১. যুধঞ্জযচৰিযা

১. ‘‘যদাহং অমিতযসো, ৰাজপুত্তো যুধঞ্জযো;

উস্সাৱবিন্দুং সূৰিযাতপে, পতিতং দিস্ৱান সংৱিজিং.

২. ‘‘তঞ্ঞেৱাধিপতিং কত্ৱা, সংৱেগমনুব্ৰূহযিং;

মাতাপিতূ চ ৱন্দিত্ৱা, পব্বজ্জমনুযাচহং.

৩. ‘‘যাচন্তি মং পঞ্জলিকা, সনেগমা সৰট্ঠকা;

‘অজ্জেৱ পুত্ত পটিপজ্জ, ইদ্ধং ফীতং মহামহিং’.

৪. ‘‘সৰাজকে সহোৰোধে, সনেগমে সৰট্ঠকে;

কৰুণং পৰিদেৱন্তে, অনপেক্খোৱ পৰিচ্চজিং.

৫. ‘‘কেৱলং পথৱিং ৰজ্জং, ঞাতিপৰিজনং যসং;

চজমানো ন চিন্তেসিং, বোধিযাযেৱ কাৰণা.

৬. ‘‘মাতাপিতা ন মে দেস্সা, নপি মে দেস্সং মহাযসং;

সব্বঞ্ঞুতং পিযং ময্হং, তস্মা ৰজ্জং পৰিচ্চজি’’ন্তি.

যুধঞ্জযচৰিযং পঠমং.