৫. সোণপণ্ডিতচৰিযা

৪২. ‘‘পুনাপৰং যদা হোমি, নগৰে ব্ৰহ্মৱড্ঢনে;

তত্থ কুলৱৰে সেট্ঠে, মহাসালে অজাযহং.

৪৩. ‘‘তদাপি লোকং দিস্ৱান, অন্ধীভূতং তমোত্থটং;

চিত্তং ভৱতো পতিকুটতি, তুত্তৱেগহতং ৱিয.

৪৪. ‘‘দিস্ৱান ৱিৱিধং পাপং, এৱং চিন্তেসহং তদা;

‘কদাহং গেহা নিক্খম্ম, পৱিসিস্সামি কাননং’.

৪৫. ‘‘তদাপি মং নিমন্তেসুং, কামভোগেহি ঞাতযো;

তেসম্পি ছন্দমাচিক্খিং, ‘মা নিমন্তেথ তেহি মং’.

৪৬. ‘‘যো মে কনিট্ঠকো ভাতা, নন্দো নামাসি পণ্ডিতো;

সোপি মং অনুসিক্খন্তো, পব্বজ্জং সমৰোচযি.

৪৭. ‘‘অহং সোণো চ নন্দো চ, উভো মাতাপিতা মম;

তদাপি ভোগে ছড্ডেত্ৱা, পাৱিসিম্হা মহাৱন’’ন্তি.

সোণপণ্ডিতচৰিযং পঞ্চমং.