১১. কণ্হদীপাযনচৰিযা

৯২. ‘‘পুনাপৰং যদা হোমি, কণ্হদীপাযনো ইসি;

পৰোপঞ্ঞাসৱস্সানি, অনভিৰতোচৰিং অহং.

৯৩. ‘‘ন কোচি এতং জানাতি, অনভিৰতিমনং মম;

অহঞ্হি কস্সচি নাচিক্খিং, অৰতি মে চৰতি মানসে.

৯৪. ‘‘সব্ৰহ্মচাৰী মণ্ডব্যো, সহাযো মে মহাইসি;

পুব্বকম্মসমাযুত্তো, সূলমাৰোপনং লভি.

৯৫. ‘‘তমহং উপট্ঠহিত্ৱান, আৰোগ্যমনুপাপযিং;

আপুচ্ছিত্ৱান আগঞ্ছিং, যং ময্হং সকমস্সমং.

৯৬. ‘‘সহাযো ব্ৰাহ্মণো ময্হং, ভৰিযং আদায পুত্তকং;

তযো জনা সমাগন্ত্ৱা, আগঞ্ছুং পাহুনাগতং.

৯৭. ‘‘সম্মোদমানো তেহি সহ, নিসিন্নো সকমস্সমে;

দাৰকো ৱট্টমনুক্খিপং, আসীৱিসমকোপযি.

৯৮. ‘‘ততো সো ৱট্টগতং মগ্গং, অন্ৱেসন্তো কুমাৰকো;

আসীৱিসস্স হত্থেন, উত্তমঙ্গং পৰামসি.

৯৯. ‘‘তস্স আমসনে কুদ্ধো, সপ্পো ৱিসবলস্সিতো;

কুপিতো পৰমকোপেন, অডংসি দাৰকং খণে.

১০০. ‘‘সহদট্ঠো আসীৱিসেন [অতিৱিসেন (পী. ক.)], দাৰকো পপতি [পততি (ক.)] ভূমিযং;

তেনাহং দুক্খিতো আসিং, মম ৱাহসি তং দুক্খং.

১০১. ‘‘ত্যাহং অস্সাসযিত্ৱান, দুক্খিতে সোকসল্লিতে;

পঠমং অকাসিং কিৰিযং, অগ্গং সচ্চং ৱৰুত্তমং.

১০২. ‘‘‘সত্তাহমেৱাহং পসন্নচিত্তো, পুঞ্ঞত্থিকো অচৰিং ব্ৰহ্মচৰিযং;

অথাপৰং যং চৰিতং মমেদং, ৱস্সানি পঞ্ঞাসসমাধিকানি.

১০৩. ‘‘‘অকামকো ৱাহি অহং চৰামি, এতেন সচ্চেন সুৱত্থি হোতু;

হতং ৱিসং জীৱতু যঞ্ঞদত্তো’.

১০৪. ‘‘সহ সচ্চে কতে ময্হং, ৱিসৱেগেন ৱেধিতো;

অবুজ্ঝিত্ৱান ৱুট্ঠাসি, অৰোগো চাসি মাণৱো;

সচ্চেন মে সমো নত্থি, এসা মে সচ্চপাৰমী’’তি.

কণ্হদীপাযনচৰিযং একাদসমং.