৬. কুটিকাৰসিক্খাপদৱণ্ণনা

৩৪২. তেন সমযেনাতি কুটিকাৰসিক্খাপদং. তত্থ আড়ৱকাতি আড়ৱিৰট্ঠে জাতা দাৰকা আড়ৱকা নাম, তে পব্বজিতকালেপি ‘‘আড়ৱকা’’ত্ৱেৱ পঞ্ঞাযিংসু. তে সন্ধায ৱুত্তং ‘‘আড়ৱকা ভিক্খূ’’তি. সঞ্ঞাচিকাযোতি সযং যাচিত্ৱা গহিতূপকৰণাযো. কাৰাপেন্তীতি কৰোন্তিপি কাৰাপেন্তিপি, তে কিৰ সাসনে ৱিপস্সনাধুৰঞ্চ গন্থধুৰঞ্চাতি দ্ৱেপি ধুৰানি ছড্ডেত্ৱা নৱকম্মমেৱ ধুৰং কত্ৱা পগ্গণ্হিংসু. অস্সামিকাযোতি অনিস্সৰাযো, কাৰেতা দাযকেন ৱিৰহিতাযোতি অত্থো. অত্তুদ্দেসিকাযোতি অত্তানং উদ্দিস্স অত্তনো অত্থায আৰদ্ধাযোতি অত্থো. অপ্পমাণিকাযোতি ‘‘এত্তকেন নিট্ঠং গচ্ছিস্সন্তী’’তি এৱং অপৰিচ্ছিন্নপ্পমাণাযো, ৱুদ্ধিপ্পমাণাযো ৱা মহন্তপ্পমাণাযোতি অত্থো.

যাচনা এৱ বহুলা এতেসং মন্দং অঞ্ঞং কম্মন্তি যাচনবহুলা. এৱং ৱিঞ্ঞত্তিবহুলা ৱেদিতব্বা. অত্থতো পনেত্থ নানাকৰণং নত্থি, অনেকক্খত্তুং ‘‘পুৰিসং দেথ, পুৰিসত্থকৰং দেথা’’তি যাচন্তানমেতং অধিৱচনং. তত্থ মূলচ্ছেজ্জায পুৰিসং যাচিতুং ন ৱট্টতি, সহাযত্থায কম্মকৰণত্থায ‘‘পুৰিসং দেথা’’তি যাচিতুং ৱট্টতি. পুৰিসত্থকৰন্তি পুৰিসেন কাতব্বং হত্থকম্মং ৱুচ্চতি, তং যাচিতুং ৱট্টতি. হত্থকম্মং নাম কিঞ্চি ৱত্থু ন হোতি, তস্মা ঠপেত্ৱা মিগলুদ্দকমচ্ছবন্ধকাদীনং সককম্মং অৱসেসং সব্বং কপ্পিযং. ‘‘কিং, ভন্তে, আগতত্থ কেন কম্ম’’ন্তি পুচ্ছিতে ৱা অপুচ্ছিতে ৱা যাচিতুং ৱট্টতি, ৱিঞ্ঞত্তিপচ্চযা দোসো নত্থি. তস্মা মিগলুদ্দকাদযো সককম্মং ন যাচিতব্বা, ‘‘হত্থকম্মং দেথা’’তি অনিযমেত্ৱাপি ন যাচিতব্বা; এৱং যাচিতা হি তে ‘‘সাধু, ভন্তে’’তি ভিক্খূ উয্যোজেত্ৱা মিগেপি মাৰেত্ৱা আহৰেয্যুং. নিযমেত্ৱা পন ‘‘ৱিহাৰে কিঞ্চি কত্তব্বং অত্থি, তত্থ হত্থকম্মং দেথা’’তি যাচিতব্বা. ফালনঙ্গলাদীনি উপকৰণানি গহেত্ৱা কসিতুং ৱা ৱপিতুং ৱা লাযিতুং ৱা গচ্ছন্তং সকিচ্চপসুতম্পি কস্সকং ৱা অঞ্ঞং ৱা কিঞ্চি হত্থকম্মং যাচিতুং ৱট্টতেৱ. যো পন ৱিঘাসাদো ৱা অঞ্ঞো ৱা কোচি নিক্কম্মো নিৰত্থককথং কথেন্তো নিদ্দাযন্তো ৱা ৱিহৰতি, এৱৰূপং অযাচিত্ৱাপি ‘‘এহি ৰে ইদং ৱা ইদং ৱা কৰোহী’’তি যদিচ্ছকং কাৰাপেতুং ৱট্টতি.

হত্থকম্মস্স পন সব্বকপ্পিযভাৱদীপনত্থং ইমং নযং কথেন্তি. সচে হি ভিক্খু পাসাদং কাৰেতুকামো হোতি, থম্ভত্থায পাসাণকোট্টকানং ঘৰং গন্ত্ৱা ৱত্তব্বং ‘‘হত্থকম্মং লদ্ধুং ৱট্টতি উপাসকা’’তি. কিং কাতব্বং, ভন্তে,তি? পাসাণত্থম্ভা উদ্ধৰিত্ৱা দাতব্বাতি. সচে তে উদ্ধৰিত্ৱা ৱা দেন্তি, উদ্ধৰিত্ৱা নিক্খিত্তে অত্তনো থম্ভে ৱা দেন্তি, ৱট্টতি. অথাপি ৱদন্তি – ‘‘অম্হাকং, ভন্তে, হত্থকম্মং কাতুং খণো নত্থি, অঞ্ঞং উদ্ধৰাপেথ, তস্স মূলং দস্সামা’’তি উদ্ধৰাপেত্ৱা ‘‘পাসাণত্থম্ভে উদ্ধটমনুস্সানং মূলং দেথা’’তি ৱত্তুং ৱট্টতি. এতেনেৱুপাযেন পাসাদদাৰূনং অত্থায ৱড্ঢকীনং সন্তিকং ইট্ঠকত্থায ইট্ঠকৱড্ঢকীনং ছদনত্থায গেহচ্ছাদকানং চিত্তকম্মত্থায চিত্তকাৰানন্তি যেন যেন অত্থো হোতি, তস্স তস্স অত্থায তেসং তেসং সিপ্পকাৰকানং সন্তিকং গন্ত্ৱা হত্থকম্মং যাচিতুং ৱট্টতি. হত্থকম্মযাচনৱসেন চ মূলচ্ছেজ্জায ৱা ভত্তৱেতনানুপ্পদানেন ৱা লদ্ধম্পি সব্বং গহেতুং ৱট্টতি. অৰঞ্ঞতো আহৰাপেন্তেন চ সব্বং অনজ্ঝাৱুত্থকং আহৰাপেতব্বং.

ন কেৱলঞ্চ পাসাদং কাৰেতুকামেন মঞ্চপীঠপত্তপৰিস্সাৱনধমকৰকচীৱৰাদীনি কাৰাপেতুকামেনাপি দাৰুলোহসুত্তাদীনি লভিত্ৱা তে তে সিপ্পকাৰকে উপসঙ্কমিত্ৱা ৱুত্তনযেনেৱ হত্থকম্মং যাচিতব্বং. হত্থকম্মযাচনৱসেন চ মূলচ্ছেজ্জায ৱা ভত্তৱেতনানুপ্পদানেন ৱা লদ্ধম্পি সব্বং গহেতব্বং. সচে পন কাতুং ন ইচ্ছন্তি, ভত্তৱেতনং পচ্চাসীসন্তি, অকপ্পিযকহাপণাদি ন দাতব্বং. ভিক্খাচাৰৱত্তেন তণ্ডুলাদীনি পৰিযেসিত্ৱা দাতুং ৱট্টতি.

হত্থকম্মৱসেন পত্তং কাৰেত্ৱা তথেৱ পাচেত্ৱা নৱপক্কস্স পত্তস্স পুঞ্ছনতেলত্থায অন্তোগামং পৱিট্ঠেন ‘‘ভিক্খায আগতো’’তি সল্লক্খেত্ৱা যাগুযা ৱা ভত্তে ৱা আনীতে হত্থেন পত্তো পিধাতব্বো. সচে উপাসিকা ‘‘কিং, ভন্তে’’তি পুচ্ছতি, ‘‘নৱপক্কো পত্তো পুঞ্ছনতেলেন অত্থো’’তি ৱত্তব্বং. সচে সা ‘‘দেহি, ভন্তে’’তি পত্তং গহেত্ৱা তেলেন পুঞ্ছিত্ৱা যাগুযা ৱা ভত্তস্স ৱা পূৰেত্ৱা দেতি, ৱিঞ্ঞত্তি নাম ন হোতি, গহেতুং ৱট্টতীতি.

ভিক্খূ পগেৱ পিণ্ডায চৰিত্ৱা আসনসালং গন্ত্ৱা আসনং অপস্সন্তা তিট্ঠন্তি. তত্ৰ চে উপাসকা ভিক্খূ ঠিতে দিস্ৱা সযমেৱ আসনানি আহৰাপেন্তি, নিসীদিত্ৱা গচ্ছন্তেহি আপুচ্ছিত্ৱা গন্তব্বং. অনাপুচ্ছা গতানম্পি নট্ঠং গীৱা ন হোতি, আপুচ্ছিত্ৱা গমনং পন ৱত্তং. সচে ভিক্খূহি ‘‘আসনানি আহৰথা’’তি ৱুত্তেহি আহটানি হোন্তি, আপুচ্ছিত্ৱাৱ গন্তব্বং. অনাপুচ্ছা গতানং ৱত্তভেদো চ নট্ঠঞ্চ গীৱাতি. অত্থৰণকোজৱাদীসুপি এসেৱ নযো.

মক্খিকাযো বহুকা হোন্তি, ‘‘মক্খিকাবীজনিং আহৰথা’’তি ৱত্তব্বং. পুচিমন্দসাখাদীনি আহৰন্তি, কপ্পিযং কাৰাপেত্ৱা পটিগ্গহেতব্বানি. আসনসালায উদকভাজনং ৰিত্তং হোতি, ‘‘ধমকৰণং গণ্হা’’তি ন ৱত্তব্বং. ধমকৰকঞ্হি ৰিত্তভাজনে পক্খিপন্তো ভিন্দেয্য ‘‘নদিং ৱা তড়াকং ৱা গন্ত্ৱা পন উদকং আহৰা’’তি ৱত্তুং ৱট্টতি. ‘‘গেহতো আহৰা’’তি নেৱ ৱত্তুং ৱট্টতি, ন আহটং পৰিভুঞ্জিতব্বং. আসনসালাযং ৱা অৰঞ্ঞকে ৱা ভত্তকিচ্চং কৰোন্তেহি তত্থজাতকং অনজ্ঝাৱুত্থকং যংকিঞ্চি উত্তৰিভঙ্গাৰহং পত্তং ৱা ফলং ৱা সচে কিঞ্চি কম্মং কৰোন্তং আহৰাপেতি, হত্থকম্মৱসেন আহৰাপেত্ৱা পৰিভুঞ্জিতুং ৱট্টতি. অলজ্জীহি পন ভিক্খূহি ৱা সামণেৰেহি ৱা হত্থকম্মং ন কাৰেতব্বং. অযং তাৱ পুৰিসত্থকৰে নযো.

গোণং পন অঞ্ঞাতকঅপ্পৱাৰিতট্ঠানতো আহৰাপেতুং ন ৱট্টতি, আহৰাপেন্তস্স দুক্কটং. ঞাতিপৱাৰিতট্ঠানতোপি মূলচ্ছেজ্জায যাচিতুং ন ৱট্টতি, তাৱকালিকনযেন সব্বত্থ ৱট্টতি. এৱং আহৰাপিতঞ্চ গোণং ৰক্খিত্ৱা জগ্গিত্ৱা সামিকা পটিচ্ছাপেতব্বা. সচস্স পাদো ৱা সিঙ্গং ৱা ভিজ্জতি ৱা নস্সতি ৱা সামিকা চে সম্পটিচ্ছন্তি, ইচ্চেতং কুসলং. নো চে সম্পটিচ্ছন্তি, গীৱা হোতি. সচে ‘‘তুম্হাকংযেৱ দেমা’’তি ৱদন্তি ন সম্পটিচ্ছিতব্বং. ‘‘ৱিহাৰস্স দেমা’’তি ৱুত্তে পন ‘‘আৰামিকানং আচিক্খথ জগ্গনত্থাযা’’তি ৱত্তব্বং.

‘‘সকটং দেথা’’তিপি অঞ্ঞাতকঅপ্পৱাৰিতে ৱত্তুং ন ৱট্টতি, ৱিঞ্ঞত্তিএৱ হোতি দুক্কটং আপজ্জতি. ঞাতিপৱাৰিতট্ঠানে পন ৱট্টতি, তাৱকালিকং ৱট্টতি কম্মং কত্ৱা পুন দাতব্বং. সচে নেমিযাদীনি ভিজ্জন্তি পাকতিকানি কত্ৱা দাতব্বং. নট্ঠে গীৱা হোতি. ‘‘তুম্হাকমেৱ দেমা’’তি ৱুত্তে দাৰুভণ্ডং নাম সম্পটিচ্ছিতুং ৱট্টতি. এস নযো ৱাসিফৰসুকুঠাৰীকুদালনিখাদনেসু. ৱল্লিআদীসু চ পৰপৰিগ্গহিতেসু. গৰুভণ্ডপ্পহোনকেসুযেৱ চ ৱল্লিআদীসু ৱিঞ্ঞত্তি হোতি, ন ততো ওৰং.

অনজ্ঝাৱুত্থকং পন যংকিঞ্চি আহৰাপেতুং ৱট্টতি. ৰক্খিতগোপিতট্ঠানেযেৱ হি ৱিঞ্ঞত্তি নাম ৱুচ্চতি. সা দ্ৱীসু পচ্চযেসু সব্বেন সব্বং ন ৱট্টতি, সেনাসনপচ্চযে পন ‘‘আহৰ দেহী’’তি ৱিঞ্ঞত্তিমত্তমেৱ ন ৱট্টতি, পৰিকথোভাসনিমিত্তকম্মানি ৱট্টন্তি. তত্থ উপোসথাগাৰং ৱা ভোজনসালং ৱা অঞ্ঞং ৱা যংকিঞ্চি সেনাসনং ইচ্ছতো ‘‘ইমস্মিং ৱত ওকাসে এৱৰূপং সেনাসনং কাতুং ৱট্টতী’’তি ৱা ‘‘যুত্ত’’ন্তি ৱা ‘‘অনুৰূপ’’ন্তি ৱাতিআদিনা নযেন ৱচনং পৰিকথা নাম. ‘‘উপাসকা তুম্হে কুহিং ৱসথা’’তি? ‘‘পাসাদে, ভন্তে’’তি. ‘‘কিং ভিক্খূনং পন উপাসকা পাসাদো ন ৱট্টতী’’তি এৱমাদিৱচনং ওভাসো নাম. মনুস্সে দিস্ৱা ৰজ্জুং পসাৰেতি, খীলে আকোটাপেতি. ‘‘কিং ইদং, ভন্তে’’তি ৱুত্তে ‘‘ইধ আৱাসং কৰিস্সামা’’তি এৱমাদিকৰণং পন নিমিত্তকম্মং নাম. গিলানপচ্চযে পন ৱিঞ্ঞত্তিপি ৱট্টতি, পগেৱ পৰিকথাদীনি.

মনুস্সা উপদ্দুতা যাচনায উপদ্দুতা ৱিঞ্ঞত্তিযাতি তেসং ভিক্খূনং তায যাচনায চ ৱিঞ্ঞত্তিযা চ পীড়িতা. উব্বিজ্জন্তিপীতি ‘‘কিং নু আহৰাপেস্সন্তী’’তি উব্বেগং ইঞ্জনং চলনং পটিলভন্তি. উত্তসন্তিপীতি অহিং ৱিয দিস্ৱা সহসা তসিত্ৱা উক্কমন্তি. পলাযন্তিপীতি দূৰতোৱ যেন ৱা তেন ৱা পলাযন্তি. অঞ্ঞেনপি গচ্ছন্তীতি যং মগ্গং পটিপন্না তং পহায নিৱত্তিত্ৱা ৱামং ৱা দক্খিণং ৱা গহেত্ৱা গচ্ছন্তি, দ্ৱাৰম্পি থকেন্তি.

৩৪৪. ভূতপুব্বং ভিক্খৱেতি ইতি ভগৱা তে ভিক্খূ গৰহিত্ৱা তদনুৰূপঞ্চ ধম্মিং কথং কত্ৱা পুনপি ৱিঞ্ঞত্তিযা দোসং পাকটং কুৰুমানো ইমিনা ‘‘ভূতপুব্বং ভিক্খৱে’’তিআদিনা নযেন তীণি ৱত্থূনি দস্সেসি. তত্থ মণিকণ্ঠোতি সো কিৰ নাগৰাজা সব্বকামদদং মহগ্ঘং মণিং কণ্ঠে পিলন্ধিত্ৱা চৰতি, তস্মা ‘‘মণিকণ্ঠো’’ ত্ৱেৱ পঞ্ঞাযিত্থ. উপৰিমুদ্ধনি মহন্তং ফণং কৰিত্ৱা অট্ঠাসীতি সো কিৰ তেসং দ্ৱিন্নং ইসীনং কনিট্ঠো ইসি মেত্তাৱিহাৰী অহোসি, তস্মা নাগৰাজা নদিতো উত্তৰিত্ৱা দেৱৱণ্ণং নিম্মিনিত্ৱা তস্স সন্তিকে নিসীদিত্ৱা সম্মোদনীযং কথং কত্ৱা তং দেৱৱণ্ণং পহায সকৱণ্ণমেৱ উপগন্ত্ৱা তং ইসিং পৰিক্খিপিত্ৱা পসন্নাকাৰং কৰোন্তো উপৰিমুদ্ধনি মহন্তং ফণং কৰিত্ৱা ছত্তং ৱিয ধাৰযমানো মুহুত্তং ঠত্ৱা পক্কমতি, তেন ৱুত্তং ‘‘উপৰিমুদ্ধনি মহন্তং ফণং কৰিত্ৱা অট্ঠাসী’’তি. মণিমস্স কণ্ঠে পিলন্ধনন্তি মণিং অস্স কণ্ঠে পিলন্ধিতং, আমুক্কন্তি অত্থো. একমন্তং অট্ঠাসীতি তেন দেৱৱণ্ণেন আগন্ত্ৱা তাপসেন সদ্ধিং সম্মোদমানো একস্মিং পদেসে অট্ঠাসি.

মমন্নপানন্তি মম অন্নঞ্চ পানঞ্চ. ৱিপুলন্তি বহুলং. উড়াৰন্তি পণীতং. অতিযাচকোসীতি অতিৱিয যাচকো, অসি পুনপ্পুনং যাচসীতি ৱুত্তং হোতি. সুসূতি তৰুণো, থামসম্পন্নো যোব্বনপ্পত্তপুৰিসো. সক্খৰা ৱুচ্চতি কাড়সিলা, তত্থ ধোতো অসি ‘‘সক্খৰধোতো নামা’’তি ৱুচ্চতি, সক্খৰধোতো পাণিম্হি অস্সাতি সক্খৰধোতপাণি, পাসাণে ধোতনিসিতখগ্গহত্থোতি অত্থো. যথা সো অসিহত্থো পুৰিসো তাসেয্য, এৱং তাসেসি মং সেলং যাচমানো, মণিং যাচন্তোতি অত্থো.

ন তং যাচেতি তং ন যাচেয্য. কতৰং? যস্স পিযং জিগীসেতি যং অস্স সত্তস্স পিযন্তি জানেয্য.

কিমঙ্গং পন মনুস্সভূতানন্তি মনুস্সভূতানং অমনাপাতি কিমেৱেত্থ ৱত্তব্বং.

৩৪৫. সকুণসঙ্ঘস্স সদ্দেন উব্বাড়্হোতি সো কিৰ সকুণসঙ্ঘো পঠমযামঞ্চ পচ্ছিমযামঞ্চ নিৰন্তৰং সদ্দমেৱ কৰোতি, সো ভিক্খু তেন সদ্দেন পীড়িতো হুত্ৱা ভগৱতো সন্তিকং অগমাসি. তেনাহ – ‘‘যেনাহং তেনুপসঙ্কমী’’তি.

কুতো চ ত্ৱং ভিক্খু আগচ্ছসীতি এত্থ নিসিন্নো সো ভিক্খু ন আগচ্ছতি ৱত্তমানসমীপে পন এৱং ৱত্তুং লব্ভতি. তেনাহ – ‘‘কুতো চ ত্ৱং ভিক্খু আগচ্ছসী’’তি, কুতো আগতোসীতি অত্থো. ততো অহং ভগৱা আগচ্ছামীতি এত্থাপি সো এৱ নযো. উব্বাড়্হোতি পীড়িতো, উক্কণ্ঠাপিতো হুত্ৱাতি অত্থো.

সো সকুণসঙ্ঘো ‘‘ভিক্খু পত্তং যাচতী’’তি এত্থ ন তে সকুণা ভিক্খুনো ৱচনং জানন্তি, ভগৱা পন অত্তনো আনুভাৱেন যথা জানন্তি তথা অকাসি.

৩৪৬. অপাহং তে ন জানামীতি অপি অহং তে জনে ‘‘কে ৱা ইমে, কস্স ৱা ইমে’’তি ন জানামি. সঙ্গম্ম যাচন্তীতি সমাগন্ত্ৱা ৱগ্গৱগ্গা হুত্ৱা যাচন্তি. যাচকো অপ্পিযো হোতীতি যো যাচতি সো অপ্পিযো হোতি. যাচং অদদমপ্পিযোতি যাচন্তি যাচিতং ৱুচ্চতি, যাচিতমত্থং অদদন্তোপি অপ্পিযো হোতি. অথ ৱা যাচন্তি যাচন্তস্স, অদদমপ্পিযোতি অদেন্তো অপ্পিযো হোতি. মা মে ৱিদেস্সনা অহূতি মা মে অপ্পিযভাৱো অহু, অহং ৱা তৱ, ত্ৱং ৱা মম ৱিদেস্সো অপ্পিযো মা অহোসীতি অত্থো.

৩৪৭. দুস্সংহৰানীতি কসিগোৰক্খাদীহি উপাযেহি দুক্খেন সংহৰণীযানি.

৩৪৮-৯. সঞ্ঞাচিকায পন ভিক্খুনাতি এত্থ সঞ্ঞাচিকা নাম সযং পৱত্তিতযাচনা ৱুচ্চতি, তস্মা ‘‘সঞ্ঞাচিকাযা’’তি অত্তনো যাচনাযাতি ৱুত্তং হোতি, সযং যাচিতকেহি উপকৰণেহীতি অত্থো. যস্মা পন সা সযংযাচিতকেহি কযিৰমানা সযং যাচিত্ৱা কযিৰমানা হোতি, তস্মা তং অত্থপৰিযাযং দস্সেতুং ‘‘সযং যাচিত্ৱা পুৰিসম্পী’’তি এৱমস্স পদভাজনং ৱুত্তং.

উল্লিত্তাতি অন্তোলিত্তা. অৱলিত্তাতি বহিলিত্তা. উল্লিত্তাৱলিত্তাতি অন্তৰবাহিৰলিত্তাতি ৱুত্তং হোতি.

কাৰযমানেনাতি ইমস্স পদভাজনে ‘‘কাৰাপেন্তেনা’’তি এত্তকমেৱ ৱত্তব্বং সিযা, এৱঞ্হি ব্যঞ্জনং সমেতি. যস্মা পন সঞ্ঞাচিকায কুটিং কৰোন্তেনাপি ইধ ৱুত্তনযেনেৱ পটিপজ্জিতব্বং, তস্মা কৰোন্তো ৱা হোতু কাৰাপেন্তো ৱা উভোপেতে ‘‘কাৰযমানেনা’’তি ইমিনাৱ পদেন সঙ্গহিতাতি এতমত্থং দস্সেতুং ‘‘কৰোন্তো ৱা কাৰাপেন্তো ৱা’’তি ৱুত্তং. যদি পন কৰোন্তেন ৱা কাৰাপেন্তেন ৱাতি ৱদেয্য, ব্যঞ্জনং ৱিলোমিতং ভৱেয্য, ন হি কাৰাপেন্তো কৰোন্তো নাম হোতি, তস্মা অত্থমত্তমেৱেত্থ দস্সিতন্তি ৱেদিতব্বং.

অত্তুদ্দেসন্তি ‘‘ময্হং এসা’’তি এৱং অত্তা উদ্দেসো অস্সাতি অত্তুদ্দেসা, তং অত্তুদ্দেসং. যস্মা পন যস্সা অত্তা উদ্দেসো সা অত্তনো অত্থায হোতি, তস্মা অত্থপৰিযাযং দস্সেন্তো ‘‘অত্তুদ্দেসন্তি অত্তনো অত্থাযা’’তি আহ. পমাণিকা কাৰেতব্বাতি পমাণযুত্তা কাৰেতব্বা. তত্ৰিদং পমাণন্তি তস্সা কুটিযা ইদং পমাণং. সুগতৱিদত্থিযাতি সুগতৱিদত্থি নাম ইদানি মজ্ঝিমস্স পুৰিসস্স তিস্সো ৱিদত্থিযো ৱড্ঢকীহত্থেন দিযড্ঢো হত্থো হোতি. বাহিৰিমেন মানেনাতি কুটিযা বহিকুট্টমানেন দ্ৱাদস ৱিদত্থিযো, মিনন্তেন পন সব্বপঠমং দিন্নো মহামত্তিকপৰিযন্তো ন গহেতব্বো. থুসপিণ্ডপৰিযন্তেন মিনিতব্বং. থুসপিণ্ডস্সউপৰি সেতকম্মং অব্বোহাৰিকং. সচে থুসপিণ্ডেন অনত্থিকো মহামত্তিকায এৱ নিট্ঠাপেতি, মহামত্তিকাৱ পৰিচ্ছেদো.

তিৰিযন্তি ৱিত্থাৰতো. সত্তাতি সত্ত সুগতৱিদত্থিযো. অন্তৰাতি ইমস্স পন অযং নিদ্দেসো, ‘‘অব্ভন্তৰিমেন মানেনা’’তি, কুট্টস্স বহি অন্তং অগ্গহেত্ৱা অব্ভন্তৰিমেন অন্তেন মিনিযমানে তিৰিযং সত্ত সুগতৱিদত্থিযো পমাণন্তি ৱুত্তং হোতি.

যো পন লেসং ওড্ডেন্তো যথাৱুত্তপ্পমাণমেৱ কৰিস্সামীতি দীঘতো একাদস ৱিদত্থিযো তিৰিযং অট্ঠ ৱিদত্থিযো, দীঘতো ৱা তেৰস ৱিদত্থিযো তিৰিযং ছ ৱিদত্থিযো কৰেয্য, ন ৱট্টতি. একতোভাগেন অতিক্কন্তম্পি হি পমাণং অতিক্কন্তমেৱ হোতি. তিট্ঠতু ৱিদত্থি, কেসগ্গমত্তম্পি দীঘতো ৱা হাপেত্ৱা তিৰিযং তিৰিযতো ৱা হাপেত্ৱা দীঘং ৱড্ঢেতুং ন ৱট্টতি, কো পন ৱাদো উভতো ৱড্ঢনে? ৱুত্তঞ্হেতং – ‘‘আযামতো ৱা ৱিত্থাৰতো ৱা অন্তমসো কেসগ্গমত্তম্পি অতিক্কমিত্ৱা কৰোতি ৱা কাৰাপেতি ৱা পযোগে দুক্কট’’ন্তিআদি (পাৰা. ৩৫৩). যথাৱুত্তপ্পমাণা এৱ পন ৱট্টতি. যা পন দীঘতো সট্ঠিহত্থাপি হোতি তিৰিযং তিহত্থা ৱা ঊনকচতুহত্থা ৱা যত্থ পমাণযুত্তো মঞ্চো ইতো চিতো চ ন পৰিৱত্ততি, অযং কুটীতি সঙ্খ্যং ন গচ্ছতি, তস্মা অযম্পি ৱট্টতি. মহাপচ্চৰিযং পন পচ্ছিমকোটিযা চতুহত্থৱিত্থাৰা ৱুত্তা, ততো হেট্ঠা অকুটি. পমাণিকাপি পন অদেসিতৱত্থুকা ৱা সাৰম্ভা ৱা অপৰিক্কমনা ৱা ন ৱট্টতি. পমাণিকা দেসিতৱত্থুকা অনাৰম্ভা সপৰিক্কমনাৱ ৱট্টতি. পমাণতো ঊনতৰম্পি চতুহত্থং পঞ্চহত্থম্পি কৰোন্তেন দেসিতৱত্থুকাৱ কাৰেতব্বা. পমাণাতিক্কন্তঞ্চ পন কৰোন্তো লেপপৰিযোসানে গৰুকং আপত্তিং আপজ্জতি.

তত্থ লেপো চ অলেপো চ লেপোকাসো চ অলেপোকাসো চ ৱেদিতব্বো. সেয্যথিদং – লেপোতি দ্ৱে লেপা – মত্তিকালেপো চ সুধালেপো চ. ঠপেত্ৱা পন ইমে দ্ৱে লেপে অৱসেসো ভস্মগোমযাদিভেদো লেপো, অলেপো. সচেপি কলললেপো হোতি, অলপো এৱ. লেপোকাসোতি ভিত্তিযো চেৱ ছদনঞ্চ, ঠপেত্ৱা পন ভিত্তিচ্ছদনে অৱসেসো থম্ভতুলাপিট্ঠসঙ্ঘাটৱাতপানধূমচ্ছিদ্দাদি অলেপাৰহো ওকাসো সব্বোপি অলেপোকাসোতি ৱেদিতব্বো.

ভিক্খূ অভিনেতব্বা ৱত্থুদেসনাযাতি যস্মিং ঠানে কুটিং কাৰেতুকামো হোতি, তত্থ ৱত্থুদেসনত্থায ভিক্খূ নেতব্বা. তেন কুটিকাৰকেনাতিআদি পন যেন ৱিধিনা তে ভিক্খূ অভিনেতব্বা, তস্স দস্সনত্থং ৱুত্তং. তত্থ কুটিৱত্থুং সোধেত্ৱাতি ন ৱিসমং অৰঞ্ঞং ভিক্খূ গহেত্ৱা গন্তব্বং, কুটিৱত্থুং পন পঠমমেৱ সোধেত্ৱা সমতলং সীমমণ্ডলসদিসং কত্ৱা পচ্ছা সঙ্ঘং উপসঙ্কমিত্ৱা যাচিত্ৱা নেতব্বাতি দস্সেতি. এৱমস্স ৱচনীযোতি সঙ্ঘো এৱং ৱত্তব্বো অস্স. পৰতো পন ‘‘দুতিযম্পি যাচিতব্বা’’তি ভিক্খূ সন্ধায বহুৱচনং ৱুত্তং. নো চে সব্বো সঙ্ঘো উস্সহতীতি সচে সব্বো সঙ্ঘো ন ইচ্ছতি, সজ্ঝাযমনসিকাৰাদীসু উয্যুত্তা তে তে ভিক্খূ হোন্তি. সাৰম্ভং অনাৰম্ভন্তি সউপদ্দৱং অনুপদ্দৱং. সপৰিক্কমনং অপৰিক্কমনন্তি সউপচাৰং অনুপচাৰং.

পত্তকল্লন্তি পত্তো কালো ইমস্স ওলোকনস্সাতি পত্তকালং, পত্তকালমেৱ পত্তকল্লং. ইদঞ্চ ৱত্থুংওলোকনত্থায সম্মুতিকম্মং অনুসাৱনানযেন ওলোকেত্ৱাপি কাতুং ৱট্টতি. পৰতো পন ৱত্থুদেসনাকম্মং যথাৱুত্তায এৱ ঞত্তিযা চ অনুসাৱনায চ কাতব্বং, ওলোকেত্ৱা কাতুং ন ৱট্টতি.

৩৫৩. কিপিল্লিকানন্তি ৰত্তকাড়পিঙ্গলাদিভেদানং যাসং কাসঞ্চি কিপিল্লিকানং. কিপীল্লকানন্তিপি পাঠো. আসযোতি নিবদ্ধৱসনট্ঠানং, যথা চ কিপিল্লিকানং এৱং উপচিকাদীনম্পি নিবদ্ধৱসনট্ঠানংযেৱ আসযো ৱেদিতব্বো. যত্থ পন তে গোচৰত্থায আগন্ত্ৱা গচ্ছন্তি, সব্বেসম্পি তাদিসো সঞ্চৰণপ্পদেসো অৱাৰিতো, তস্মা তত্থ অপনেত্ৱা সোধেত্ৱা কাতুং ৱট্টতি. ইমানি তাৱ ছ ঠানানিসত্তানুদ্দযায পটিক্খিত্তানি.

হত্থীনং ৱাতি হত্থীনং পন নিবদ্ধৱসনট্ঠানম্পি নিবদ্ধগোচৰট্ঠানম্পি ন ৱট্টতি, সীহাদীনং আসযো চ গোচৰায পক্কমন্তানং নিবদ্ধগমনমগ্গো চ ন ৱট্টতি. এতেসং গোচৰভূমি ন গহিতা. যেসং কেসঞ্চীতি অঞ্ঞেসম্পি ৱাড়ানং তিৰচ্ছানগতানং. ইমানি সত্ত ঠানানি সপ্পটিভযানি ভিক্খূনং আৰোগ্যত্থায পটিক্খিত্তানি. সেসানি নানাউপদ্দৱেহি সউপদ্দৱানি. তত্থ পুব্বণ্ণনিস্সিতন্তি পুব্বণ্ণং নিস্সিতং সত্তন্নং ধঞ্ঞানং ৱিৰুহনকখেত্তসামন্তা ঠিতং. এসেৱ নযো অপৰণ্ণনিস্সিতাদীসুপি. এত্থ পন অব্ভাঘাতন্তি কাৰণাঘৰং ৱেৰিঘৰং, চোৰানং মাৰণত্থায কতন্তি কুৰুন্দিআদীসু.

আঘাতনন্তি ধম্মগন্ধিকা ৱুচ্চতি. সুসানন্তি মহাসুসানং. সংসৰণন্তি অনিব্বিজ্ঝগমনীযো গতপচ্চাগতমগ্গো ৱুচ্চতি. সেসং উত্তানমেৱ.

ন সক্কা হোতি যথাযুত্তেন সকটেনাতি দ্ৱীহি বলিবদ্দেহি যুত্তেন সকটেন একং চক্কং নিব্বোদকপতনট্ঠানে একং বহি কত্ৱা আৱিজ্জিতুং ন সক্কা হোতি. কুৰুন্দিযং পন ‘‘চতূহি যুত্তেনা’’তি ৱুত্তং. সমন্তা নিস্সেণিযা অনুপৰিগন্তুন্তি নিস্সেণিযং ঠত্ৱা গেহং ছাদেন্তেহি ন সক্কা হোতি সমন্তা নিস্সেণিযা আৱিজ্জিতুং. ইতি এৱৰূপে সাৰম্ভে চ অপৰিক্কমনে চ ঠানে ন কাৰেতব্বা. অনাৰম্ভে পন সপৰিক্কমনে কাৰেতব্বা, তং ৱুত্তপটিপক্খনযেন পাড়িযং আগতমেৱ.

পুন সঞ্ঞাচিকা নামাতি এৱমাদি ‘‘সাৰম্ভে চে ভিক্খু ৱত্থুস্মিং অপৰিক্কমনে সঞ্ঞাচিকায কুটিং কাৰেয্যা’’তি এৱং ৱুত্তসংযাচিকাদীনং অত্থপ্পকাসনত্থং ৱুত্তং.

পযোগে দুক্কটন্তি এৱং অদেসিতৱত্থুকং ৱা পমাণাতিক্কন্তং ৱা কুটিং কাৰেস্সামীতি অৰঞ্ঞতো ৰুক্খা হৰণত্থায ৱাসিং ৱা ফৰসুং ৱা নিসেতি দুক্কটং, অৰঞ্ঞং পৱিসতি দুক্কটং, তত্থ অল্লতিণানি ছিন্দতি দুক্কটেন সদ্ধিং পাচিত্তিযং, সুক্খানি ছিন্দতি দুক্কটং. ৰুক্খেসুপি এসেৱ নযো. ভূমিং সোধেতি খণতি, পংসুং উদ্ধৰতি, চিনাতি; এৱং যাৱ পাচীৰং বন্ধতি তাৱ পুব্বপযোগো নাম হোতি. তস্মিং পুব্বপযোগে সব্বত্থ পাচিত্তিযট্ঠানে দুক্কটেন সদ্ধিং পাচিত্তিযং, দুক্কটট্ঠানে দুক্কটং, ততো পট্ঠায সহপযোগো নাম. তত্থ থম্ভেহি কাতব্বায থম্ভং উস্সাপেতি, দুক্কটং. ইট্ঠকাহি চিনিতব্বায ইট্ঠকং আচিনাতি, দুক্কটং. এৱং যং যং উপকৰণং যোজেতি, সব্বত্থ পযোগে পযোগে দুক্কটং. তচ্ছন্তস্স হত্থৱাৰে হত্থৱাৰে তদত্থায গচ্ছন্তস্স পদে পদে দুক্কটং. এৱং কতং পন দাৰুকুট্টিকং ৱা ইট্ঠককুট্টিকং ৱা সিলাকুট্টিকং ৱা অন্তমসো পণ্ণসালম্পি সভিত্তিচ্ছদনং লিম্পিস্সামীতি সুধায ৱা মত্তিকায ৱা লিম্পন্তস্স পযোগে পযোগে যাৱ থুল্লচ্চযং ন হোতি, তাৱ দুক্কটং. এতং পন দুক্কটং মহালেপেনেৱ ৱট্টতি, সেতৰত্তৱণ্ণকৰণে ৱা চিত্তকম্মে ৱা অনাপত্তি.

একং পিণ্ডং অনাগতেতি যো সব্বপচ্ছিমো একো লেপপিণ্ডো, তং একং পিণ্ডং অসম্পত্তে কুটিকম্মে. ইদং ৱুত্তং হোতি, ইদানি দ্ৱীহি পিণ্ডেহি নিট্ঠানং গমিস্সতীতি তেসু পঠমপিণ্ডদানে থুল্লচ্চযন্তি.

তস্মিং পিণ্ডে আগতেতি যং একং পিণ্ডং অনাগতে কুটিকম্মে থুল্লচ্চযং হোতি, তস্মিং অৱসানপিণ্ডে আগতে দিন্নে ঠপিতে লেপস্স ঘটিতত্তা আপত্তি সঙ্ঘাদিসেসস্স. এৱং লেম্পন্তস্স চ অন্তোলেপে ৱা অন্তোলেপেন সদ্ধিং ভিত্তিঞ্চ ছদনঞ্চ একাবদ্ধং কত্ৱা ঘটিতে বহিলেপে ৱা বহিলেপেন সদ্ধিং ঘটিতে সঙ্ঘাদিসেসো. সচে পন দ্ৱাৰবদ্ধং ৱা ৱাতপানং ৱা অট্ঠপেত্ৱাৱ মত্তিকায লিম্পতি, তস্মিঞ্চ তস্সোকাসং পুন ৱড্ঢেত্ৱা ৱা অৱড্ঢেত্ৱা ৱা ঠপিতে লেপো ন ঘটীযতি ৰক্খতি তাৱ, পুন লিম্পন্তস্স পন ঘটিতমত্তে সঙ্ঘাদিসেসো. সচে তং ঠপিযমানং পঠমং দিন্নলেপেন সদ্ধিং নিৰন্তৰমেৱ হুত্ৱা তিট্ঠতি, পঠমমেৱ সঙ্ঘাদিসেসো. উপচিকামোচনত্থং অট্ঠঙ্গুলমত্তেন অপ্পত্তচ্ছদনং কত্ৱা ভিত্তিং লিম্পতি, অনাপত্তি. উপচিকামোচনত্থমেৱ হেট্ঠা পাসাণকুট্টং কত্ৱা তং অলিম্পিত্ৱা উপৰি লিম্পতি, লেপো ন ঘটিযতি নাম, অনাপত্তিযেৱ.

ইট্ঠককুট্টিকায ইট্ঠকাহিযেৱ ৱাতপানে চ ধূমনেত্তানি চ কৰোতি, লেপঘটনেনেৱ আপত্তি. পণ্ণসালং লিম্পতি, লেপঘটনেনেৱ আপত্তি. তত্থ আলোকত্থায অট্ঠঙ্গুলমত্তং ঠপেত্ৱা লিম্পতি, লেপো ন ঘটীযতি নাম, অনাপত্তিযেৱ. সচে ‘‘ৱাতপানং লদ্ধা এত্থ ঠপেস্সামী’’তি কৰোতি, ৱাতপানে ঠপিতে লেপঘটনেন আপত্তি. সচে মত্তিকায কুট্টং কৰোতি, ছদনলেপেন সদ্ধিং ঘটনে আপত্তি. একো একপিণ্ডাৱসেসং কত্ৱা ঠপেতি, অঞ্ঞো তং দিস্ৱা ‘‘দুক্কতং ইদ’’ন্তি ৱত্তসীসেন লিম্পতি উভিন্নম্পি অনাপত্তি.

৩৫৪. ভিক্খু কুটিং কৰোতীতি এৱমাদীনি ছত্তিংস চতুক্কানি আপত্তিভেদদস্সনত্থং ৱুত্তানি, তত্থ সাৰম্ভায দুক্কটং, অপৰিক্কমনায দুক্কটং, পমাণাতিক্কন্তায সঙ্ঘাদিসেসো, অদেসিতৱত্থুকায সঙ্ঘাদিসেসো, এতেসং ৱসেন ৱোমিস্সকাপত্তিযো ৱেদিতব্বা.

৩৫৫. আপত্তি দ্ৱিন্নং সঙ্ঘাদিসেসেন দ্ৱিন্নং দুক্কটানন্তিআদীসু চ দ্ৱীহি সঙ্ঘাদিসেসেহি সদ্ধিং দ্ৱিন্নং দুক্কটানন্তিআদিনা নযেন অত্থো ৱেদিতব্বো.

৩৬১. সো চে ৱিপ্পকতে আগচ্ছতীতিআদীসু পন অযং অত্থৱিনিচ্ছযো. সোতি সমাদিসিত্ৱা পক্কন্তভিক্খু. ৱিপ্পকতেতি অনিট্ঠিতে কুটিকম্মে. অঞ্ঞস্স ৱা দাতব্বাতি অঞ্ঞস্স পুগ্গলস্স ৱা সঙ্ঘস্স ৱা চজিত্ৱা দাতব্বা. ভিন্দিত্ৱা ৱা পুন কাতব্বাতি কিত্তকেন ভিন্না হোতি, সচে থম্ভা ভূমিযং নিখাতা, উদ্ধৰিতব্বা. সচে পাসাণানং উপৰি ঠপিতা, অপনেতব্বা. ইট্ঠকচিতায যাৱ মঙ্গলিট্ঠকা তাৱ কুট্টা অপচিনিতব্বা. সঙ্খেপতো ভূমিসমং কত্ৱা ৱিনাসিতা ভিন্না হোতি, ভূমিতো উপৰি চতুৰঙ্গুলমত্তেপি ঠিতে অভিন্নাৱ. সেসং সব্বচতুক্কেসু পাকটমেৱ. ন হেত্থ অঞ্ঞং কিঞ্চি অত্থি, যং পাড়িঅনুসাৰেনেৱ দুব্বিঞ্ঞেয্যং সিযা.

৩৬৩. অত্তনা ৱিপ্পকতন্তিআদীসু পন অত্তনা আৰদ্ধং কুটিং. অত্তনা পৰিযোসাপেতীতি মহামত্তিকায ৱা থুসমত্তিকায ৱা যায কতং পৰিযোসিতভাৱং পাপেতুকামো হোতি, তায অৱসানপিণ্ডং দেন্তো পৰিযোসাপেতি.

পৰেহি পৰিযোসাপেতীতি অত্তনোৱ অত্থায পৰেহি পৰিযোসাপেতি. অত্তনা ৱা হি ৱিপ্পকতা হোতু পৰেহি ৱা উভযেহি ৱা, তং চে অত্তনো অত্থায অত্তনা ৱা পৰিযোসাপেতি, পৰেহি ৱা পৰিযোসাপেতি, অত্তনা চ পৰেহি চাতি যুগনদ্ধং ৱা পৰিযোসাপেতি, সঙ্ঘাদিসেসোযেৱাতি অযমেত্থ ৱিনিচ্ছযো.

কুৰুন্দিযংপন ৱুত্তং – ‘‘দ্ৱে তযো ভিক্খূ ‘একতো ৱসিস্সামা’তি কৰোন্তি, ৰক্খতি তাৱ, অৱিভত্তত্তা অনাপত্তি. ‘ইদং ঠানং তৱ, ইদং মমা’তি ৱিভজিত্ৱা কৰোন্তি আপত্তি. সামণেৰো চ ভিক্খু চ একতো কৰোন্তি, যাৱ অৱিভত্তা তাৱ ৰক্খতি. পুৰিমনযেন ৱিভজিত্ৱা কৰোন্তি, ভিক্খুস্স আপত্তী’’তি.

৩৬৪. অনাপত্তি লেণেতিআদীসু লেণং মহন্তম্পি কৰোন্তস্স অনাপত্তি. ন হেত্থ লেপো ঘটীযতি. গুহম্পি ইট্ঠকাগুহং ৱা সিলাগুহং ৱা দাৰুগুহং ৱা ভূমিগুহং ৱা মহন্তম্পি কৰোন্তস্স অনাপত্তি.

তিণকুটিকাযাতি সত্তভূমিকোপি পাসাদো তিণপণ্ণচ্ছদনো ‘‘তিণকুটিকা’’তি ৱুচ্চতি. অট্ঠকথাসু পন কুক্কুটচ্ছিকগেহন্তি ছদনং দণ্ডকেহি জালবদ্ধং কত্ৱা তিণেহি ৱা পণ্ণেহি ৱা ছাদিতকুটিকাৱ ৱুত্তা, তত্থ অনাপত্তি. মহন্তম্পি তিণচ্ছদনগেহং কাতুং ৱট্টতি, উল্লিত্তাদিভাৱো এৱ হি কুটিযা লক্খণং, সো চ ছদনমেৱ সন্ধায ৱুত্তোতি ৱেদিতব্বো. চঙ্কমনসালাযং তিণচুণ্ণং পৰিপততি ‘‘অনুজানামি, ভিক্খৱে, ওগুম্ফেত্ৱা উল্লিত্তাৱলিত্তং কাতু’’ন্তিআদীনি (চূড়ৱ. ২৬০) চেত্থ সাধকানি, তস্মা উভতো পক্খং ৱা কূটবদ্ধং ৱা ৱট্টং ৱা চতুৰস্সং ৱা যং ‘‘ইমং এতস্স গেহস্স ছদন’’ন্তি ছদনসঙ্খেপেন কতং হোতি, তস্স ভিত্তিলেপেন সদ্ধিং লেপে ঘটিতে আপত্তি. সচে পন উল্লিত্তাৱলিত্তচ্ছদনস্স গেহস্স লেপৰক্খণত্থং উপৰি তিণেন ছাদেন্তি, এত্তাৱতা তিণকুটি নাম ন হোতি. কিং পনেত্থ অদেসিতৱত্থুকপ্পমাণাতিক্কন্তপচ্চযাৱ অনাপত্তি, উদাহু সাৰম্ভঅপৰিক্কমনপচ্চযাপীতি সব্বত্থাপি অনাপত্তি. তথা হি তাদিসং কুটিং সন্ধায পৰিৱাৰে ৱুত্তং –

‘‘ভিক্খু সঞ্ঞাচিকায কুটিং কৰোতি;

অদেসিতৱত্থুকং পমাণাতিক্কন্তং;

সাৰম্ভং অপৰিক্কমনং অনাপত্তি;

পঞ্হা মেসা কুসলেহি চিন্তিতা’’তি. (পৰি. ৪৭৯);

অঞ্ঞস্সত্থাযাতি কুটিলক্খণপ্পত্তম্পি কুটিং অঞ্ঞস্স উপজ্ঝাযস্স ৱা আচৰিযস্স ৱা সঙ্ঘস্স ৱা অত্থায কৰোন্তস্স অনাপত্তি. যং পন ‘‘আপত্তি কাৰুকানং তিণ্ণং দুক্কটান’’ন্তিআদি পাড়িযং ৱুত্তং, তং যথাসমাদিট্ঠায অকৰণপচ্চযা ৱুত্তং.

ৱাসাগাৰং ঠপেত্ৱা সব্বত্থাতি অত্তনো ৱসনত্থায অগাৰং ঠপেত্ৱা অঞ্ঞং উপোসথাগাৰং ৱা জন্তাঘৰং ৱা ভোজনসালা ৱা অগ্গিসালা ৱা ভৱিস্সতীতি কাৰেতি, সব্বত্থ অনাপত্তি. সচেপিস্স হোতি ‘‘উপোসথাগাৰঞ্চ ভৱিস্সতি, অহঞ্চ ৱসিস্সামি জন্তাঘৰঞ্চ ভোজনসালা চ অগ্গিসালা চ ভৱিস্সতি, অহঞ্চ ৱসিস্সামী’’তি কাৰিতেপি আনাপত্তিযেৱ. মহাপচ্চৰিযং পন ‘‘অনাপত্তী’’তি ৱত্ৱা ‘‘অত্তনো ৱাসাগাৰত্থায কৰোন্তস্সেৱ আপত্তী’’তি ৱুত্তং. উম্মত্তকস্স আদিকম্মিকানঞ্চ আড়ৱকানং ভিক্খূনং অনাপত্তি.

সমুট্ঠানাদীসু ছসমুট্ঠানং কিৰিযঞ্চ কিৰিযাকিৰিযঞ্চ, ইদঞ্হি ৱত্থুং দেসাপেত্ৱা পমাণাতিক্কন্তং কৰোতো কিৰিযতো সমুট্ঠাতি, ৱত্থুং অদেসাপেত্ৱা কৰোতো কিৰিযাকিৰিযতো, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

কুটিকাৰসিক্খাপদৱণ্ণনা নিট্ঠিতা.