৪. ভিসচৰিযা

৩৪. ‘‘পুনাপৰং যদা হোমি, কাসীনং পুৰৱৰুত্তমে;

ভগিনী চ ভাতৰো সত্ত, নিব্বত্তা সোত্থিযে কুলে.

৩৫. ‘‘এতেসং পুব্বজো আসিং, হিৰীসুক্কমুপাগতো;

ভৱং দিস্ৱান ভযতো, নেক্খম্মাভিৰতো অহং.

৩৬. ‘‘মাতাপিতূহি পহিতা, সহাযা একমানসা;

কামেহি মং নিমন্তেন্তি, ‘কুলৱংসং ধৰেহি’তি.

৩৭. ‘‘যং তেসং ৱচনং ৱুত্তং, গিহীধম্মে সুখাৱহং;

তং মে অহোসি কঠিনং, তত্ত [সন্তত্ত (ক.)] ফালসমং ৱিয.

৩৮. ‘‘তে মং তদা উক্খিপন্তং, পুচ্ছিংসু পত্থিতং মম;

‘কিং ত্ৱং পত্থযসে সম্ম, যদি কামে ন ভুঞ্জসি’.

৩৯. ‘‘তেসাহং এৱমৱচং, অত্থকামো হিতেসিনং;

‘নাহং পত্থেমি গিহীভাৱং, নেক্খম্মাভিৰতো অহং’.

৪০. ‘‘তে ময্হং ৱচনং সুত্ৱা, পিতুমাতু চ সাৱযুং;

মাতাপিতা এৱমাহু, ‘সব্বেৱ পব্বজাম ভো’.

৪১. ‘‘উভো মাতাপিতা ময্হং, ভগিনী চ সত্ত ভাতৰো;

অমিতধনং ছড্ডযিত্ৱা, পাৱিসিম্হা মহাৱন’’ন্তি.

ভিসচৰিযং চতুত্থং.