৯. ৱট্টপোতকচৰিযা

৭২. ‘‘পুনাপৰং যদা হোমি, মগধে ৱট্টপোতকো;

অজাতপক্খো তৰুণো, মংসপেসি কুলাৱকে.

৭৩. ‘‘মুখতুণ্ডকেনাহৰিত্ৱা [মুখতুণ্ডেনাহৰিত্ৱা (সী.)], মাতা পোসযতী মমং;

তস্সা ফস্সেন জীৱামি, নত্থি মে কাযিকং বলং.

৭৪. ‘‘সংৱচ্ছৰে গিম্হসমযে, দৱডাহো [ৱনদাহো (ক.)] পদিপ্পতি;

উপগচ্ছতি অম্হাকং, পাৱকো কণ্হৱত্তনী.

৭৫. ‘‘ধমধমা ইতিএৱং, সদ্দাযন্তো মহাসিখী;

অনুপুব্বেন ঝাপেন্তো, অগ্গি মমমুপাগমি.

৭৬. ‘‘অগ্গিৱেগভযাতীতা, তসিতা মাতাপিতা মম;

কুলাৱকে মং ছড্ডেত্ৱা, অত্তানং পৰিমোচযুং.

৭৭. ‘‘পাদে পক্খে পজহামি, নত্থি মে কাযিকং বলং;

সোহং অগতিকো তত্থ, এৱং চিন্তেসহং তদা.

৭৮. ‘‘‘যেসাহং উপধাৱেয্যং, ভীতো তসিতৱেধিতো;

তে মং ওহায পক্কন্তা, কথং মে অজ্জ কাতৱে.

৭৯. ‘‘‘অত্থি লোকে সীলগুণো, সচ্চং সোচেয্যনুদ্দযা;

তেন সচ্চেন কাহামি, সচ্চকিৰিযমুত্তমং.

৮০. ‘‘‘আৱেজ্জেত্ৱা ধম্মবলং, সৰিত্ৱা পুব্বকে জিনে;

সচ্চবলমৱস্সায, সচ্চকিৰিযমকাসহং.

৮১. ‘‘‘সন্তি পক্খা অপতনা, সন্তি পাদা অৱঞ্চনা;

মাতাপিতা চ নিক্খন্তা, জাতৱেদ পটিক্কম’.

৮২. ‘‘সহসচ্চে কতে ময্হং, মহাপজ্জলিতো সিখী;

ৱজ্জেসি সোড়সকৰীসানি, উদকং পত্ৱা যথা সিখী;

সচ্চেন মে সমো নত্থি, এসা মে সচ্চপাৰমী’’তি.

ৱট্টপোতকচৰিযং নৱমং.