১০. সঙ্খপালচৰিযা

৮৫. ‘‘পুনাপৰং যদা হোমি, সঙ্খপালো মহিদ্ধিকো;

দাঠাৱুধো ঘোৰৱিসো, দ্ৱিজিৱ্হো উৰগাধিভূ.

৮৬. ‘‘চতুপ্পথে মহামগ্গে, নানাজনসমাকুলে;

চতুৰো অঙ্গে অধিট্ঠায, তত্থ ৱাসমকপ্পযিং.

৮৭. ‘‘ছৱিযা চম্মেন মংসেন, নহাৰুঅট্ঠিকেহি ৱা;

যস্স এতেন কৰণীযং, দিন্নংযেৱ হৰাতু সো.

৮৮. ‘‘অদ্দসংসু ভোজপুত্তা, খৰা লুদ্দা অকাৰুণা;

উপগঞ্ছুং মমং তত্থ, দণ্ডমুগ্গৰপাণিনো.

৮৯. ‘‘নাসায ৱিনিৱিজ্ঝিত্ৱা, নঙ্গুট্ঠে পিট্ঠিকণ্টকে;

কাজে আৰোপযিত্ৱান, ভোজপুত্তা হৰিংসু মং.

৯০. ‘‘সসাগৰন্তং পথৱিং, সকাননং সপব্বতং;

ইচ্ছমানো চহং তত্থ, নাসাৱাতেন ঝাপযে.

৯১. ‘‘সূলেহি ৱিনিৱিজ্ঝন্তে, কোট্টযন্তেপি সত্তিভি;

ভোজপুত্তে ন কুপ্পামি, এসা মে সীলপাৰমী’’তি.

সঙ্খপালচৰিযং দসমং.

হত্থিনাগৱগ্গো দুতিযো.

তস্সুদ্দানং –

হত্থিনাগো ভূৰিদত্তো, চম্পেয্যো বোধি মহিংসো;

ৰুৰু মাতঙ্গো ধম্মো চ, অত্ৰজো চ জযদ্দিসো.

এতে নৱ সীলবলা, পৰিক্খাৰা পদেসিকা;

জীৱিতং পৰিৰক্খিত্ৱা, সীলানি অনুৰক্খিসং.

সঙ্খপালস্স মে সতো, সব্বকালম্পি জীৱিতং;

যস্স কস্সচি নিয্যত্তং, তস্মা সা সীলপাৰমীতি.

সীলপাৰমিনিদ্দেসো নিট্ঠিতো.