৪. চূড়বোধিচৰিযা

২৬. ‘‘পুনাপৰং যদা হোমি, চূড়বোধি সুসীলৱা;

ভৱং দিস্ৱান ভযতো, নেক্খম্মং অভিনিক্খমিং.

২৭. ‘‘যা মে দুতিযিকা আসি, ব্ৰাহ্মণী কনকসন্নিভা;

সাপি ৱট্টে অনপেক্খা, নেক্খম্মং অভিনিক্খমি.

২৮. ‘‘নিৰালযা ছিন্নবন্ধূ, অনপেক্খা কুলে গণে;

চৰন্তা গামনিগমং, বাৰাণসিমুপাগমুং.

২৯. ‘‘তত্থ ৱসাম নিপকা, অসংসট্ঠা কুলে গণে;

নিৰাকুলে অপ্পসদ্দে, ৰাজুয্যানে ৱসামুভো.

৩০. ‘‘উয্যানদস্সনং গন্ত্ৱা, ৰাজা অদ্দস ব্ৰাহ্মণিং;

উপগম্ম মমং পুচ্ছি, ‘তুয্হেসা কা কস্স ভৰিযা’.

৩১. ‘‘এৱং ৱুত্তে অহং তস্স, ইদং ৱচনমব্ৰৱিং;

‘ন ময্হং ভৰিযা এসা, সহধম্মা একসাসনী’.

৩২. ‘‘তিস্সা [তস্সা (সী.)] সাৰত্তগধিতো, গাহাপেত্ৱান চেটকে;

নিপ্পীড়যন্তো বলসা, অন্তেপুৰং পৱেসযি.

৩৩. ‘‘ওদপত্তকিযা ময্হং, সহজা একসাসনী;

আকড্ঢিত্ৱা নযন্তিযা, কোপো মে উপপজ্জথ.

৩৪. ‘‘সহ কোপে সমুপ্পন্নে, সীলব্বতমনুস্সৰিং;

তত্থেৱ কোপং নিগ্গণ্হিং, নাদাসিং ৱড্ঢিতূপৰি.

৩৫. ‘‘যদি নং ব্ৰাহ্মণিং কোচি, কোট্টেয্য তিণ্হসত্তিযা;

নেৱ সীলং পভিন্দেয্যং, বোধিযাযেৱ কাৰণা.

৩৬. ‘‘ন মেসা ব্ৰাহ্মণী দেস্সা, নপি মে বলং ন ৱিজ্জতি;

সব্বঞ্ঞুতং পিযং ময্হং, তস্মা সীলানুৰক্খিস’’ন্তি.

চূড়বোধিচৰিযং চতুত্থং.