১. মাতুপোসকচৰিযা

১. ‘‘যদা অহোসিং পৱনে, কুঞ্জৰো মাতুপোসকো;

ন তদা অত্থি মহিযা, গুণেন মম সাদিসো.

২. ‘‘পৱনে দিস্ৱা ৱনচৰো, ৰঞ্ঞো মং পটিৱেদযি;

‘তৱানুচ্ছৱো মহাৰাজ, গজো ৱসতি কাননে.

৩. ‘‘‘ন তস্স পৰিক্খাযত্থো, নপি আড়ককাসুযা;

সহ গহিতে [সমং গহিতে (সী.)] সোণ্ডায, সযমেৱ ইধেহি’তি.

৪. ‘‘তস্স তং ৱচনং সুত্ৱা, ৰাজাপি তুট্ঠমানসো;

পেসেসি হত্থিদমকং, ছেকাচৰিযং সুসিক্খিতং.

৫. ‘‘গন্ত্ৱা সো হত্থিদমকো, অদ্দস পদুমস্সৰে;

ভিসমুড়ালং [ভিসমূলং (ক.)] উদ্ধৰন্তং, যাপনত্থায মাতুযা.

৬. ‘‘ৱিঞ্ঞায মে সীলগুণং, লক্খণং উপধাৰযি;

‘এহি পুত্তা’তি পত্ৱান, মম সোণ্ডায অগ্গহি.

৭. ‘‘যং মে তদা পাকতিকং, সৰীৰানুগতং বলং;

অজ্জ নাগসহস্সানং, বলেন সমসাদিসং.

৮. ‘‘যদিহং তেসং পকুপ্পেয্যং, উপেতানং গহণায মং;

পটিবলো ভৱে তেসং, যাৱ ৰজ্জম্পি মানুসং.

৯. ‘‘অপি চাহং সীলৰক্খায, সীলপাৰমিপূৰিযা;

ন কৰোমি চিত্তে অঞ্ঞথত্তং, পক্খিপন্তং মমাড়কে.

১০. ‘‘যদি তে মং তত্থ কোট্টেয্যুং, ফৰসূহি তোমৰেহি চ;

নেৱ তেসং পকুপ্পেয্যং, সীলখণ্ডভযা মমা’’তি.

মাতুপোসকচৰিযং পঠমং.