(২) দেসনাগামিনিযাদিৱণ্ণনা

৪৭৫. পঞ্চ দেসনাগামিনিযোতি লহুকা পঞ্চ. ছ সপ্পটিকম্মাতি পাৰাজিকং ঠপেত্ৱা অৱসেসা. একেত্থ অপ্পটিকম্মাতি একা পাৰাজিকাপত্তি.

ৱিনযগৰুকা দ্ৱে ৱুত্তাতি পাৰাজিকঞ্চেৱ সঙ্ঘাদিসেসঞ্চ. কাযৱাচসিকানি চাতি সব্বানেৱ সিক্খাপদানি কাযৱাচসিকানি, মনোদ্ৱাৰে পঞ্ঞত্তং একসিক্খাপদম্পি নত্থি. একো ৱিকালে ধঞ্ঞৰসোতি লোণসোৱীৰকং. অযমেৱ হি একো ধঞ্ঞৰসো ৱিকালে ৱট্টতি. একা ঞত্তিচতুত্থেন সম্মুতীতি ভিক্খুনোৱাদকসম্মুতি. অযমেৱ হি একা ঞত্তিচতুত্থকম্মেন সম্মুতি অনুঞ্ঞাতা.

পাৰাজিকা কাযিকা দ্ৱেতি ভিক্খূনং মেথুনপাৰাজিকং ভিক্খুনীনঞ্চ কাযসংসগ্গপাৰাজিকং. দ্ৱে সংৱাসভূমিযোতি অত্তনা ৱা অত্তানং সমানসংৱাসকং কৰোতি, সমগ্গো ৱা সঙ্ঘো উক্খিত্তং ওসাৰেতি. কুৰুন্দিযং পন ‘‘সমানসংৱাসকভূমি চ নানাসংৱাসকভূমি চা’’তি এৱং দ্ৱে সংৱাসভূমিযো ৱুত্তা. দ্ৱিন্নং ৰত্তিচ্ছেদোতি পাৰিৱাসিকস্স চ মানত্তচাৰিকস্স চ পঞ্ঞত্তা. দ্ৱঙ্গুলা দুৱেতি দ্ৱে দ্ৱঙ্গুলপঞ্ঞত্তিযো, ‘‘দ্ৱঙ্গুলপব্বপৰমং আদাতব্ব’’ন্তি অযমেকা, ‘‘দ্ৱঙ্গুলং ৱা দ্ৱেমাসং ৱা’’তি অযমেকা.

দ্ৱে অত্তানং ৱধিত্ৱানাতি ভিক্খুনী অত্তানং ৱধিত্ৱা দ্ৱে আপত্তিযো আপজ্জতি; ৱধতি ৰোদতি, আপত্তি পাচিত্তিযস্স; ৱধতি ন ৰোদতি, আপত্তি দুক্কটস্স. দ্ৱীহি সঙ্ঘো ভিজ্জতীতি কম্মেন চ সলাকগ্গাহেন চ. দ্ৱেত্থ পঠমাপত্তিকাতি এত্থ সকলেপি ৱিনযে দ্ৱে পঠমাপত্তিকা উভিন্নং পঞ্ঞত্তিৱসেন. ইতৰথা পন নৱ ভিক্খূনং নৱ ভিক্খুনীনন্তি অট্ঠাৰস হোন্তি. ঞত্তিযা কৰণা দুৱেতি দ্ৱে ঞত্তিকিচ্চানি – কম্মঞ্চ কম্মপাদকা চ. নৱসু ঠানেসু কম্মং হোতি, দ্ৱীসু কম্মপাদভাৱেন তিট্ঠতি.

পাণাতিপাতে তিস্সোতি ‘‘অনোদিস্স ওপাতং খণতি, সচে মনুস্সো মৰতি, পাৰাজিকং; যক্খপেতানং মৰণে থুল্লচ্চযং; তিৰচ্ছানগতস্স মৰণে পাচিত্তিয’’ন্তি ইমা তিস্সো হোন্তি. ৱাচা পাৰাজিকা তযোতি ৱজ্জপটিচ্ছাদিকায উক্খিত্তানুৱত্তিকায অট্ঠৱত্থুকাযাতি. কুৰুন্দিযং পন ‘‘আণত্তিযা অদিন্নাদানে, মনুস্সমৰণে, উত্তৰিমনুস্সধম্মউল্লপনে চা’’তি এৱং তযো ৱুত্তা. ওভাসনা তযোতি ৱচ্চমগ্গং পস্সাৱমগ্গং আদিস্স ৱণ্ণাৱণ্ণভাসনে সঙ্ঘাদিসেসো, ৱচ্চমগ্গং পস্সাৱমগ্গং ঠপেত্ৱা অধক্খকং উব্ভজাণুমণ্ডলং আদিস্স ৱণ্ণাৱণ্ণভণনে থুল্লচ্চযং, উব্ভক্খকং অধোজাণুমণ্ডলং আদিস্স ৱণ্ণাৱণ্ণভণনে দুক্কটং. সঞ্চৰিত্তেন ৱা তযোতি পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স; পটিগ্গণ্হাতি ৱীমংসতি ন পচ্চাহৰতি, আপত্তি থুল্লচ্চযস্স; পটিগ্গণ্হাতি ন ৱীমংসতি ন পচ্চাহৰতি, আপত্তি দুক্কটস্সাতি ইমে সঞ্চৰিত্তেন কাৰণভূতেন তযো আপত্তিক্খন্ধা হোন্তি.

তযো পুগ্গলা ন উপসম্পাদেতব্বাতি অদ্ধানহীনো অঙ্গহীনো ৱত্থুৱিপন্নো চ তেসং নানাকৰণং ৱুত্তমেৱ. অপিচেত্থ যো পত্তচীৱৰেন অপৰিপূৰো, পৰিপূৰো চ ন যাচতি, ইমেপি অঙ্গহীনেনেৱ সঙ্গহিতা. মাতুঘাতকাদযো চ কৰণদুক্কটকা পণ্ডকউভতোব্যঞ্জনকতিৰচ্ছানগতসঙ্খাতেন ৱত্থুৱিপন্নেনেৱ সঙ্গহিতাতি ৱেদিতব্বা. এস নযো কুৰুন্দিযং ৱুত্তো. তযো কম্মানং সঙ্গহাতি ঞত্তিকপ্পনা, ৱিপ্পকতপচ্চত্তং, অতীতকৰণন্তি. তত্থ ‘‘দদেয্য কৰেয্যা’’তিআদিভেদা ঞত্তিকপ্পনা; ‘‘দেতি কৰোতী’’তিআদিভেদং ৱিপ্পকতপচ্চত্তং; ‘‘দিন্নং কত’’ন্তিআদিভেদং অতীতকৰণং নামাতি ইমেহি তীহি কম্মানি সঙ্গয্হন্তি. অপৰেহিপি তীহি কম্মানি সঙ্গয্হন্তি – ৱত্থুনা, ঞত্তিযা, অনুস্সাৱনাযাতি. ৱত্থুসম্পন্নঞ্হি ঞত্তিসম্পন্নং অনুস্সাৱনসম্পন্নঞ্চ কম্মং নাম হোতি, তেন ৱুত্তং ‘‘তযো কম্মানং সঙ্গহা’’তি. নাসিতকা তযো নাম মেত্তিযং ভিক্খুনিং নাসেথ, দূসকো নাসেতব্বো, দসহঙ্গেহি সমন্নাগতো সামণেৰো নাসেতব্বো, কণ্টকং সমণুদ্দেসং নাসেথাতি এৱং লিঙ্গসংৱাসদণ্ডকম্মনাসনাৱসেন তযো নাসিতকা ৱেদিতব্বা. তিণ্ণন্নং একৱাচিকাতি ‘‘অনুজানামি ভিক্খৱে দ্ৱে তযো একানুস্সাৱনে কাতু’’ন্তি ৱচনতো তিণ্ণং জনানং একুপজ্ঝাযেন নানাচৰিযেন একানুস্সাৱনা ৱট্টতি.

অদিন্নাদানে তিস্সোতি পাদে ৱা অতিৰেকপাদে ৱা পাৰাজিকং, অতিৰেকমাসকে থুল্লচ্চযং, মাসকে ৱা ঊনমাসকে ৱা দুক্কটং. চতস্সো মেথুনপচ্চযাতি অক্খযিতে পাৰাজিকং, যেভুয্যেন খযিতে থুল্লচ্চযং, ৱিৱটকতে মুখে দুক্কটং, জতুমট্ঠকে পাচিত্তিযং. ছিন্দন্তস্স তিস্সোতি ৱনপ্পতিং ছিন্দন্তস্স পাৰাজিকং, ভূতগামে পাচিত্তিযং, অঙ্গজাতে থুল্লচ্চযং. পঞ্চ ছড্ডিতপচ্চযাতি অনোদিস্স ৱিসং ছড্ডেতি, সচে তেন মনুস্সো মৰতি, পাৰাজিকং; যক্খপেতেসু থুল্লচ্চযং; তিৰচ্ছানগতে পাচিত্তিযং; ৱিস্সট্ঠিছড্ডনে সঙ্ঘাদিসেসো; সেখিযেসু হৰিতে উচ্চাৰপস্সাৱছড্ডনে দুক্কটং – ইমা ছড্ডিতপচ্চযা পঞ্চাপত্তিযো হোন্তি.

পাচিত্তিযেন দুক্কটা কতাতি ভিক্খুনোৱাদকৱগ্গস্মিং দসসু সিক্খাপদেসু পাচিত্তিযেন সদ্ধিং দুক্কটা কতা এৱাতি অত্থো. চতুৰেত্থ নৱকা ৱুত্তাতি পঠমসিক্খাপদম্হিযেৱ অধম্মকম্মে দ্ৱে, ধম্মকম্মে দ্ৱেতি এৱং চত্তাৰো নৱকা ৱুত্তাতি অত্থো. দ্ৱিন্নং চীৱৰেন চাতি ভিক্খূনং সন্তিকে উপসম্পন্নায চীৱৰং দেন্তস্স পাচিত্তিযং, ভিক্খুনীনং সন্তিকে উপসম্পন্নায দেন্তস্স দুক্কটন্তি এৱং দ্ৱিন্নং ভিক্খুনীনং চীৱৰং দেন্তস্স চীৱৰেন কাৰণভূতেন আপত্তি হোতীতি অত্থো.

অট্ঠ পাটিদেসনীযাতি পাড়িযং আগতা এৱ. ভুঞ্জন্তামকধঞ্ঞেন পাচিত্তিযেন দুক্কটা কতাতি আমকধঞ্ঞং ৱিঞ্ঞাপেত্ৱা ভুঞ্জন্তিযা পাচিত্তিযেন সদ্ধিং দুক্কটা কতাযেৱ.

গচ্ছন্তস্স চতস্সোতি ভিক্খুনিযা ৱা মাতুগামেন ৱা সদ্ধিং সংৱিধায গচ্ছন্তস্স দুক্কটং, গামূপচাৰোক্কমনে পাচিত্তিযং, যা ভিক্খুনী একা গামন্তৰং গচ্ছতি, তস্সা গামূপচাৰং ওক্কমন্তিযা পঠমপাদে থুল্লচ্চযং, দুতিযপাদে সঙ্ঘাদিসেসোতি গচ্ছন্তস্স ইমা চতস্সো আপত্তিযো হোন্তি. ঠিতস্স চাপি তত্তকাতি ঠিতস্সপি চতস্সো এৱাতি অত্থো. কথং? ভিক্খুনী অন্ধকাৰে ৱা পটিচ্ছন্নে ৱা ওকাসে মিত্তসন্থৱৱসেন পুৰিসস্স হত্থপাসে তিট্ঠতি, পাচিত্তিযং; হত্থপাসং ৱিজহিত্ৱা তিট্ঠতি, দুক্কটং; অৰুণুগ্গমনকালে দুতিযিকায হত্থপাসং ৱিজহন্তী তিট্ঠতি, থুল্লচ্চযং; ৱিজহিত্ৱা তিট্ঠতি, সঙ্ঘাদিসেসোতি নিসিন্নস্স চতস্সো আপত্তিযো. নিপন্নস্সাপি তত্তকাতি সচেপি হি সা নিসীদতি ৱা নিপজ্জতি ৱা, এতাযেৱ চতস্সো আপত্তিযো আপজ্জতি.