৩. চম্পেয্যনাগচৰিযা

২০. ‘‘পুনাপৰং যদা হোমি, চম্পেয্যকো মহিদ্ধিকো;

তদাপি ধম্মিকো আসিং, সীলব্বতসমপ্পিতো.

২১. ‘‘তদাপি মং ধম্মচাৰিং, উপৱুত্থং উপোসথং;

অহিতুণ্ডিকো গহেত্ৱান, ৰাজদ্ৱাৰম্হি কীড়তি.

২২. ‘‘যং যং সো ৱণ্ণং চিন্তযি, নীলংৱ পীতলোহিতং;

তস্স চিত্তানুৱত্তন্তো, হোমি চিন্তিতসন্নিভো.

২৩. ‘‘থলং কৰেয্যমুদকং, উদকম্পি থলং কৰে;

যদিহং তস্স পকুপ্পেয্যং, খণেন ছাৰিকং কৰে.

২৪. ‘‘যদি চিত্তৱসী হেস্সং, পৰিহাযিস্সামি সীলতো;

সীলেন পৰিহীনস্স, উত্তমত্থো ন সিজ্ঝতি.

২৫. ‘‘কামং ভিজ্জতুযং কাযো, ইধেৱ ৱিকিৰীযতু;

নেৱ সীলং পভিন্দেয্যং, ৱিকিৰন্তে ভুসং ৱিযা’’তি.

চম্পেয্যনাগচৰিযং ততিযং.