(৩১-৩২) সমদন্তসুসুক্কদাঠালক্খণানি

২৪০. ‘‘যম্পি, ভিক্খৱে, তথাগতো পুৰিমং জাতিং পুৰিমং ভৱং পুৰিমং নিকেতং পুব্বে মনুস্সভূতো সমানো মিচ্ছাজীৱং পহায সম্মাআজীৱেন জীৱিকং কপ্পেসি, তুলাকূট কংসকূট মানকূট উক্কোটন ৱঞ্চন নিকতি সাচিযোগ ছেদন ৱধ বন্ধন ৱিপৰামোস আলোপ সহসাকাৰা [সাহসাকাৰা (সী. স্যা. পী.)] পটিৱিৰতো অহোসি. সো তস্স কম্মস্স কটত্তা উপচিতত্তা উস্সন্নত্তা ৱিপুলত্তা কাযস্স ভেদা পৰং মৰণা সুগতিং সগ্গং লোকং উপপজ্জতি. সো তত্থ অঞ্ঞে দেৱে দসহি ঠানেহি অধিগণ্হাতি দিব্বেন আযুনা দিব্বেন ৱণ্ণেন দিব্বেন সুখেন দিব্বেন যসেন দিব্বেন আধিপতেয্যেন দিব্বেহি ৰূপেহি দিব্বেহি সদ্দেহি দিব্বেহি গন্ধেহি দিব্বেহি ৰসেহি দিব্বেহি ফোট্ঠব্বেহি. সো ততো চুতো ইত্থত্তং আগতো সমানো ইমানি দ্ৱে মহাপুৰিসলক্খণানি পটিলভতি, সমদন্তো চ হোতি সুসুক্কদাঠো চ.

‘‘সো তেহি লক্খণেহি সমন্নাগতো সচে অগাৰং অজ্ঝাৱসতি, ৰাজা হোতি চক্কৱত্তী ধম্মিকো ধম্মৰাজা চাতুৰন্তো ৱিজিতাৱী জনপদত্থাৱৰিযপ্পত্তো সত্তৰতনসমন্নাগতো. তস্সিমানি সত্ত ৰতনানি ভৱন্তি, সেয্যথিদং – চক্কৰতনং হত্থিৰতনং অস্সৰতনং মণিৰতনং ইত্থিৰতনং গহপতিৰতনং পৰিণাযকৰতনমেৱ সত্তমং. পৰোসহস্সং খো পনস্স পুত্তা ভৱন্তি সূৰা ৱীৰঙ্গৰূপা পৰসেনপ্পমদ্দনা. সো ইমং পথৱিং সাগৰপৰিযন্তং অখিলমনিমিত্তমকণ্টকং ইদ্ধং ফীতং খেমং সিৱং নিৰব্বুদং অদণ্ডেন অসত্থেন ধম্মেন অভিৱিজিয অজ্ঝাৱসতি. ৰাজা সমানো কিং লভতি? সুচিপৰিৱাৰো হোতি সুচিস্স হোন্তি পৰিৱাৰা ব্ৰাহ্মণগহপতিকা নেগমজানপদা গণকমহামত্তা অনীকট্ঠা দোৱাৰিকা অমচ্চা পাৰিসজ্জা ৰাজানো ভোগিযা কুমাৰা. ৰাজা সমানো ইদং লভতি.

‘‘সচে খো পন অগাৰস্মা অনগাৰিযং পব্বজতি, অৰহং হোতি সম্মাসম্বুদ্ধো লোকে ৱিৱট্টচ্ছদো. বুদ্ধো সমানো কিং লভতি? সুচিপৰিৱাৰো হোতি, সুচিস্স হোন্তি পৰিৱাৰা, ভিক্খূ ভিক্খুনিযো উপাসকা উপাসিকাযো দেৱা মনুস্সা অসুৰা নাগা গন্ধব্বা. বুদ্ধো সমানো ইদং লভতি’’. এতমত্থং ভগৱা অৱোচ.

২৪১. তত্থেতং ৱুচ্চতি –

‘‘মিচ্ছাজীৱঞ্চ অৱস্সজি সমেন ৱুত্তিং,

সুচিনা সো জনযিত্থ ধম্মিকেন;

অহিতমপি চ অপনুদি,

হিতমপি চ বহুজনসুখঞ্চ অচৰি.

‘‘সগ্গে ৱেদযতি নৰো সুখপ্ফলানি,

কৰিত্ৱা নিপুণেভি ৱিদূহি সব্ভি;

ৱণ্ণিতানি তিদিৱপুৰৱৰসমো,

অভিৰমতি ৰতিখিড্ডাসমঙ্গী.

‘‘লদ্ধানং মানুসকং ভৱং ততো,

চৱিত্ৱান সুকতফলৱিপাকং;

সেসকেন পটিলভতি লপনজং,

সমমপি সুচিসুসুক্কং [লদ্ধান মনুস্সকং ভৱং ততো চৱিয, পুন সুকতফলৱিপাকসেসকেন; পটিলভতি লপনজং সমমপি, সুচি চ সুৱিসুদ্ধসুসুক্কং (স্যা.)].

‘‘তং ৱেয্যঞ্জনিকা সমাগতা বহৱো,

ব্যাকংসু নিপুণসম্মতা মনুজা;

সুচিজনপৰিৱাৰগণো ভৱতি,

দিজসমসুক্কসুচিসোভনদন্তো.

‘‘ৰঞ্ঞো হোতি বহুজনো,

সুচিপৰিৱাৰো মহতিং মহিং অনুসাসতো;

পসয্হ ন চ জনপদতুদনং,

হিতমপি চ বহুজনসুখঞ্চ চৰন্তি.

‘‘অথ চে পব্বজতি ভৱতি ৱিপাপো,

সমণো সমিতৰজো ৱিৱট্টচ্ছদো;

ৱিগতদৰথকিলমথো,

ইমমপি চ পৰমপি চ [ইমম্পি চ পৰম্পি চ (পী.), পৰংপি পৰমংপি চ (স্যা.)] পস্সতি লোকং.

‘‘তস্সোৱাদকৰা বহুগিহী চ পব্বজিতা চ,

অসুচিং গৰহিতং ধুনন্তি পাপং;

স হি সুচিভি পৰিৱুতো ভৱতি,

মলখিলকলিকিলেসে পনুদেহী’’তি [তস্সোৱাদকৰা বহুগিহী চ, পব্বজিতা চ অসুচিৱিগৰহিত; পনুদিপাপস্স হি সুচিভিপৰিৱুতো, ভৱতি মলখিলককিলেসে পনুদেতি (স্যা.)].

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

লক্খণসুত্তং নিট্ঠিতং সত্তমং.