৩. অযোঘৰচৰিযা

২৪. ‘‘পুনাপৰং যদা হোমি, কাসিৰাজস্স অত্ৰজো;

অযোঘৰম্হি সংৱড্ঢো, নামেনাসি অযোঘৰো.

২৫. ‘‘দুক্খেন জীৱিতো লদ্ধো, সংপীড়ে পতিপোসিতো;

অজ্জেৱ পুত্ত পটিপজ্জ, কেৱলং ৱসুধং ইমং.

২৬. ‘‘সৰট্ঠকং সনিগমং, সজনং ৱন্দিত্ৱ খত্তিযং;

অঞ্জলিং পগ্গহেত্ৱান, ইদং ৱচনমব্ৰৱিং.

২৭. ‘‘‘যে কেচি মহিযা সত্তা, হীনমুক্কট্ঠমজ্ঝিমা;

নিৰাৰক্খা সকে গেহে, ৱড্ঢন্তি সকঞাতিভি.

২৮. ‘‘‘ইদং লোকে উত্তৰিযং, সংপীড়ে মম পোসনং;

অযোঘৰম্হি সংৱড্ঢো, অপ্পভে চন্দসূৰিযে.

২৯. ‘‘‘পূতিকুণপসম্পুণ্ণা, মুচ্চিত্ৱা মাতু কুচ্ছিতো;

ততো ঘোৰতৰে দুক্খে, পুন পক্খিত্তযোঘৰে.

৩০. ‘‘‘যদিহং তাদিসং পত্ৱা, দুক্খং পৰমদাৰুণং;

ৰজ্জেসু যদি ৰজ্জামি [ৰঞ্জামি (সী.)], পাপানং উত্তমো সিযং.

৩১. ‘‘‘উক্কণ্ঠিতোম্হি কাযেন, ৰজ্জেনম্হি অনত্থিকো;

নিব্বুতিং পৰিযেসিস্সং, যত্থ মং মচ্চু ন মদ্দিযে’.

৩২. ‘‘এৱাহং চিন্তযিত্ৱান, ৱিৰৱন্তে মহাজনে;

নাগোৱ বন্ধনং ছেত্ৱা, পাৱিসিং কাননং ৱনং.

৩৩. ‘‘মাতাপিতা ন মে দেস্সা, নপি মে দেস্সং মহাযসং;

সব্বঞ্ঞুতং পিযং ময্হং, তস্মা ৰজ্জং পৰিচ্চজি’’ন্তি.

অযোঘৰচৰিযং ততিযং.