱিপ্পসন্নো চ তত্থ কালৱিপস্সী চ কুসলেসু ধম্মেসু. জাগৰস্স, ভিক্খৱে, ভিক্খুনো ৱিহৰতো সতস্স সম্পজানস্স সমাহিতস্স পমুদিতস্স ৱিপ্পসন্নস্স তত্থ কালৱিপস্সিনো কুসলেসু ধম্মেসু দ্ৱিন্নং ফলানং অঞ্ঞতৰং ফলং পাটিকঙ্খং – দিট্ঠেৱ ধম্মে অঞ্ঞা, সতি ৱা উপাদিসেসে অনাগামিতা’’তি. এতমত্থং ভগৱা অৱোচ. তত্থেতং ইতি ৱুচ্চতি –

‘‘জাগৰন্তা সুণাথেতং, যে সুত্তা তে পবুজ্ঝথ;

সুত্তা জাগৰিতং সেয্যো, নত্থি জাগৰতো ভযং.

‘‘যো জাগৰো চ সতিমা সম্পজানো, সমাহিতো মুদিতো ৱিপ্পসন্নো চ;

কালেন সো সম্মা ধম্মং পৰিৱীমংসমানো, একোদিভূতো ৱিহনে তমং সো.

‘‘তস্মা হৱে জাগৰিযং ভজেথ, আতাপী ভিক্খু নিপকো ঝানলাভী;

সংযোজনং জাতিজৰায ছেত্ৱা, ইধেৱ সম্বোধিমনুত্তৰং ফুসে’’তি.

অযম্পি অত্থো ৱুত্তো ভগৱতা, ইতি মে সুতন্তি. দসমং.