৬. তেমিযচৰিযা

৪৮. ‘‘পুনাপৰং যদা হোমি, কাসিৰাজস্স অত্ৰজো;

মূগপক্খোতি নামেন, তেমিযোতি ৱদন্তি মং.

৪৯. ‘‘সোড়সিত্থিসহস্সানং, ন ৱিজ্জতি পুমো তদা [সদা (সী.)];

অহোৰত্তানং অচ্চযেন, নিব্বত্তো অহমেককো.

৫০. ‘‘কিচ্ছা লদ্ধং পিযং পুত্তং, অভিজাতং জুতিন্ধৰং;

সেতচ্ছত্তং ধাৰযিত্ৱান, সযনে পোসেতি মং পিতা.

৫১. ‘‘নিদ্দাযমানো সযনৱৰে, পবুজ্ঝিত্ৱানহং তদা;

অদ্দসং পণ্ডৰং ছত্তং, যেনাহং নিৰযং গতো.

৫২. ‘‘সহ দিট্ঠস্স মে ছত্তং, তাসো উপ্পজ্জি ভেৰৱো;

ৱিনিচ্ছযং সমাপন্নো, ‘কথাহং ইমং মুঞ্চিস্সং’.

৫৩. ‘‘পুব্বসালোহিতা ময্হং, দেৱতা অত্থকামিনী;

সা মং দিস্ৱান দুক্খিতং, তীসু ঠানেসু যোজযি.

৫৪. ‘‘‘মা পণ্ডিচ্চযং ৱিভাৱয, বালমতো ভৱ সব্বপাণিনং;

সব্বো তং জনো ওচিনাযতু, এৱং তৱ অত্থো ভৱিস্সতি’.

৫৫. ‘‘এৱং ৱুত্তাযহং তস্সা, ইদং ৱচনমব্ৰৱিং;

‘কৰোমি তে তং ৱচনং, যং ত্ৱং ভণসি দেৱতে;

অত্থকামাসি মে অম্ম, হিতকামাসি দেৱতে’.

৫৬. ‘‘তস্সাহং ৱচনং সুত্ৱা, সাগৰেৱ থলং লভিং;

হট্ঠো সংৱিগ্গমানসো, তযো অঙ্গে অধিট্ঠহিং.

৫৭. ‘‘মূগো অহোসিং বধিৰো, পক্খো গতিৱিৱজ্জিতো;

এতে অঙ্গে অধিট্ঠায, ৱস্সানি সোড়সং ৱসিং.

৫৮. ‘‘ততো মে হত্থপাদে চ, জিৱ্হং সোতঞ্চ মদ্দিয;

অনূনতং মে পস্সিত্ৱা, ‘কাড়কণ্ণী’তি নিন্দিসুং.

৫৯. ‘‘ততো জানপদা সব্বে, সেনাপতিপুৰোহিতা;

সব্বে একমনা হুত্ৱা, ছড্ডনং অনুমোদিসুং.

৬০. ‘‘সোহং তেসং মতিং সুত্ৱা, হট্ঠো সংৱিগ্গমানসো;

যস্সত্থায তপোচিণ্ণো, সো মে অত্থো সমিজ্ঝথ.

৬১. ‘‘ন্হাপেত্ৱা অনুলিম্পিত্ৱা, ৱেঠেত্ৱা ৰাজৱেঠনং;

ছত্তেন অভিসিঞ্চিত্ৱা, কাৰেসুং পুৰং পদক্খিণং.

৬২. ‘‘সত্তাহং ধাৰযিত্ৱান, উগ্গতে ৰৱিমণ্ডলে;

ৰথেন মং নীহৰিত্ৱা, সাৰথী ৱনমুপাগমি.

৬৩. ‘‘একোকাসে ৰথং কত্ৱা, সজ্জস্সং হত্থমুচ্চিতো [হত্থমুঞ্চিতো (সী. স্যা.)];

সাৰথী খণতী কাসুং, নিখাতুং পথৱিযা মমং.

৬৪. ‘‘অধিট্ঠিতমধিট্ঠানং, তজ্জেন্তো ৱিৱিধকাৰণা;

ন ভিন্দিং তমধিট্ঠানং, বোধিযাযেৱ কাৰণা.

৬৫. ‘‘মাতাপিতা ন মে দেস্সা, অত্তা মে ন চ দেস্সিযো;

সব্বঞ্ঞুতং পিযং ময্হং, তস্মা ৱতমধিট্ঠহিং.

৬৬. ‘‘এতে অঙ্গে অধিট্ঠায, ৱস্সানি সোড়সং ৱসিং;

অধিট্ঠানেন মে সমো নত্থি, এসা মে অধিট্ঠানপাৰমী’’তি.

তেমিযচৰিযং ছট্ঠং.