৯. অলীনসত্তুচৰিযা

৭৪. ‘‘পঞ্চালৰট্ঠে নগৰৱৰে, কপিলাযং [কম্পিলাযং (সী.), কপ্পিলাযং (স্যা.)] পুৰুত্তমে;

ৰাজা জযদ্দিসো নাম, সীলগুণমুপাগতো.

৭৫. ‘‘তস্স ৰঞ্ঞো অহং পুত্তো, সুতধম্মো সুসীলৱা;

অলীনসত্তো গুণৱা, অনুৰক্খপৰিজনো সদা.

৭৬. ‘‘পিতা মে মিগৱং গন্ত্ৱা, পোৰিসাদং উপাগমি;

সো মে পিতুমগ্গহেসি, ‘ভক্খোসি মম মা চলি’.

৭৭. ‘‘তস্স তং ৱচনং সুত্ৱা, ভীতো তসিতৱেধিতো;

ঊৰুক্খম্ভো অহু তস্স, দিস্ৱান পোৰিসাদকং.

৭৮. ‘‘মিগৱং গহেত্ৱা মুঞ্চস্সু, কত্ৱা আগমনং পুন;

ব্ৰাহ্মণস্স ধনং দত্ৱা, পিতা আমন্তযী মমং.

৭৯. ‘‘‘ৰজ্জং পুত্ত পটিপজ্জ, মা পমজ্জি পুৰং ইদং;

কতং মে পোৰিসাদেন, মম আগমনং পুন’.

৮০. ‘‘মাতাপিতূ চ ৱন্দিত্ৱা, নিম্মিনিত্ৱান অত্তনা;

নিক্খিপিত্ৱা ধনুং খগ্গং, পোৰিসাদং উপাগমিং.

৮১. ‘‘সসত্থহত্থূপগতং, কদাচি সো তসিস্সতি;

তেন ভিজ্জিস্সতি সীলং, পৰিত্তাসং [পৰিতাসং (সী.)] কতে মযি.

৮২. ‘‘সীলখণ্ডভযা ময্হং, তস্স দেস্সং ন ব্যাহৰিং;

মেত্তচিত্তো হিতৱাদী, ইদং ৱচনমব্ৰৱিং.

৮৩. ‘‘‘উজ্জালেহি মহাঅগ্গিং, পপতিস্সামি ৰুক্খতো;

ত্ৱং পক্ককালমঞ্ঞায [সুপক্ককালমঞ্ঞায (পী.)], ভক্খয মং পিতামহ’.

৮৪. ‘‘ইতি সীলৱতং হেতু, নাৰক্খিং মম জীৱিতং;

পব্বাজেসিং চহং তস্স, সদা পাণাতিপাতিক’’ন্তি.

অলীনসত্তুচৰিযং নৱমং.