২. সোমনস্সচৰিযা

৭. ‘‘পুনাপৰং যদা হোমি, ইন্দপত্থে পুৰুত্তমে;

কামিতো দযিতো পুত্তো, সোমনস্সোতি ৱিস্সুতো.

৮. ‘‘সীলৱা গুণসম্পন্নো, কল্যাণপটিভানৱা;

ৱুড্ঢাপচাযী হিৰীমা, সঙ্গহেসু চ কোৱিদো.

৯. ‘‘তস্স ৰঞ্ঞো পতিকৰো, অহোসি কুহকতাপসো;

আৰামং মালাৱচ্ছঞ্চ, ৰোপযিত্ৱান জীৱতি.

১০. ‘‘তমহং দিস্ৱান কুহকং, থুসৰাসিংৱ অতণ্ডুলং;

দুমংৱ অন্তো সুসিৰং, কদলিংৱ অসাৰকং.

১১. ‘‘নত্থিমস্স সতং ধম্মো, সামঞ্ঞাপগতো অযং;

হিৰীসুক্কধম্মজহিতো, জীৱিতৱুত্তিকাৰণা.

১২. ‘‘কুপিতো অহু [অহোসি (সী.), আসি (স্যা.)] পচ্চন্তো, অটৱীহি পৰন্তিহি;

তং নিসেধেতুং গচ্ছন্তো, অনুসাসি পিতা মমং.

১৩. ‘‘‘মা পমজ্জি তুৱং তাত, জটিলং উগ্গতাপনং;

যদিচ্ছকং পৱত্তেহি, সব্বকামদদো হি সো’.

১৪. ‘‘তমহং গন্ত্ৱানুপট্ঠানং, ইদং ৱচনমব্ৰৱিং;

‘কচ্চি তে গহপতি কুসলং, কিং ৱা তে আহৰীযতু’.

১৫. ‘‘তেন সো কুপিতো আসি, কুহকো মাননিস্সিতো;

‘ঘাতাপেমি তুৱং অজ্জ, ৰট্ঠা পব্বাজযামি ৱা’.

১৬. ‘‘নিসেধযিত্ৱা পচ্চন্তং, ৰাজা কুহকমব্ৰৱি;

‘কচ্চি তে ভন্তে খমনীযং, সম্মানো তে পৱত্তিতো’.

১৭. ‘‘তস্স আচিক্খতী পাপো, কুমাৰো যথা নাসিযো;

তস্স তং ৱচনং সুত্ৱা, আণাপেসি মহীপতি.

১৮. ‘‘‘সীসং তত্থেৱ ছিন্দিত্ৱা, কত্ৱান চতুখণ্ডিকং;

ৰথিযা ৰথিযং দস্সেথ, সা গতি জটিলহীড়িতা’.

১৯. ‘‘তত্থ কাৰণিকা গন্ত্ৱা, চণ্ডা লুদ্দা অকাৰুণা;

মাতুঅঙ্কে নিসিন্নস্স, আকড্ঢিত্ৱা নযন্তি মং.

২০. ‘‘তেসাহং এৱমৱচং, বন্ধতং গাড়্হবন্ধনং;

‘ৰঞ্ঞো দস্সেথ মং খিপ্পং, ৰাজকিৰিযানি অত্থি মে’.

২১. ‘‘তে মং ৰঞ্ঞো দস্সযিংসু, পাপস্স পাপসেৱিনো;

দিস্ৱান তং সঞ্ঞাপেসিং, মমঞ্চ ৱসমানযিং.

২২. ‘‘সো মং তত্থ খমাপেসি, মহাৰজ্জমদাসি মে;

সোহং তমং দালযিত্ৱা, পব্বজিং অনগাৰিযং.

২৩. ‘‘ন মে দেস্সং মহাৰজ্জং, কামভোগো ন দেস্সিযো;

সব্বঞ্ঞুতং পিযং ময্হং, তস্মা ৰজ্জং পৰিচ্চজি’’ন্তি.

সোমনস্সচৰিযং দুতিযং.