১০. মচ্ছৰাজচৰিযা

৮৩. ‘‘পুনাপৰং যদা হোমি, মচ্ছৰাজা মহাসৰে;

উণ্হে সূৰিযসন্তাপে, সৰে উদক খীযথ.

৮৪. ‘‘ততো কাকা চ গিজ্ঝা চ, কঙ্কা [বকা (সী.)] কুললসেনকা;

ভক্খযন্তি দিৱাৰত্তিং, মচ্ছে উপনিসীদিয.

৮৫. ‘‘এৱং চিন্তেসহং তত্থ, সহ ঞাতীহি পীড়িতো;

‘কেন নু খো উপাযেন, ঞাতী দুক্খা পমোচযে’.

৮৬. ‘‘ৱিচিন্তযিত্ৱা ধম্মত্থং, সচ্চং অদ্দস পস্সযং;

সচ্চে ঠত্ৱা পমোচেসিং, ঞাতীনং তং অতিক্খযং.

৮৭. ‘‘অনুস্সৰিত্ৱা সতং ধম্মং, পৰমত্থং ৱিচিন্তযং;

অকাসি সচ্চকিৰিযং, যং লোকে ধুৱসস্সতং.

৮৮. ‘‘‘যতো সৰামি অত্তানং, যতো পত্তোস্মি ৱিঞ্ঞুতং;

নাভিজানামি সঞ্চিচ্চ, একপাণম্পি হিংসিতং.

৮৯. ‘‘‘এতেন সচ্চৱজ্জেন, পজ্জুন্নো অভিৱস্সতু;

অভিত্থনয পজ্জুন্ন, নিধিং কাকস্স নাসয;

কাকং সোকায ৰন্ধেহি, মচ্ছে সোকা পমোচয’.

৯০. ‘‘সহকতে সচ্চৱৰে, পজ্জুন্নো অভিগজ্জিয;

থলং নিন্নঞ্চ পূৰেন্তো, খণেন অভিৱস্সথ.

৯১. ‘‘এৱৰূপং সচ্চৱৰং, কত্ৱা ৱীৰিযমুত্তমং;

ৱস্সাপেসিং মহামেঘং, সচ্চতেজবলস্সিতো;

সচ্চেন মে সমো নত্থি, এসা মে সচ্চপাৰমী’’তি.

মচ্ছৰাজচৰিযং দসমং.