১২. সুতসোমচৰিযা

১০৫. ‘‘পুনাপৰং যদা হোমি, সুতসোমো মহীপতি;

গহিতো পোৰিসাদেন, ব্ৰাহ্মণে সঙ্গৰং সৰিং.

১০৬. ‘‘খত্তিযানং একসতং, আৱুণিত্ৱা কৰত্তলে;

এতেসং পমিলাপেত্ৱা, যঞ্ঞত্থে উপনযী মমং.

১০৭. ‘‘অপুচ্ছি মং পোৰিসাদো, ‘কিং ত্ৱং ইচ্ছসি নিস্সজং;

যথামতি তে কাহামি, যদি মে ত্ৱং পুনেহিসি’.

১০৮. ‘‘তস্স পটিস্সুণিত্ৱান, পণ্হে আগমনং মম;

উপগন্ত্ৱা পুৰং ৰম্মং, ৰজ্জং নিয্যাদযিং তদা.

১০৯. ‘‘অনুস্সৰিত্ৱা সতং ধম্মং, পুব্বকং জিনসেৱিতং;

ব্ৰাহ্মণস্স ধনং দত্ৱা, পোৰিসাদং উপাগমিং.

১১০. ‘‘নত্থি মে সংসযো তত্থ, ঘাতযিস্সতি ৱা ন ৱা;

সচ্চৱাচানুৰক্খন্তো, জীৱিতং চজিতুমুপাগমিং;

সচ্চেন মে সমো নত্থি, এসা মে সচ্চপাৰমী’’তি.

সুতসোমচৰিযং দ্ৱাদসমং.