২. ভূৰিদত্তচৰিযা

১১. ‘‘পুনাপৰং যদা হোমি, ভূৰিদত্তো মহিদ্ধিকো;

ৱিৰূপক্খেন মহাৰঞ্ঞা, দেৱলোকমগঞ্ছহং.

১২. ‘‘তত্থ পস্সিত্ৱাহং দেৱে, একন্তং সুখসমপ্পিতে;

তং সগ্গগমনত্থায, সীলব্বতং সমাদিযিং.

১৩. ‘‘সৰীৰকিচ্চং কত্ৱান, ভুত্ৱা যাপনমত্তকং;

চতুৰো অঙ্গে অধিট্ঠায, সেমি ৱম্মিকমুদ্ধনি.

১৪. ‘‘ছৱিযা চম্মেন মংসেন, নহাৰুঅট্ঠিকেহি ৱা;

যস্স এতেন কৰণীযং, দিন্নংযেৱ হৰাতু সো.

১৫. ‘‘সংসিতো অকতঞ্ঞুনা, আলম্পাযনো [আলম্বণো (সী.)] মমগ্গহি;

পেড়ায পক্খিপিত্ৱান, কীড়েতি মং তহিং তহিং.

১৬. ‘‘পেড়ায পক্খিপন্তেপি, সম্মদ্দন্তেপি পাণিনা;

আলম্পাযনে [আলম্বণে (সী.)] ন কুপ্পামি, সীলখণ্ডভযা মম.

১৭. ‘‘সকজীৱিতপৰিচ্চাগো, তিণতো লহুকো মম;

সীলৱীতিক্কমো ময্হং, পথৱীউপ্পতনং ৱিয.

১৮. ‘‘নিৰন্তৰং জাতিসতং, চজেয্যং মম জীৱিতং;

নেৱ সীলং পভিন্দেয্যং, চতুদ্দীপান হেতুপি.

১৯. ‘‘অপি চাহং সীলৰক্খায, সীলপাৰমিপূৰিযা;

ন কৰোমি চিত্তে অঞ্ঞথত্তং, পক্খিপন্তম্পি পেড়কে’’তি.

ভূৰিদত্তচৰিযং দুতিযং.